LISON 47

Sera ki bu sta pruntu pa batisa?

TOKA

Atraves di bu studu di Biblia bu aprindi ja manga di kusas aserka di Jeova. I pudi sedu kuma bu fasi ja alguns mudansas pa aplika ke ku bu aprindi. I pudi sedu kuma i tene algun kusa ku na tujiu pa bu dedika bu vida pa Jeova i batisa. Es lison na fala di alguns kusas ku kustuma tuji jintis batisa, i na mostra kuma ku bu pudi vensi elis.

1. Sera ki bu pirsisa di sibi manga di kusas antis di bu batisa?

Pa pudi batisa bu pirsisa di “kunsi bardadi” diritu. (1 Timótiu 2:4) Es ka misti fala di kuma bu pirsisa di kunsi tudu respostas ku sta na Biblia antis di bu batisa. Mesmu kristons ku batisa pa manga di tempu kontinua na aprindi. (Kolosensis 1:9, 10) Ma bu pirsisa di ntindi nsinus importanti di Biblia. Ansions di kongregason na judau sibi si bu tene kuñisimentu sufisienti.

2. Kal ki alguns kusas ku bu pirsisa di fasi antis di batismu?

Antis di batisa, bu dibi di ‘ripindi i konverti.’ (Lei Atus 3:19.) Bu dibi di fika tristi dimas pa kualker pekadu ku bu fasiba i pidi Jeova pa i purdau. Tambi bu dibi di nega tudu mau komportamentu i disidi vivi di un manera ku na kontenta Deus. Alen di kila, bu na kumsa partisipa na atividadis di kongregason suma mati runions, i prega suma publikadur ku ka batisadu.

3. Ke ku manda bu ka dibi di disa pa medu tujiu batisa?

Utrus ta tene medu di kuma e ka na pudi fasi ke ke purmiti Jeova. I bardadi di kuma bu pudi yara, te mesmu omis ku minjeris fiel ku faladu del na Biblia yara. Ma Jeova ka ta spera pa si servus sedu perfeitu. (Lei Salmu 103:13, 14.) I ta fika kontenti ora ku bu fasi bu minjor! I na judau. Na bardadi Jeova garantinu di kuma, nada “ka na pudi rapatinu di amor di Deus.” — Lei Romanus 8:38, 39.

APRINDI MAS

Jubi kuma ku bu pudi kunsi Jeova minjor, i seta si ajuda pa bu pudi vensi kualker difikuldadi ku na tujiu batisa.

4. Kunsi Jeova minjor

Te kal pontu ku bu pirsisa di kunsi Jeova antis di bu batisa? Bu pirsisa di kunsi Jeova diritu pa amal i misti kontental. Mostra VIDEO pa oja kuma ku studantis di Biblia na mundu ntidu sta na fasi kila. Dipus bo kombersa aserka des purguntas:

VIDEO: Kamiñu pa batismu (3:56)

Na video, ke ku juda alguns purpara pa batismu?

Lei Romanus 12:2, dipus bo kombersa aserka des purguntas:

Sera ki bu tene kualker duvida aserka di ke ku Biblia ta sina, o si Tustumuñas di Jeova ta sina bardadi?
Si bu tene duvida, ke ku bu pudi fasi?

5. Vensi difikuldadis ku talves pudi tujiu batisa

Anos tudu no ta nfrenta difikuldadis, ora ku no disidi dedika no vida pa Jeova i batisa. Pa oja un izemplu di kila, mostra VIDEO, dipus bo kombersa aserka des purguntas:

VIDEO: Amor pa Jeova ta Vensi Difikuldadis (5:22)

Na video, kal difikuldadis ku Narangerel pirsisa di vensi pa sirbi Jeova?
Kuma ku si amor pa Jeova judal vensi ki difikuldadis?

Lei Ditus 29:25 ku 2 Timótiu 1:7, dipus bo kombersa aserka des purguntas:

Ke ku ta danu koraẑen pa vensi difikuldadis?

6. Konfia na ajuda di Jeova

Jeova na judau pa bu kontental. Mostra VIDEO, dipus bo kombersa aserka des purguntas:

VIDEO: Jeova Deus na Judau (2:50)

Na video, ke ku tujiba es studanti di Biblia batisa?
Ke ki i aprindi ku judal tene mas konfiansa na Jeova?

Lei Isaias 41:10, 13, dipus bo kombersa aserka des purgunta:

Ke ku manda bu tene konfiansa di kuma bu pudi kumpri promesa ku fasi oja ku bu dedika?

7. Aumenta mas bu apresu pa amor di Jeova

Mas bu na pensa na amor ku Jeova tene pa bo, mas bu na misti gardisil i misti sirbil pa sempri. Lei Salmu 40:5, dipus bo kombersa aserka des purgunta:

Kal bon kusas ku Jeova fasi pa bo, ku bu mas gosta del?

Profeta Jeremias ama Jeova ku si palabra, i daba balur garandi pa si privileẑiu di sirbi Jeova. I fala: “Oca ku bu papia ku mi, N kume bu palabras; e dan kontentamentu ku pas na ña korson, pabia N comadu na bu nomi, o SIÑOR Deus.” (Jeremias 15:16) Ruspundi es purguntas: