47 CAJ YACHACUY
¿Listunachu caycanqui bautizacunayquipaj?
Bibliata estudiashgayquiraycurmi gamga Jehovata mayna reguinqui. Jina yachacushgayquipis mayraj yanapäshushcanqui ali runaman ticranayquipaj. Pero mushoj runamanna ticrashgana carpis, ¿imalapis michaycäshunquirächu bautizacunayquipaj? Caycho yachacushun imacunataj achca estudianticunata yanapashga imacunapa pasarpis bautizacärinanpaj. ¿Gampis imanoraj valurcharcunquiman bautizacunayquipaj?
1. ¿Bibliapitaga lapantarächu yachacunayqui bautizacunayquipaj?
Pipis bautizacunanpäga ‘rasunpa caj yachachicuycunatarämi yachacunman’ (1 Timoteo 2:4, TNM). Manaraj bautizacurga manami lapantarächu yachacunayqui o musyanayqui Bibliapitaga. Achca watapana Diosta sirvejcunapis jinalami Bibliapitaga yachacäriycanraj (Colosenses 1:9, 10). Ichanga Bibliapita mana lapantaraj yachacurpis waquin yachachicuynincunataga shumajrämi tantiarcunayqui. Imalapis pishiycäshuptiquega congregaciuncho ancianucunaga yanapäshunquipämi.
2. ¿Imacunatataj ruranayquiraj manaraj bautizacur?
Biblia nin: “Cananga juchayquicunapita arpinticuy” (leiriy Hechos 3:19). Manaraj bautizacurmi pipis arrepenticunman. Jehovata ruwacurmi ninman ‘perdunaycalämay, juchalacurmi cawacuycashcä’ nir. Y manami chaylachu, pipis rasunpa arrepentido captenga unay vidanta jaguirirmi Dios munashgannona cawayta galaycunman. Jina manaraj bautizacurpis mayna congregaciunchoga juntacaycanmanna, Diospitapis yachachicuycanmanna.
3. ¿Manchacurlachuraj ‘bautizacushärächu’ pipis ninman?
Waquincunaga ‘capaz Diosta falläman’ nirmi bautizacuyta munanchu. Lapanchicuna juchasaparaj caycarga imalachopis pantaycäshunmi. Bibliapis wilacunmi unay Diosta sirvejcuna imalachopis pantapäcushganta. Shamoj tiempuchorämi lapan juchanchicunaga ilacanga; Taytalanchi Diospis musyanmi chayta (leiriy Salmo 103:13, 14). Waran waran calpachacuycäshunla ali cajta ruranapaj, chaynopa imacunapis Jehovapa “cuyacuyninpita mana raquimäshunchu” (leiriy Romanos 8:38, 39).
SHUMAJ YACHACURCUNAPAJ
Bautizacunapaj imapis michaycämaptinchega, ishcay caycan yanapämänanchipaj: Jehovata masraj reguishwan y pushamänanchipaj ruwacushwan.
4. Jehovata masraj reguinquiman
Bautizacunayquipäga alirämi Diosninchipita yachacunayqui. Payta cuyashgayqui y cäsucushgayquega clarumi ricacämunman. VIDEUTA ricapäcuy, mä imanotaj may chaycho Bibliata estudiajcuna Diospita shumaj yachacärishga. Nircur caypita parlapacäriy:
-
Videucho yargamushganno, ¿imataj achca estudianticunata yanapashga bautizacärinanpaj listo carcaycänanpaj?
Leipäcuy Romanos 12:2 y caycunapita parlapacäriy:
-
¿Niycanquirächu ‘rasuntachuraj Biblia yachachicun’ nir? ¿Segurucho caycanqui Testigucuna rasunpa cajta yachachicärishganta?
-
Segururaj mana caycarga, ¿imataraj ruranquiman?
5. Valurcharcuy imatapis vencinayquipaj
Öraga imalapis michaycämäshunchi bautizacurir cushi cushila Diosta sirvinapaj. Caypita parlamoj VIDEUTA ricapäcuy. Nircur caycunapita parlapacäriy:
-
¿Imatataj Narangerel jutiyoj pani rurargan Jehovata sirvinanraycur?
-
¿Imanotaj yanapargan Tayta Jehovata amatar cuyashganga?
Leipäcuy Proverbios 29:25 y 2 Timoteo 1:7 y caypita parlapacäriy:
-
¿Maychotaj calpata tarinchi ali valurcharcunapaj?
6. Jehovaga yanapayculäshunquimi
Jehovaga yanapäshunquimi voluntäninta ruranayquipaj. VIDEUTA ricapäcuy y caycunapita parlapacäriy:
-
¿Imanirtaj cay runaga bautizacuyta manchacoj?
-
¿Imataj yanapargan Jehovaman masraj yäracunanpaj?
Leipäcuy Isaías 41:10, 13 y caypita parlapacäriy:
-
Jehovalata sirvinayquipaj aunicushga carga, ¿imanirtaj seguro caycanquiman chay aunicushgayquita cumplinayquipaj?
7. Waran waran agradecido caycanquiman
Jehová alapa cuyashushgayquitaga ama gongaychu, chaynopa payta agradëcicur masraj sirviyta munaqui. Leipäcuy Salmo 40:5 y caypita parlapacäriy:
-
¿Jehová ima goyculäshushgayquitaj masraj cushichishunqui?
Jeremías profetaga Jehová Diostami alapa cuyaj, chaymi Paypa jutincho purir ali wilacuytapis apaj. Cay profeta nergan: “Chay palabrayqui nogapäga allimi caran; cushicachimajmi. Munayniyoj TAYTA DIOS, nogaga gamllapanami caycä” (Jeremías 15:16). Cay tapucuycunapita yachacäriy:
-
¿Imanirtaj alapa cushicuypaj canman Jehovapa testigunman ticrarga?
-
¿Gampis bautizacuytanachu munanqui Jehovapa testigun canayquipaj?
-
¿Imalapis michaycäshunquirächu?
-
¿Imatataj ruranquiman bautizacunayquipaj listo caycänayquipaj?
WAQUINCUNA NIPÄCUN: “‘Capazchi Diosta aunicushgätaga cumplishächu’ nirmi bautizacuyta manchacö”.
-
¿Gampis chaynochu yarpanqui?
ICHIC YACHACUY
Jehová yanapäshuptiquega, imacunapis michäshushgayquicunataga vencinquipämi.
Yarpänapaj
-
Bautizacunayquipäga, ¿Bibliapita lapantarächuraj yachacunquiman?
-
¿Imacunatarätaj ruranquiman manaraj bautizacur?
-
¿‘Manchacömi’ nirlachuraj manana bautizacunquimannachu?
MASLATA YACHACUNAYQUIPAJ
Tantiacuy mä imaraycurtaj pipis bautizacunman.
“¿Bautizacunayquipaj listunachu caycanqui?” (Wilacamoj, marzo 2020)
Yachacuy imanotaj vencinquiman bautizacunayquipaj imalapis michaycäshushgayquita.
“¿Bautizacunäpaj imataj michaycämanraj?” (Wilacamoj, marzo 2019)
Yachacuy imanotaj juc runa imaycata rurargan bautizacunanpaj.
Galananchoga ‘bautizacömanchuraj o manachuraj’ nirmi Ataa jutiyoj runa caycargan. Yachacuy imataj payta yanapargan bautizacunanpaj.
