LECCIÓN 47
¿Can purunturishca anguichu bautisaringahua?
Bibliara estudiashcamanda can ña ashca yachangui Jehovamanda. Astaumbas yachaushcamanda camba causaibi pactachingahua huaquin turcaiguna rurashcangui. Shinajpis maicambi imas arcaun can Diospajma mingarisha bautisarichu. Cai lección yachachin imasnara Bibliamanda estudiajcuna arcaigunara vinsinuca bautisaringahua shinallara cambas imara rurana ushangui arcaigunara vinsingahua.
1. ¿Masna Bibliamanda yachana angui bautisaringahua?
Bautisaringahua can ‘sirtu shimira yachana’ angui (1 Timoteo 2:4). Shinajpis cai mana nisha nin manara bautisarishcallaira Bibliamanda runauna tucui tapushcaunara can yachana ashcara. Ashca huatauna bautisarishcaunas ministinun Bibliamanda yachasha catingahua (Colosenses 1:9, 10). Bibliamanda mana tucuira yachashas ministirishca yachachishcaunara yachana angui. Shinallara congregacionmanda ancianoguna canda yanapanunga ricungaj can masna tupu Bibliamanda yachana ashcara.
2. ¿Imara rurana angui manara bautisarishcallaira?
Biblia ninmi: “Aripintirichi, Diosma tigraichi” (leai Hechos 3:19). Chiraigu manara bautisarishcallaira can aripintirina angui. Shinajpis ¿cai imara nisha nin? Ninmi can yapa llaqui sintiringui ñaupa uchara rurashcamanda, astaumbas Jehová Diosta perdondas mañangui. Shinallara tucui manali rashcaunamanda caruyangui, Dios munashca cuinta causangui. Astaumbas tandarinaunama shamusha congregacionmanda parti tucungui, mana bautisarishca ashas Bibliamanda yachachijpas tucungui.
3. Bautisaringahua ¿imarasha mana manzhana angui?
Huaquinguna manzhaira charinun Jehová Diosma, rimashca shimiunara mana pactachina ushangarauni nisha. Sirtumi, maicambi can pandaringaraungui imasna Bibliai tiaj huaquin casuj cari huarmiunas pandarinushcasna. Shinajpis iyari, Jehová Dios mana ima huras mañanzhu paita sirvijcuna ucha illaj shina causachu (leai Salmo 103:13, 14). Jehová Diosta casungahua can tucui ushashca tupu rurajpi pai cushi anga. Astaumbas Jehová canda yanapangami. Biblia nin mana imas “ushanzhu ñucanchira anzhuchinara Diospa llaquinamanda” (leai Romanos 8:38, 39).
MAS YACHAI
Ricushun imasna yanapanga Jehová Diosta ali ricsina, paihua yanapaira chasquinas, bautisaringaj arcaigunara vinsingahua.
4. Jehová Diosta ali ricsi
¿Masna Jehová Diosta ricsina angui manara bautisarishcallaira? Can ministingui Jehová Diosta ali ricsina paita llaquingagama, paita casuna munairas charingagama. VIDEORA ricuichi yachangaj imasna intiru mundui Bibliamanda estudiajcuna bautisarina ushanuca, huasha catij tapuimanda rimaichi:
-
Cai videoibi ricushca cuinta ¿imara yanapaca huaquin Bibliamanda estudiajcunara bautisaringaj purunturishca angahua?
Leaichi Romanos 12:2, huasha catij tapuigunamanda rimaichi:
-
¿Sirtu pacha quiringuichu tucui Biblia yachachishcara? ¿Quiringuichu Jehovahuaj testigoguna sirtu shimi yachachishcara?
-
Quiringahua shinzhi ajpi ¿imara rurana ushangui?
5. Ima arcai shamujpis vinsisha cati
Jehová Diospajma mingarisha bautisaringaj ajllashcai tucuiguna problemagunara charishcanchi. Caimanda yachangaj VIDEORA ricuichi. Huasha catij tapuigunamanda rimaichi:
-
¿Ima arcaigunara Narangerel pani vinsina aca Jehová Diosta sirvingaj?
-
¿Imasnara Jehová Diosta llaquina paita yanapaca cai arcaigunara vinsingahua?
Leaichi Proverbios 29:25; 2 Timoteo 1:7, huasha catij tapuimanda rimaichi:
-
¿Imasnara Yaya Dios yanapan arcaigunara vinsingaj?
6. Jehová canda yanapangaraushcara quiri
Jehová canda yanapangami paihua munaira pactachingaj. VIDEORA ricuichi, huasha catij tapuigunamanda rimaichi:
-
Bibliamanda yachauj videoibi ricurij ¿imarasha manzhaira charica bautisaringahua?
-
¿Imara paita yanapaca Jehová Diospi mas quiringahua?
Leaichi Isaías 41:10, 13, huasha catij tapuimanda rimaichi:
-
Jehová Diosllara sirvisha nishcara pactachina ushashcara ¿imarasha can sirtu quirina ushangui?
7. Jehová Dios ashca canda llaquishcara iyarisha pagarachungui
Jehová Dios ashca canda llaquishcara iyarisha mas pagarachushca sintiringaraungui, mas paita sirvina munaira charingaraungui huiñai huiñaigama. Leaichi Salmo 40:5, huasha catij tapuimanda rimaichi:
-
Jehová cuyashcaunamanda ¿maicanda mas valichingui?
Profeta Jeremías llaquij aca Jehová Diosta, paihua shimiras, shinallara ashcara valichica Jehová Diosta sirvij anara. Pai nica: ‘Camba shimiuna ñuca shungura cushiyachica, ñuca camba shutira apashcamanda, Jehová’ (Jeremías 15:16). Cuna cai tapuigunara cutipangui:
-
¿Imarasha yapa valij an Jehovahuaj testigo ana?
-
¿Can bautisarina munanguichu Jehovahuaj testigo tucungaj?
-
¿Imara arcan can bautisarichu?
-
¿Imara rurana ushangui bautisaringahua?
RUNAUNA CASNA NINUJPI: “Bautisarisha Jehová Dios munaira mana pactachina ushashachu pandarishami nisha manzhai charini”.
-
¿Can shina sintiringuichu?
IMARA YACHASHCANGUI
Jehová yanapaihua ima arcairas vinsisha bautisarina ushangui.
Iyaringaj
-
¿Masna Bibliamanda yachana angui bautisaringahua?
-
¿Imara rurana angui manara bautisarishcallaira?
-
¿Imarasha mana manzhai charina angui bautisaringahua?
RICUNGUI
Bautisaringahua ima rurana ashcara leai.
“¿Purunturishca anguichu bautisaringaj?” (La Atalaya, marzo de 2020)
Bautisaringahua imasna arcaigunara vinsina ushashcara yachai.
Ricui imasna shu runa arcaira vinsica bautisaringahua.
Bautisarinara mana bautisarinara shu runa mana yachashcai ricui imara paita yanapaca bautisaringahua.
Cai temagunaras leana munanguichari
TAPUIGUNA
Jehovahuaj testigoguna Bibliamanda yachachinchi
Jehovahuaj testigogunahua gratis Bibliamanda yachashcai can munashca Bibliara utilizana ushangui. Astaumbas munasha camba ailluunara amigogunaras cumbirana ushangui canhua yachangaj.
