YAĆHACHICUY 47
¿Listuñachun cayanqui bautisacunayquipä?
Unayña Bibliata estudiaśhayquipi imacunactañam yaćhalunqui Jehovapi. Chay yaćhaśhayquita cäsucuyanquiñam ñatac cambiucta lulayanquiñam cawsaynïquićhu pero imapis atajayäśhunquićh, Jehovaman dedicacunayquipä ñatac bautisacunayquipä. Cayćhumi yaćhaśhun, achca Bibliapi estudiacunata atajaśhanta, chaycunacta imanuypa venciśhanta, yaćhaśhuntacmi ampis imactam lulanquiman bautisacunayquipä.
1. ¿Llapan Bibliatalachun yaćhanquiman bautisacunayquipä?
Bautisacunayquipä, “rasuncallactam allinta yaćhanayqui” (1 Timoteo 2:4, TNM). Manalapis bautisacul manam llapan Bibliatachu yaćhanqui. Unayña bautisacuśhacunapis jinallalämi Bibliapi yaćhayan (Colosenses 1:9, 10). Chaynü captinpis bautisacunayquipä imam cällactam Jehovapi yaćhanayqui. Punta-lï-yaśhacunami yanapaśhunqui yaćhanayquipä bautisacunayquita o mana.
2. Manalapis bautisacul, ¿imacunactam lulanayqui?
Bibliami nimanchic: “Mana allin lulayniquicunapi wanaculcul Diosmanña filtacalcämuy” (liguicuy Hechos 3:19). Chayta lulanayqui manalapis bautisaculmi. ¿Imam ninanmi chay? Unay ima juchacunacta lulaśhayquipï śhun’uyquićhu nanaśhuśhayquim, chaymi Jehovata mañacunayqui perdonaśhunayquipä. Chaypita manañam ima mana allincunactapis lulanayquićhu aśhwanpa callpanchacunqui Dios munaśhannü cawsanayquipä. Chaypi’a hermanucunawan cusca utunacunayqui ñatac paycunawan cusca Diospi willacunayqui.
3. ¿Imapïmi mana manchacunayquichu bautisacuyta?
Waquincuna nipäcun: Manchacümi mana pishćha Jehová Diosman promesa lulaśhata atipaśhachu cumplita nil. Ayveces pantalunquimanmi imacta lulalpis Jehovapa siervuncunacta pasaśhantanü, pero yalpanqui Jehová manam perfecto canayquitalächu munan (liguicuy Salmo 103:13, 14). Pay munan lluy puydiśhayquiwan callpanchacunayquitam, chaywanmi pay cushisha can’a, ñatac yanapaśhunqui. Bibliami nin: ‘Jehová Dios cuyamäśhanchicpïta ima aycapis mana japächamäśhunchu’ (liguicuy Romanos 8:37-39).
MASTA YAĆHAYCUŚHUN
Canan yaćhaśhun allinta Jehovata lisiptiqui ñatac yanapayninta mañacuptiqui, chaycunam yanapaśhunqui mana manchacunayquipä.
4. Jehovata allinta lisiy
¿Maycamam Jehovata lisinayqui bautisacunayquipä? Jehovata cuyaptiqui ñatac cäsucuptiqui ñam payta lisinquiña. Licaśhun VIDEUCTA cayćhumi willamanchic cay enterun allpaćhu Bibliapi estudiacuna imanuypam Jehovaman dedicaculcala. Chaypi’a limaśhun caypi:
-
Videucta licaśhanchicnü, ¿imam yanapala waquin estudianticunacta listuña cananpä bautisacunanpä?
Liguiśhun Romanos 12:2 ñatac limaśhun caypi:
-
¿Creinquichun Bibliaca lluy yaćhachiśhanta? ¿Creinquichun Jehovapa testiguncunap yaćhachiśhanca rasuncächun?
-
Creinayquipä sasa captin, ¿imactam lulanquiman?
5. Manam imapis atajaśhunayquichu bautisacunayquipä
Llapanchicmi sasacunacta pasanchic, chaymi mana facilchu decidicuyca Jehovaman dedicacunanchicpä ñatac bautisacunanchicpä. Yaćhananchicpä juc hermananchicta pasaśhampi, licaśhun VIDEUCTA. Chaypi’a limaśhun caypi:
-
¿Ima sasacunactam pasala chay hermanaca Jehovata servinanpä?
-
¿Imam yanapala Jehovata cuyaśhanca sasacunacta vencinanpä?
Liguiśhun Proverbios 29:25 ñatac 2 Timoteo 1:7, ñatac limaśhun caypi:
-
¿Imam yanapamäśhun sasacunacta pasaptinchic?
6. Jehová yanapaśhunquim
Jehová yanapaśhunquim, pay munaśhantanü lulanayquipä. Licaśhun VIDEUCTA ñatac limaśhun caypi:
-
Videucta licaśhanchicnü Bibliapi estudia nuna, ¿imapïmi mana bautisacuyta munalachu?
-
¿Imam yanapala Jehovaman masta confiacunanpä?
Liguiśhun Isaías 41:10, 13 ñatac limaśhun caypi:
-
¿Imapïmi seguro cayanqui cumplinayquita dedicaciunnïquita?
7. Agradecicuy Jehová cuyaśhuśhayquipï
Jehová cuyaśhuśhayquipï piensaptiqui, mastam Jehovata agradecicunqui ñatac mastam servita munanqui. Liguiśhun Salmo 40:5 ñatac limaśhun caypi:
-
Jehovapa, ¿ima regalunpimi masta agradecicunqui?
Jeremías allictam cuyala Jehovata, chaymi cushisha cala payta sirvil ñatac paypi willacul. Chaymi nila: ‘Limapayniquimá śhun’ulläta achicyalcachiman, cushiycachiman, ya’a śhutiquitam apayä, Jehová’ (Jeremías 15:16). Canan cutichiy cay tapuycunata:
-
¿Imapïmi puydin Jehovapa testigun cay?
-
¿Bautisacuyta munanquichun Jehovapa testigun canayquipä?
-
¿Imacunam atajaśhunquiman bautisacunayquipä?
-
¿Imacunactam lulanquiman bautisacunayquipä?
WAQUINCUNA NIPÄCUN: “Manchacümi Jehovata prometicuśhata manaćh cumplimanchu”.
-
Ampis, ¿chaynütachun piensanqui?
IMACTAM YAĆHALUNCHIC
Jehovapa yanapayninwan bautisacunquim masqui sasacunacta pasalpis.
Yalpaśhun
-
¿Llapan Bibliatalächun yaćhanquiman?
-
Manalapis bautisacul, ¿imacunactam lulanayqui?
-
¿Imapïmi mana manchacunanquichu bautisacunayquipä?
MASTA YAĆHANAYQUIPÄ
¿Imapïmi bautisacunayqui? Chayta yaćhanayquipä liguiy.
“¿Está usted listo para bautizarse?” (La Atalaya, marzo de 2020)
¿Imanuypam vencinquiman sasacunacta bautisacunayquipä? Chayta yaćhanayquipä liguiy.
¿Imanuypam juc hombre vencila alli sasacunacta bautisacunanpä? Licay videucta.
Juc hombre puntacta manam yaćhalachu bautisacunanta o mana, payta imam yanapala bautisacunanpä, licay videucta.
