LEKCIJA 47
Šaj tut imar des te bolel?
Hin igen šukar, keci imar džanes pal o Jehovas. Dičhol, hoj e Biblija tuke pomožinďa te prekerel tiro dživipen. A akana hin tutar aver manuš. Aľe šaj el, hoj daras te del tiro dživipen le Jehovaske a te del pes te bolel. Kadi lekcija rozkidela, soske šaj vareko daral te del pes te bolel a sar te predžal adi dar.
1) Kampel tuke te džanel caľi Biblija, te kames te el boldo?
E Biblija phenel, hoj anglal o boľipen kampel mište te achaľol le čačipnaske. (1. Timotejovi 2:4) Oda nane te džanel caľi Biblija. The pal o boľipen savore furt sikhľuvas. (Kolosanom 1:9, 10) Te mištes achaľos, ko hin o Jehovas, ko hin o Ježiš, so hin le Devleskero kraľišagos a ajse čačipena, na mušines tut te daral te del pes te bolel. A te tuke na sal isto, ma dara te džal pal o zborova phuredera. Phenena tuke, či le čačipnaske andal e Biblija mište achaľos.
2) So mek kampel te kerel anglal o boľipen?
Kampel, kaj te bajines tire bini, so kerďal a kaj tut te visares kijo Del. (Pregen Skutky 3:19) Oda hin, hoj jilestar manges le Jehovas, kaj tuke te odmukhel oda nalačho, so kerehas, bo imar tut ňigda na kames te visarel pro nalačho drom. A paľis chudes te dživel avka, sar phenďal le Jehovaske. Rado phires pro zhromažďeňa a le phralenca pheňenca andre služba.
3) Soske na mušines te daral te del pes te bolel?
Vareko peske šaj phenel: „A so te pal o boľipen kerava vareso nalačho?“ Andre Biblija genas pribehi pal o Jehovaskere verna manuša. On tiš kerde varekana vareso namište. Aľe o Jehovas len furt rado dikhelas. O Jehovas džanel, hoj keraha chibi the pal o boľipen. (Pregen Žalm 103:13, 14) Aľe te pes na vzdaha a služinaha leske cale jilestar, ov amenge podela o vast a ňigda amen na omukhela. Diňa amen lav, hoj amen ňigda na preačhela te kamel. (Pregen Rimanom 8:38, 39)
DODŽAN TUT BUTER
Te feder sprindžareha, savo hino o Jehovas a chudes tut leskere vastestar, paľis na daraha ňisostar a deha tut te bolel.
4) Sprindžar le Jehovas mek feder
Keci tuke kampel te džanel pal o Jehovas anglal o boľipen? Ajci, kaj les čačes jilestar te kames a kaj leske te keres radišagos. Mukh o VIDEJO pal o murša the džuvľija, so avka kerde. A paľis vakeren jekhetane.
-
So lenge pomožinelas, kaj pes te den te bolel?
Pregen Rimanom 12:2 a paľis vakeren jekhetane:
-
Sal tuke isto, hoj oda, so sikhľos la Biblijatar le Jehovaskere svedkenca, hin čačipen?
-
Te na, so šaj oleha keres?
5) Tire pharipena tut na mušinen te zaačhavel!
Sako jekh amendar zadžiďiľa pharipena, te pes kamľa te del te bolel. Dikh, so zadžiďiľa jekh džuvľi. Mukh o VIDEJO a paľis vakeren jekhetane.
-
Save pharipena zadživelas kodi džuvľi, sar kamľa te služinel le Jehovaske?
-
Sar lake andre oda pomožinďa, hoj fest kamelas le Jehovas?
Pregen Príslovia 29:25 the 2. Timotejovi 1:7 a paľis vakeren jekhetane:
-
So amen dela zor, kaj amen o pharipena te na zaačhaven?
6) Zmukh tut pro Jehovas!
O Jehovas tut dela zor, kaj leske te služines. Mukh o VIDEJO a paľis vakeren jekhetane.
-
Soske oda dad daralas te ačhel le Jehovaskero svedkos?
-
So olestar, so sikhľiľa pal o Jehovas, les diňa zor, kaj leske buter te paťal?
Pregen Izaiáš 41:10, 13 a paľis vakeren jekhetane:
-
Soske na mušines te daral, hoj džaneha te dživel avka sar kamel o Jehovas?
7) Ma le ča kavka, hoj o Jehovas tut kamel!
Te rozmišľineha, sar tut o Jehovas kamel, the tiro kamiben ke leste furt barola. Oda tut cirdela les te šunel a te služinel leske pro furt. Pregen Žalm 40:5 a paľis vakeren jekhetane:
-
Vaš save lačhipena nekbuter paľikeres le Jehovaske?
O prorokos o Jeremiáš igen kamelas le Jehovas. Rado genelas leskero lav. A baripnaha hordinelas (phiravelas) le Jehovaskero nav. Phenďa: „Tire lava [Jehova] mange anen o radišagos a miro jilo lendar radisaľol, se me man vičinav pal tiro nav.“ (Jeremiáš 15:16 NZ) Akana rozkiden ala otazki:
-
Soske nane ňič bareder sar te el le Jehovaskero svedkos?
-
Kames the tu te del pes te bolel a kavka te ačhel le Jehovaskero svedkos?
-
Hin vareso, soske oda našťi keres?
-
So mek tuke kampel te kerel, kaj tut te des te bolel?
VAREKO ŠAJ PHENEL: „Na džanav, či bi džanavas te dživel sar le Jehovaskero svedkos.“
-
The tu oda kavka ciťines?
SO SIKHĽIĽAM
Le Jehovaskera zoraha tut ňisave pharipena na zaačhavena, kaj tut te des te bolel.
So bi phenehas
-
Kampel tuke te džanel caľi Biblija anglal o boľipen?
-
So tuke kampel te prekerel anglal o boľipen?
-
Soske na mušines te daral te del pes te bolel?
DIKH TUKE BUTER
Pregen tuke, so tuke kampel te džanel sigeder, sar tut deha te bolel.
Pregen tuke, so tuke pomožinela, kaj te na daras te del pes te bolel.
„Čo mi bráni, aby som bol pokrstený?“ (Strážna veža z marca 2019)
Dikh tuke, sar pestar odčhiďa jekh murš oda nalačhipen, kaj pes te del te bolel.
Dikh tuke, sar jekh murš o Ataa, pro peršo na kamelas te del pes te bolel. Aľe paľis achaľiľa, hoj o boľipen igen kampel.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
