SIKAIMOS 47

San gata te boldios?

THO

Pala so sikilian katar e Biblia gata zhanes but pa o Jehova. Ai shai avela parhudian uni prame ande kiro traio te keres so sikilian. Numa shai avela ke si vareso kai terdiarel tu ai chi mekel tu te shinaves kiro traio ka o Jehova ai te boldios. Ande kako sikaimos si te dikhas so azhutisardias ka uni manush te aresen te boldion ai so shai keres te boldios.

1. Sode trobus te zhanes pa e Biblia mai anglal te boldios?

Te boldios, trobus te zhanes “o chachimos” (1 Timote 2:4). Godo chi kamel te phenel ke trobus te zhanes sa so pushen tu pa e Biblia. Savorhe, vi godola kristianuria kai boldile de dumut trobun te sikion mai pa e Biblia (Colosenses 1:9, 10, NWT). Numa trobus te zhanes le bare prame kai sikavel e Biblia. Ai le phure anda e congregacion shai azhutin tu te dikhes te avela so zhanes pa e Biblia aresel te boldios.

2. So trobus te keres mai anglal te boldios?

E Biblia phenel: “Kein tumen ai parhudion” (chito Hechos 3:19, NWT). Ai kako si vareso kai trobus te keres mai anglal te boldios. Numa, so kamel te phenel? Ke keis tu chachimasa anda fersavo bezej kai kerdian mai anglal, ai ke manges katar o Jehova te iertil tu. Ai vi kamel te phenel ke kames te trais sar o Jehova mangel ai ke chi kames te keres khanchi kai angla leske iakha nai vorta. Trobus te chides tu ai te ningeres le lashe viesti le marturentsa le Jehovaske makar chi san boldo.

3. Sostar chi trobus te daras te boldios?

Uni manush daran te na inkeren so shinade ka o Jehova. Ai chaches ke univar si te atsadios, sar phenel e Biblia ke atsadile uni mursh ai zhuvlia. Numa chi trobus te bistres ke o Jehova chi azhukerel te keras suako prama mishto (chito Salmo 103:13, 14). Te des o mai lasho tutar si te veselis lesko ilo ai vo si te azhutil tu. E Biblia phenel amenge ke khanchi “nashtil te duriarel amen katar o kamlimos le Devlesko” (chito Romanos 8:38, 39, NWT).

TE MAI SIKIOS

Aida dikhas dui prame kai si te azhutin tu te areses ka o bolimos: te prinzhares mai mishto ka o Jehova ai te mekes te azhutil tu.

4. Prinzhar mai mishto ka o Jehova

Sode trobus te prinzhares ka o Jehova mai anglal te boldios? Trobus te prinzhares ka o Jehova zhi kai areses te kames les ilesa ai te pakias lesko mui. Dikhen o VIDEO te zhanes sar kerde godo uni manush kai sikionas pa e Biblia pe sa e lumia. Polme den duma pa:

VIDEO: Sar uni zhene aresle te boldion (3:56)

Pa so dikhiol ando video, so azhutisardias ka uni manush te aresen ka o bolimos?

Chiton Romanos 12:2 [NWT] ai den duma pa:

Nai vushoro tuke te pakias vareso kai sikavel e Biblia? Pakias ke le marturia le Jehovaske sikaven o chachimos?
Te avela nai gadia, so shai keres?

5. Na mek te terdiaren tu le bedi te areses ka o bolimos

Savorhe si amen uni bedi kana alosaras te shinavas amaro traio ka o Jehova ai te boldiuvas. Dikhen o VIDEO ai den duma pa:

VIDEO: O kamlimos karing o Jehova azhutil amen anglal bedi (5:22)

Save bedi sas ka iek phei te luvudil ka o Jehova?
Sar o kamlimos karing o Jehova azhutisardias la te nakhel pe godola bedi?

Chiton Proverbios 29:25 ai 2 Timoteo 1:7 [NWT], ai den duma pa:

Katar las zor te nakhas pa godola bedi?

6. Shai pakias ando Jehova ke si te azhutil tu

O Jehova si te azhutil tu te veselis lesko ilo. Dikhen o VIDEO ai den duma pa:

VIDEO: O Jehova si te azhutil tu (2:50)

So terdiarelas ka o manush anda o video te boldiol?
So azhutisardias les te pakialpe mai but ando Jehova?

Chiton Isaías 41:10, 13 ai den duma pa:

Sostar zhanes chachimasa ke shai keres so shinadian ka o Jehova?

7. Gindisavo sode kamel tu o Jehova

Kana mai des tu gogi ande sode kamel tu o Jehova, mai si te kames te luvudis les ilesa pe sa e vriama. Chiton Salmo 40:5 ai den duma pa:

Save prame lashe kai dias tu o Jehova si mai kuchi tuke?

O profeto Jeremias kamelas zurales ka o Jehova ai leski vorba, ai leske sas bari prama te ningerel o anau le Devlesko. Vo phendias: “Kire suaturia kerdile e veselia ai raduimos ande murho ilo, ke me ningerau kiro anau, ioi Devla, o Jehova” (Jeremías 15:16). Akana de suato pa so pushelpe tele: