LESONA 47
Po ua E Sauni e Papatiso?
Ua e aʻoaʻoina le tele o mea e faatatau iā Ieova i lau suʻesuʻega faale-Tusi Paia. E mautinoa na e faia ni suiga ina ia faatatau ai mea na e aʻoaʻoina. Peitaʻi, atonu e iai se mea o loo taofia ai oe mai le tuuina atu o lou ola iā Ieova ma papatiso. O le a talanoaina i lenei lesona nisi o manatu taatele e taofia ai nisi mai le papatiso, ma le auala e mafai ona foʻia ai.
1. O le ā le tele o mea e tatau ona e iloa a o leʻi papatiso?
Ina ia agavaa e papatiso, e manaʻomia ona e iloa le “poto saʻo i le upu moni.” (1 Timoteo 2:4) E lē faapea ai e tatau ona e iloa tali o fesili uma e faatatau i le Tusi Paia a o leʻi papatiso. E oo lava i Kerisiano ua tele tausaga talu ona papatiso, o loo faaauau pea ona aʻoaʻoina i latou. (Kolose 1:9, 10) Ae e tatau ona e malamalama i aʻoaʻoga faavae o le Tusi Paia. O le a fesoasoani toeaina o le faapotopotoga iā te oe e iloilo po ua lava lou malamalama.
2. O ā laasaga e tatau ona e ausia a o leʻi papatiso?
A o leʻi papatiso, e tatau ona e ʻsalamō ma liliu.’ (Faitau le Galuega 3:19.) O lona uiga, e tatau ona e salamō moni mai au agasala, ma talosaga atu iā Ieova mo le faamagaloga. E tatau foʻi ona e matuā teena amioga leaga, ma maumauaʻi e ola i se auala e faafiafiaina ai le Atua. E lē gata i lea, e tatau foʻi ona amata ona e auai i sauniga, ma avea ma tagata talaʻi e leʻi papatiso.
3. Aiseā e lē tatau ai ona faataga le fefe e taofia oe?
O nisi e fefefe ina neʻi lē mafai ona faataunuu a latou tautoga iā Ieova. O le mea moni, e iai taimi e te faia ai mea sesē, e pei foʻi o tane ma fafine faatuatua o loo taʻua i le Tusi Paia. Ae e lē faatalitalia e Ieova ona tagata tapuaʻi ina ia lelei atoatoa. (Faitau le Salamo 103:13, 14.) E faafiafiaina o ia pe a e faia le mea sili e te mafaia! O le a ia fesoasoani iā te oe, ma ua ia faamautinoa mai, e leai se mea e mafai “ona faateʻaeseina i tatou mai i [lona] alofa.”—Faitau le Roma 8:38, 39.
SAʻILIʻILI ATILI
Mātau pe faapefea ona e foʻia so o se luʻi e taofia ai oe mai le papatiso, e ala i le iloa lelei o Ieova ma talia lana fesoasoani.
4. Ia iloa lelei Ieova
O le ā le tele e tatau ona e iloa e faatatau iā Ieova a o leʻi papatiso? E tatau ona e iloa lelei o ia ina ia e atiaʻe ai le alofa, ma uunaʻia ai oe e faafiafia o ia. Faaali le VITIŌ ma mātau pe faapefea ona faia faapea e tagata aʻoga o le Tusi Paia i le lalolagi aoao, ona talanoa lea i le fesili lenei:
-
I le vitiō, o le ā na fesoasoani i nisi ina ia agavaa ai mo le papatisoga?
Faitau le Roma 12:2, ona talanoa lea i fesili nei:
-
Pe e te masalosalo i mea o loo taʻua i le Tusi Paia, po o mea foʻi o loo aʻoaʻo e Molimau a Ieova?
-
Pe afai o lea, o le ā e mafai ona e faia?
5. Foʻia luʻi e ono taofia ai oe mai le papatiso
Pe a tatou filifili e tuuina atu o tatou ola iā Ieova ma papatiso, o le a tatou fesagaʻia le tele o luʻi. Ina ia iloa se faaaʻoaʻoga, faaali le VITIŌ ma talanoa i fesili nei:
-
I le vitiō, o ā luʻi na tatau ona foʻia e Narangerel ina ia auauna ai iā Ieova?
-
Na faapefea ona fesoasoani lona alofa mo Ieova e foʻia ai na luʻi?
Faitau le Faataoto 29:25 ma le 2 Timoteo 1:7, ona talanoa lea i le fesili lenei:
-
E faapefea ona tatou maua le lototele e foʻia ai luʻi?
6. Ia maufaatuatuaina le fesoasoani a Ieova
O le a fesoasoani Ieova i au taumafaiga e faafiafia o ia. Faaali le VITIŌ, ona talanoa lea i fesili nei:
-
I le vitiō, o le ā na taofia ai le tagata aʻoga o le Tusi Paia mai le papatiso?
-
O le ā se mea na ia aʻoaʻoina, na faamalosia ai lona maufaatuatuaina o Ieova?
Faitau le Isaia 41:10, 13, ona talanoa lea i le fesili lenei:
-
Aiseā e te mautinoa ai, e mafai ona faataunuu lau folafolaga na fai i lou tuuina atu?
7. Ia faalolotoina lou talisapaia o le alofa o Ieova
O le tele e te mafaufau ai i le alofa o Ieova iā te oe, o le tele foʻi lenā o lou lotofaafetai ma manaʻo e auauna iā te ia e faavavau. Faitau le Salamo 40:5, ona talanoa lea i le fesili lenei:
-
O ā faamanuiaga mai iā Ieova e sili ona e talisapaia?
Na alofa le perofeta o Ieremia iā Ieova ma lana afioga, ma na ia matuā talisapaia le faaeaga o le tauaveina o le suafa o Ieova. Na ia faapea mai: “Na avea foʻi lau afioga ma mea e fiafia ma olioli ai loʻu loto, auā ua taʻua aʻu i lou suafa, Ieova e, le Atua o ʻau.” (Ieremia 15:16) Talanoa i fesili nei:
-
Aiseā o se faaeaga tāua ai le avea ma Molimau a Ieova?
-
Pe e te manaʻo e papatiso ma avea ma Molimau a Ieova?
-
Pe iai se mea o taofia ai oe mai le faia faapea?
-
O le ā e tatau ona e faia ina ia ausia ai le sini o le papatiso?
UA FAAPEA MAI NISI: “Ailoga e mafai ona ou ola e ōgatusa ma tiute tauave o se tagata ua uma ona papatiso.”
-
Po o ou faalogona na?
AOTELEGA
O le fesoasoani a Ieova e mafai ai ona e foʻia soo se faafitauli ina ia papatiso.
Fesili Autalu
-
O le ā le tele e tatau ona e iloa ai le Tusi Paia ina ia e papatiso?
-
O ā suiga e manaʻomia ona e faia a o leʻi papatiso?
-
Aiseā e lē tatau ai ona e faatagaina le fefe e taofia oe?
MANATU FAAOPOOPO
Iloilo po o le ā e tatau ona faavae aʻe ai lau filifiliga e papatiso.
Ia iloa le auala e foʻia ai luʻi e ono taofia oe.
“O le ā se Mea e Taofia ai Aʻu Mai i le Papatisoina?” (Le Olomatamata, Mati 2019)
Mātau le auala na manumalo ai se tamāloa mai i luʻi tetele na ia fesagaʻia ina ia papatiso.
Na faatalatū se tamāloa e igoa ia Ata e papatiso. Mātau po o le ā na uunaʻia ai o ia e ausia lenei laasaga.
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
