LISAUN 47
Ita prontu atu hetan batizmu ka lae?
Liuhusi estuda Bíblia, Ita aprende ona buat barak kona-ba Jeová. Karik Ita mós halo ona mudansa balu hodi aplika buat neʼebé Ita aprende ona. Maibé karik sei iha buat ruma neʼebé hanetik Ita atu dedika an ba Jeová no hetan batizmu. Iha lisaun neʼe, ita sei koʼalia kona-ba buat balu neʼebé hanetik ema barak no oinsá mak Ita bele sai prontu atu hetan batizmu.
1. Antes atu hetan batizmu, Ita presiza iha koñesimentu toʼo neʼebé?
Atu bele hetan batizmu, Ita presiza iha “koñesimentu neʼebé loos kona-ba lia-loos”. (1 Timóteo 2:4) Neʼe la dehan katak Ita presiza hatene resposta ba pergunta hotu kona-ba Bíblia antes hetan batizmu. Ema Kristaun neʼebé hetan batizmu kleur ona mós presiza kontinua aprende. (Koloso 1:9, 10) Maibé Ita presiza iha koñesimentu báziku kona-ba Bíblia nia hanorin. Katuas sira iha kongregasaun sei ajuda Ita atu hatene se Ita-nia koñesimentu toʼo ona ka lae.
2. Saida deʼit mak Ita presiza halo antes atu hetan batizmu?
Atu bele hetan batizmu, Ita tenke “arrepende an . . . no fila fali ba Maromak”. (Lee Apóstolu 3:19.) Neʼe katak Ita sente triste tebes kona-ba sala neʼebé Ita halo ona no husu Jeová atu fó perdua ba Ita. Ita mós halo desizaun metin atu hadook an husi hahalok sala no moris tuir dalan neʼebé halo Maromak kontente. Liután neʼe, Ita hahú hola parte iha atividade sira iha kongregasaun hodi tuir reuniaun sira no haklaken nuʼudar haklaken-naʼin neʼebé seidauk hetan batizmu.
3. Tanbasá Ita lalika sente taʼuk no dada an?
Ema balu sente taʼuk tanba karik aban-bainrua labele kumpre buat neʼebé sira promete ona ba Jeová. Klaru katak dala ruma Ita sei halo sala, hanesan fiar-naʼin sira neʼebé temi iha Bíblia mós halo sala. Maibé Jeová la hein ninia atan sira atu sai perfeitu. (Lee Salmo 103:13, 14.) Jeová sente kontente kuandu Ita hakaʼas an ho laran tomak! Nia sei ajuda Ita. Jeová fó fiar mai ita katak la iha buat ida mak bele ‘haketak ita husi ninia domin’.—Lee Roma 8:38, 39.
KEʼE KLEʼAN
Haree oinsá hodi hatene didiʼak Jeová no simu ninia ajuda halo Ita manán hasoru dezafiu naran deʼit neʼebé hanetik Ita atu hetan batizmu.
4. Hatene didiʼak Jeová
Antes atu hetan batizmu, Ita presiza hatene didiʼak Jeová toʼo neʼebé? Ita presiza hatene nia toʼo Ita bele hadomi nia no hakarak halo nia kontente. Loke VÍDEO no haree oinsá mak estudante Bíblia iha mundu tomak halo nuneʼe. Depois koʼalia hamutuk kona-ba pergunta tuirmai.
-
Iha vídeo neʼe, saida mak ajuda ema balu atu sai prontu hodi hetan batizmu?
Lee Roma 12:2, depois koʼalia hamutuk kona-ba pergunta tuirmai:
-
Ita sei iha dúvida ruma ka lae kona-ba Bíblia nia hanorin ka Testemuña ba Jeová nia hanorin kona-ba lia-loos?
-
Se nuneʼe, Ita bele halo saida?
5. Manán hasoru susar oioin neʼebé bele hanetik Ita
Ita hotu hasoru susar oioin kuandu deside atu dedika an ba Jeová no hetan batizmu. Atu haree ezemplu ida, loke VÍDEO, depois koʼalia hamutuk kona-ba pergunta tuirmai.
-
Narangerel presiza manán hasoru susar saida deʼit atu bele serbí Jeová?
-
Oinsá mak domin ba Jeová ajuda nia atu manán hasoru susar sira-neʼe?
Lee Provérbios 29:25 no 2 Timóteo 1:7, depois koʼalia hamutuk kona-ba pergunta tuirmai:
-
Oinsá mak ita bele hetan forsa atu manán hasoru susar oioin?
6. Tau fiar ba Jeová nia ajuda
Jeová sempre ajuda Ita atu bele halo nia kontente. Loke VÍDEO, depois koʼalia hamutuk kona-ba pergunta tuirmai.
-
Iha vídeo neʼe, tanbasá mak estudante Bíblia dada an atu hetan batizmu?
-
Lia-loos saida mak ajuda nia atu hametin ninia fiar ba Jeová?
Lee Isaias 41:10, 13, depois koʼalia hamutuk kona-ba pergunta tuirmai:
-
Tanbasá mak Ita bele fiar metin katak Ita bele kumpre Ita-nia promesa atu dedika an ba Jeová?
7. Agradese liután ba Jeová nia domin
Kuandu Ita hanoin kleʼan kona-ba Jeová nia domin ba Ita, Ita mós sei sente agradese liután no hakarak liután atu serbí nia ba nafatin. Lee Salmo 40:5, depois koʼalia hamutuk kona-ba pergunta tuirmai:
-
Ita rasik agradese ba Jeová liuliu kona-ba bensaun saida?
Profeta Jeremias hadomi Jeová no ninia liafuan, no nia hafolin tebes priviléjiu atu lori Jeová nia naran. Nia hatete: ‘Ita-nia liafuan sai buat neʼebé halo haʼu-nia laran kontente no haksolok, tanba haʼu lori Ita-nia naran, oh Maromak Jeová.’ (Jeremias 15:16) Hatán ba pergunta tuirmai:
-
Tanbasá atu sai Testemuña ba Jeová mak priviléjiu espesiál?
-
Ita hakarak hetan batizmu nuʼudar Testemuña ba Jeová ka lae?
-
Iha buat ruma neʼebé hanetik Ita ka lae?
-
Tuir Ita-nia hanoin, Ita presiza halo saida atu bele hetan batizmu?
EMA BALU DEHAN: “Haʼu taʼuk atu hetan batizmu tanba karik iha aban-bainrua haʼu labele kumpre promesa neʼebé haʼu halo.”
-
Ita mós sente hanesan neʼe ka lae?
PONTU IMPORTANTE
Ho Jeová nia ajuda, Ita bele manán hasoru susar naran deʼit neʼebé hanetik Ita atu hetan batizmu.
Rezumu
-
Antes atu hetan batizmu, Ita presiza iha koñesimentu toʼo neʼebé?
-
Ita presiza halo mudansa saida deʼit atu bele hetan batizmu?
-
Tanbasá mak Ita lalika taʼuk no dada an atu hetan batizmu?
BUKA-HATENE LIUTÁN
Hanoin toʼok saida mak razaun importante liu atu hetan batizmu.
“Ita prontu ona atu hetan batizmu ka lae?” (Livru Haklaken, Marsu 2020)
Aprende oinsá atu manán hasoru susar sira neʼebé hanetik Ita atu hetan batizmu.
“Saida mak hanetik haʼu atu hetan batizmu?” (Livru Haklaken, Marsu 2019)
Haree toʼok oinsá mak mane ida konsege manán hasoru ninia susar atu bele hetan batizmu.
Foufoun, mane ida naran Ataa dada an atu hetan batizmu. Haree toʼok saida mak fó fiar ba nia atu halo hakat importante neʼe.
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
