GIHEVBULO 47

Ina u dongide gu bhabhatiswa?

WOMBISA

U hevbude silo nya singi khu Jehovha avba nya gihevbulo gyago nya Bhibhiliya. Adzina u vbindrugedzide silo nyo khaguri gasi u vbanya khesi u si hevbudego. Ambari ulolo, adzina gyomo gi gu tandregisago gu dzi hendzeledza ga Jehovha ni gu bhabhatiswa. Gihevbulo gegi gi na ganeya khu sigaradzo nyo khaguri nyo olovelege si tandregisago vathu gu bhabhatiswa ni esi u yedego gu gira gasi gu si pala.

1. Guti nyo vbohe hayi u yedego gu manega nago gasi u bhabhatiswa?

Gasi u bhabhatiswa, gu vbwetega u manega ni ‘guti nya lisine.’ (1 Thimoti 2:4) Isoso kha si thuli gu khiso gu vbwetega uti mihlamulo nya siwudziso satshavbo nya Bhibhiliya gasi u bhabhatiswa. Ambari ava va bhabhatisidwego gale va ngu simama gu hevbula khu Jehovha. (Vakolosi 1:9, 10) Ganiolu, gu vbwetega uti sihevbudzo nya litshina nya Bhibhiliya. Madhota ma na gu phasa gu wona gu khuwe dongide gu bhabhatiswa mwendro ne.

2. Khu sevbini silo khaguri u yedego gu gira gasi u bhabhatiswa?

Nu si bhabhatiswi, gu vbwetega u ‘dzi laya u vbindrugedza mavbanyelo.’ (Leri Mithumo 3:19.) Isoso so thula gu dzi laya khu monyo watshavbo ga sighoho u giridego u bwe u lomba gu divaledwa khu Jehovha. So thula gambe gu diga mavbanyelo nyo vivbe u bwe u dzi emiseya gu vbanya khu ndziya yi tsakisago Nungungulu. Vbavbandze nya isoso, gu vbwetega u manega mitshanganoni ni gu tshumayela gumogo ni libandla.

3. Khu ginani u gu mba yela gu dzumeleya hwanga wu gu digisa gu bhabhatiswa?

Vathu nyo khaguri va ngu thava gu khavo kha va na nga si kodza gu gira satshavbo va mu tumbisidego Jehovha. Lisine gu dzimbe dzitepo u na tshuka u gira sihoso, kholu ambari vama ni vanyamayi nyo tumbege va khumbugwago omu nya Bhibhiliya va giride sihoso. Ganiolu, Jehovha a ngu dziti gu khuye vakhozeyi vaye va na va gira sihoso. (Leri Ndzimo 103:13, 14.) Uye a ngu tsaka ngudzu khu gu gu wona nu dzi garadza! A na gu phasa. Gasi gu ganeya lisine, Jehovha a ngu hi tiyisegisa gu khethu gimwalo gi na si “kodzago gu hi hambanisa ni lihaladzo [laye].” — Varoma 8:38, 39.

GIRA WUGEVISISI NYO ETE

Wona edzi u nga palago khidzo ni gevbini gigaradzo gi gu himbedzeyago gu bhabhatiswa khu guti gwadi Jehovha ni gu dzumeya giphaso gyaye.

4. Guti gwadi Jehovha

U yede gu muti kala hayi Jehovha nu si bhabhatiswi? Gu vbwetega u muti gwadi nyo bwe u mu haladza u bwe u vbweta gu mu tsakisa. Sistirini VHIDHYU gasi mu wona edzi sihevbuli nya Bhibhiliya si girago khidzo isoso mafuni gwatshavbo. Khavbovbo, mu bhula khu siwudziso sesi.

VHIDHYU: Ndziya yi yiswago gu bhabhatiswatunu (3:56)

Kha nga hi si wonidego omu nya vhidhyu, ginani gi phasidego vathu nyo khaguri gu dzi dongiseya gu bhabhatiswa?

Lerini Varoma 12:2, mu vbedza mu bhula khu siwudziso sesi:

Ina somo sihevbudzo nyo khaguri nya Bhibhiliya u si kanakaneyago, mwendro wo kanakana gu khuwe esi Dzifakazi dza Jehovha dzi hevbudzago lisine?
Abari gu ina, ginani u yedego gu gira?

5. Pala ni gevbini gigaradzo gi gu himbedzeyago gu bhabhatiswa

Hatshavbo hi ngu tshangana ni sigaradzo tepo hi hungago gu dzi hendzeledza ga Jehovha hi bwe hi bhabhatiswa. Gasi gu wona giyeyedzo nyo khaguri, sistirini VHIDHYU, mu vbedza mu bhula khu siwudziso sesi.

VHIDHYU: Gu haladza Jehovha si ngu hi phasa gu pala sigaradzo (5:22)

Kha nga hi si wonidego omu nya vhidhyu, sigaradzo muni esi Narangerel gu vbwetegidego gu a si pala gasi a thumeya Jehovha?
Gu haladza Jehovha si mu phaside kharini gu pala sigaradzo soso?

Lerini Mavingu 29:25 ni 2 Thimoti 1:7, mu vbedza mu bhula khu giwudziso gegi:

Ginani gi hi ningago gutiya-hwambo gasi hi pala sigaradzo?

6. Tumba giphaso gya Jehovha

Jehovha a na gu phasa gu mu tsakisa. Sistirini VHIDHYU, mu vbedza mu bhula khu giwudziso gegi.

VHIDHYU: Jehovha a na gu phasa (2:50)

Kha nga u si wonidego omu nya vhidhyu, ginani gi nga ba gi himbedzeya gihevbuli nya Bhibhiliya gu bhabhatiswa?
Ginani a gi hevbudego gi mu phasidego gu tumba ngudzu Jehovha?

Lerini Isaya 41:10, 13, mu vbedza mu bhula khu giwudziso gegi:

Ginani gi na gu phasago gu tiyisega gu khuwe u na si kodza gu gira esi u nga tumbisa tepo u nga dzi hendzeledza?

7. Engedzeya gu mu bonga Jehovha khu lihaladzo a gu yeyedzago

Tepo u yago u dundrugeya khedzi Jehovha a gu haladzago khidzo, u na engedzeya gu mu bonga nigu monyo wago wu na ndragandraga khu gu vbweta gu mu thumeya. Lerini Ndzimo 40:5, mu vbedza mu bhula khu giwudziso gegi:

Khu yavbini makategwa ya Jehovha u ma tsakeyago ngudzu?

Muprofeti Jeremiya a di gu haladza Jehovha, a gola Lito laye, a bwe a ninga ngudzu lisima gu thumeya Jehovha. Jeremiya a di khuye: “Magana yago, ayo ma di khala guhodza gwangu; ayo ma di khaIa litsako ni gunengela nya monyo wangu, kholu nya gu ranwa khu Iina Iago, uwe [Jehovha Nungungulu].” (Jeremiya 15:16) Hlamula siwudziso sesi:

Khu ginani li gu lithomo nya likhongolo gu khala Fakazi ya Jehovha?
U ngu dzina gu bhabhatiswa kha nga Fakazi ya Jehovha?
Ina gyomo gi gu himbedzeyago gu bhabhatiswa?
Wo si wona kharini, ginani u yedego gu gira gasi u ninganedwa khu gu bhabhatiswa?