MATAUPU 47
E a ko Toka Koe ke Papatiso?
Ko oti ne tauloto koe ki mea e uke e uiga ki a Ieova e auala i tau akoga faka-te-Tusi Tapu. Kāti e isi ne fakama‵fuliga ko oti ne fai ne koe ke fakagalue aka au mea ne tauloto. Kae kāti e isi se mea e fakatalave ne ia koe mai te faiga o tau tukuatuga ki a Ieova kae papatiso. Ka sau‵tala tatou i te mataupu tenei ki nisi fakalavelave kolā e mafai o fakatalave ei se tino mai te papatiso mo te auala ke manumalo koe i ei.
1. E pefea te uke o au mea e ‵tau o iloa a koi tuai koe o papatiso?
Ke mafai o papatiso, e ‵tau o “iloa tonu ne [koe] a te munatonu.” (1 Timoteo 2:4) E se fakauiga i ei me e ‵tau o iloa ne koe a tali ki fesili katoa mai te Tusi Tapu a koi tuai koe o papatiso. Ke oko foki loa ki Kelisiano kolā ko leva ne papatiso, koi tauloto eiloa latou. (Kolose 1:9, 10) Kae e manakogina ke isi sou malamalama i akoakoga kamata i te Tusi Tapu. Ka fesoasoani atu a toeaina ke iloa ne koe me ko lava tou iloa io me ikai.
2. Ne a nisi mea e ‵tau o fai a koi tuai o papatiso?
A koi tuai koe o papatiso e ‵tau mo koe o ‘salamō kae ‵fuli mai.’ (Faitau te Galuega 3:19.) E fakauiga i ei me ko salamo katoatoa koe ki au agasala katoa ne fai i aso mua, kae ko akai koe ki a Ieova ke fakamagalo koe. Ko oti foki ne ‵teke atu koe ki amioga ma‵sei kae fakaiku aka ke ola i se auala telā e fakafiafia atu ki te Atua. E se gata i ei, ko oti foki ne kau atu koe ki polokalame a te fakapotopotoga mai te kau atu ki fakatasiga kae talai atu e pelā me se tino talai e seki papatiso.
3. Kaia e se ‵tau o talia ne koe a te mataku ke fakatalave ei koe?
E ma‵taku a nisi tino i te mea ma se mafai o fakataunu te lotou tautoga ne fai ki a Ieova. E tonu, i nisi taimi ka fai ne koe a mea ‵se e pelā eiloa mo nisi tāgata mo fāfine fakamaoni i te Tusi Tapu. Kae e se fakamoemoe a Ieova ke ‵lei katoatoa ana tino tapuaki. (Faitau te Salamo 103:13, 14.) E fiafia a ia māfai e fai ne koe te ‵toe mea ‵lei! Ka fesoasoani atu a ia ki a koe. A te ‵tonuga loa, e fakatalitonu mai a Ieova ki a tatou, me e seai se mea “ka mafai o ‵vae ne ia tatou kea‵tea mai [tena] alofa.”—Faitau te Loma 8:38, 39.
KELI MALOSI IFO
Onoono ki auala e mafai o manumalo koe i so se mea e fakatalave ei koe ke papatiso mai te taumafai ke iloa faka‵lei a Ieova kae talia tena fesoasoani.
4. Taumafai ke iloa ‵lei ne koe a Ieova
E ‵tau o pefea te iloa ‵lei ne koe a Ieova a koi tuai o papatiso? E ‵tau o lava ‵lei te iloa o koe ke fakamalosi aka ei tou alofa mo tou manakoga ke fakafiafia a ia. Pei te VITIO ke lavea ne koe a mea ne fai ne tino a‵koga i te Tusi Tapu i te lalolagi ke mafai o fai penā. Ko sau‵tala ei ki te fesili tenei.
-
I te vitio, ne a mea ne fesoasoani atu ki nisi tino ke fakatoka mō te papatisoga?
Faitau te Loma 12:2, ko sau‵tala ei ki fesili konei:
-
E mata, e isi ne ou manatu fakalotolotolua e uiga ki mea e akoako mai i te Tusi Tapu, io me e akoako atu ne Molimau a Ieova a te munatonu?
-
Kafai e isi, ne a au mea e mafai o fai?
5. Ke manumalo i mea e mafai o fakatalave ei koe mai te papatiso
Kafai ko fakaiku aka ke tuku atu tatou ki a Ieova kae papatiso, e fe‵paki tatou katoa mo tulaga faiga‵ta. Ke onoono ki se fakaakoakoga, pei te VITIO, ko sau‵tala ei ki fesili konei.
-
I te vitio, ne a tulaga faiga‵ta ne ‵tau o fakatakavale ne Narangerel ko te mea ke tavini atu a ia ki a Ieova?
-
Ne fesoasoani atu pefea te alofa ki a Ieova ke mafai ne ia o fakatakavale a tulaga faiga‵ta konā?
Faitau te Faataoto 29:25 mo te 2 Timoteo 1:7, ko sau‵tala ei ki te fesili tenei:
-
E maua pefea ne tatou a te loto malosi ke fakatakavale a tulaga faiga‵ta?
6. Talitonu ki te fesoasoani o Ieova
Ka fesoasoani atu a Ieova ke mafai ne koe o fakafiafia a ia. Pei te VITIO, ko sau‵tala ei ki fesili konei.
-
I te vitio, se a te mea ne fakatalave i ei a te tino akoga i te Tusi Tapu mai te papatiso?
-
Ne a ana mea ne tauloto kolā ne fesoasoani atu ke fakamalosi aka tena talitonu ki a Ieova?
Faitau te Isaia 41:10, 13, ko sau‵tala ei ki te fesili tenei:
-
Kaia e mafai ei o loto talitonu koe me e mafai ne koe o fakataunu tau tautoga i te taimi ne fai ei tau tukuatuga?
7. Ke momea aka tou loto fakafetai ki te alofa o Ieova
Ko te uke o ou taimi e mafaufau ki te lasi o te alofa o Ieova mō koe, ko te lasi foki o tou loto fakafetai mo tou fia tavini atu ki a ia ki te se-gata-mai. Faitau te Salamo 40:5, ko sau‵tala ei ki te fesili tenei:
-
Ne a fakamanuiaga mai i a Ieova e loto fakafetai malosi koe ki ei?
Ne alofa te pelofeta ko Ielemia ki a Ieova mo tena muna, kae ne loto fakafetai malosi a ia ki te tauliaga ke tauave ne ia te igoa o Ieova. Ana muna: “Tau muna ki a au e pelā me ko te fiafiaga mo se mea fakafiafia o toku loto, me ko oti ne fakaigoa tou igoa ki a au, e Ieova te Atua.” (Ielemia 15:16) Tali mai a fesili konei:
-
Kaia e fai ei pelā me se tauliaga fakapito ke fai mo fai se Molimau a Ieova?
-
E a, e manako koe ke papatiso e pelā me se tokotasi o Molimau a Ieova?
-
E mata, e isi se mea e fakatalave ei koe?
-
Se a tau faka‵tau, ne a au mea e ‵tau o fai ke fakataunu te fakamoemoega ke papatiso?
MEA E FAI MAI NE NISI TINO: “Au e mataku i te mea ma se mafai ne au o tausi te tautoga e ‵tusa mo taku papatisoga.”
-
E mata, e penā ou lagonaga?
MANATU AOGA
Mai te fesoasoani o Ieova, e mafai o manumalo koe i so se mea e fakatalave ei tau papatisoga.
Fesili
-
E pefea te uke o au mea e ‵tau o iloa i te Tusi Tapu ke mafai koe o papatiso?
-
Ne a fakama‵fuliga e mafai o fai ne koe a koi tuai koe o papatiso?
-
Kaia e se ‵tau ei o fakatalave koe ne te mataku?
NISI FAKAMATALAGA
Mafaufau me se a te mea e ‵tau o fakavae ki ei tau fakaikuga ke papatiso.
“E Mata, Koe ko Toka o Papatiso?” (Te Faleleoleo Maluga, Mati 2020)
Tauloto ki auala e mafai o manumalo koe i nisi tulaga faiga‵ta kolā e mafai o fakatalave ei koe.
“Ne a Mea e Taofi ei Au Mai te Papatiso?” (Te Faleleoleo Maluga, Mati 2019)
Onoono ki te auala ne manuia ei se tagata i nisi tulaga faiga‵ta kolā ne fakatalave ei a ia mai te papatiso.
Muamua la, ne fakatalave a Ataa ke papatiso. Onoono ki te mea ne fakatalitonu atu ki a ia ke fai ne ia te ‵toe mea tāua tenei.
E Mata, e ‵Tau Eiloa o Maua ne Au a Fakamanuiaga Konei? (7:21)
