UYONO 47
Wo Muegbe Wo Vwo Bromaphiyame Re?
Wo yono erọnvwọn buebun kpahen Jihova womarẹ uyono ri Baibol na re. Ọkiọvo, wo ru ewene evo rere wọ sa vwọ vwẹ obo wo yonori vwo ruiruo. Ẹkẹvuọvo, ọ sa dianẹ emu ọvo nẹrhẹ ọ bẹn wọ vwọ vwomakpahotọ kẹ Jihova ji bromaphiyame. Vwẹ uyono nana, a cha fuẹrẹn erọnvwọn evo re sa nẹrhẹ ọ bẹn e vwo bromaphiyame vẹ obo re se vwo phio kparobọ.
1. Bro erianriẹn yen wọ guọnọre wo ki se bromaphiyame?
Wo ki se bromaphiyame, ofori nẹ wo vwo “erianriẹn rẹ uyota na.” (1 Timoti 2:4) Ọ dia ọnana mudiaphiyọ nẹ wọ cha riẹn ẹkpahọnphiyọ rẹ enọ eje rẹ ihwo nọ kpahen Baibol na tavwen wo ki bromaphiyame-e. Otoro uche ikpe rẹ ohwo bromaphiyame re-e, o ji yono. (Kọlose 1:9, 10) Ẹkẹvuọvo, ofori nẹ wọ riẹn iyono ri Baibol evo kiriguo. Ekpako na cha chọn wẹ uko vwọ riẹn sẹ wọ nabọ vwo erianriẹn kiriguo nana re.
2. Ọrhọ yen erọnvwọn evo wo che ru tavwen wo ki bromaphiyame?
Wo ki bromaphiyame, ofori nẹ wo “kurhẹriẹ.” (Se Iruo Rẹ Iyinkọn Na 3:19.) Ọnana mudiaphiyọ nẹ wọ viẹ idiekpọvwẹ kpahen imwemwu wo ru wanre, wọ je yare evwoghovwo mie Jihova re. Wọ je kẹnoma kẹ erharhe rẹ iruemu, ji choma wo vwo yerin akpọ nene ọhọre ri Jihova re. Vwọba, wo kpo uyono re ji vwomaba iniọvo rẹ ukoko na vwo kpo aghwoghwo kerẹ oghwoghwota ro ji bromaphiyame-e.
3. Diesorọ wo vwo je siomauko fikirẹ oshọ?
Oshọ mu ihwo evo nẹ ayen che se ru oborẹ ayen ve kẹ Jihova-a. Ọyen uyota nẹ ọke evo, wo che ru chọ kerẹ idibo ri Jihova ri fuevun vwẹ ọke awanre. Ẹkẹvuọvo, Jihova rhẹro rẹ ogbagba mie ihwo re ga-a. (Se Une Rẹ Ejiro 103:13, 14.) Oma vwerhọn wo de ru asan rẹ ẹgba wẹn muru! Ọ cha chọn wẹ uko. Vwọrẹ uyota, Jihova ve kẹ avwanre nẹ emuọvo cha sa “hẹriẹ avwanre nẹ ẹguọnọ [rọye-en].”—Se Rom 8:38, 39.
HIẸ KODO
Mrẹ obo wo se vwo phi erọnvwọn re nẹrhẹ ọ bẹn wo vwo bromaphiyame kparobọ womarẹ wo vwo vughe Jihova ji rhiabọreyọ ukẹcha rọyen.
4. Nabọ riẹn Jihova phiyọ
Mavọ yen ofori nẹ wọ riẹn Jihova te tavwen wo ki bromaphiyame? Ofori nẹ wo vughe te ẹdia wo de vwo ẹguọnọ rọyen ji guọnọ ru ọhọre rọyen. Hworo IVIDIO na wọ vwọ mrẹ oborẹ ihwo ra vwẹ Baibol yono vwẹ akpọneje vwo ru ọtiọyen re. Ovwan ta ota kpahen onọ ro nenire.
-
Vwevunrẹ ividio na, die yen chọn ihwo evo uko vwo muegbe vwọ kẹ omaebrophiyame?
Se Rom 12:2, ovwan ta ota kpahen enọ nana:
-
Wo vwo iroro ivivẹ kpahen oborẹ Baibol na yonori yẹrẹ sẹ Iseri ri Jihova yono uyota na?
-
Ọ da dia ọtiọyen, die yen wo se ru kpahọn?
5. Phi ebẹnbẹn re sa nẹrhẹ ọ bẹn wo vwo bromaphiyame kparobọ
E che hirharoku egbabọse sansan ọke re de brorhiẹn ra vwọ vwomakpahotọ kẹ Jihova ji bromaphiyame. Wọ vwọ mrẹ udje ọvo, hworo IVIDIO na, ovwan ta ota kpahen onọ ro nenire.
-
Vwevunrẹ ividio na, egbabọse vọ yen Narangerel che phikparobọ ọ ke sa ga Jihova?
-
Mavọ yen ẹguọnọ ri Jihova vwọ chọn uko vwo phi egbabọse yena kparobọ?
Se Isẹ 29:25 kugbe 2 Timoti 1:7, ovwan ta ota kpahen onọ nana:
-
Die yen kẹ avwanre uduefiogbere re se vwo phi egbabọse kparobọ?
6. Vwẹroso ukẹcha ri Jihova
Jihova cha chọn wẹ uko vwo ru ọhọre rọyen. Hworo IVIDIO na, ovwan ta ota kpahen onọ ro nenire.
-
Vwevunrẹ ividio na, die yen nẹrhẹ ọ bẹn kẹ ohwo ra vwẹ Baibol yono na o vwo bromaphiyame?
-
Die yen o yonori rọ chọn rọ uko vwọ bọn ẹroẹvwọsuọ ro vwo kpahen Jihova gan?
Se Aizaya 41:10, 13, ovwan ta ota kpahen onọ nana:
-
Diesorọ o vwo muwẹro nẹ wo se ru ive rẹ omaebrophiyame wẹn gba?
7. Ru ọdavwaro wo vwo kpahen ẹguọnọ ri Jihova ganphiyọ
Wo vwo roro kpahen oborẹ Jihova vwo ẹguọnọ wẹ te ye, jẹ ọdavwaro vẹ owenvwe wọ vwọ ga ganphiyọ. Se Une Rẹ Ejiro 40:5, ovwan ta ota kpahen onọ nana:
-
Ebruphiyọ ri Jihova vọ yen ma da wẹ aro?
Ọmraro Jerimaya vwo ẹguọnọ ri Jihova vẹ Ota rọyen, o vwo ọdavwaro okokodo kpahen uphẹn ro vwo soseri kpahen odẹ ri Jihova. Ọ da ta: “Eta wẹn da dia aghọghọ kẹ vwẹ kugbe omavwerhovwẹ kẹ ubiudu mẹ; kidie a vwẹ odẹ wẹn se vwe nure, E Ọrovwohwo, Ọghẹnẹ.” (Jerimaya 15:16) Kpahenphiyọ enọ nana:
-
Diesorọ ọ vwọ dia uphẹn oghẹresan ra vwọ dia Oseri ri Jihova?
-
Wọ guọnọ bromaphiyame kerẹ Oseri ri Jihova?
-
O vwo obo re da wẹ obọ jẹ?
-
Die wo rorori nẹ ofori nẹ wo ru wo se vwo yerin te ẹdia rẹ omaebrophiyame?
IHWO EVO TA: “Oshọ mu vwe nẹ mi che se ru obo ra guọnọ mie ohwo ro bromaphiyame re-e.”
-
Ọtiọyen wo rorori?
ỌDJẸKOKO
Womarẹ ukẹcha ri Jihova, wo se phi egbabọse eje ri churobọ si omaebrophiyame kparobọ.
Ẹrhomafuẹrẹn
-
Bro erianriẹn ri Baibol yen ofori nẹ wo vwo wo ki bromaphiyame?
-
Ewene vọ yen ofori nẹ wo ru tavwen wo ki bromaphiyame?
-
Diesorọ wo vwo je siomauko fikirẹ oshọ?
HIẸ GUỌNỌ
Mrẹ obo ro fori nẹ o mu we vwo brorhiẹn wo vwo bromaphiyame.
“Wo Muegbe Wo Vwo Bromaphiyame Re?” (Uwevwin Orhẹrẹ ri March 2020)
Yono obo wo se vwo phi oka rẹ egbabọse evo re sa da wẹ obọ ji kparobọ.
“Die Yen Cha Djẹ Vwẹ Omaebrophiyame?” (Uwevwin Orhẹrẹ ri March 2019)
Mrẹ oborẹ ọshare ọvo vwo phi egbabọse ọgangan ọvo kparobọ rere o se vwo bromaphiyame.
Vwẹ ẹsosuọ, ọshare ọvo re se Ataa siomauko vwọ kẹ omaebrophiyame. Mrẹ obo re chọn rọ uko vwọ jowọ ọghanghanre nana.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
