LESSON 47
You Don Ready to Baptize?
As you de study Bible, you don learn plenty things about Jehovah. E fit be say you don change some things for your life so that you fit do wetin you de learn. But something fit de make-am hard for you to give yourself to Jehovah and baptize. This lesson go talk about some things wey fit de make-am hard for person to baptize and wetin you fit do so that this things no go stop you.
1. How many things you suppose know for Bible before you baptize?
For you to baptize, you need to know “the correct truth.” (1 Timothy 2:4) This one no mean say you need to know the answers to all the questions wey people go ask you about Bible before you baptize. Even Christians wey don baptize for long time still de learn. (Colossians 1:9, 10) But you need to know the main things wey Bible de teach. If you no dey sure whether you don know enough things to baptize, ask the elders, they go help you.
2. Wetin be some things wey you need to do before you baptize?
Before you fit baptize, you must “repent and turn back.” (Read Acts 3:19.) This one mean say you really dey sorry for any bad thing wey you don do before and you beg Jehovah make e forgive you. You go still make up your mind to stop any bad thing wey you don de do before and start to live your life the way God want. And too, you go start to attend meeting and preach with the congregation.
3. Why you no need to allow fear stop you?
Some people de fear say they no go fit do wetin they don promise Jehovah. The truth na say, sometimes, you go make mistakes, even faithful servants of God for past wey Bible talk about make mistakes. Jehovah no de expect make e servants dey perfect. (Read Psalm 103:13, 14.) When you do your best, Jehovah go dey happy. E go help you. Jehovah promise us say “nothing go fit separate us from the love wey [e] get for us.”—Read Romans 8:38, 39.
LEARN MORE THINGS
See how you fit try hard to fight anything wey fit stop you to baptize as you de learn more about Jehovah and de accept the help wey e de give you.
4. Learn more about Jehovah
How many things you need to know about Jehovah before you baptize? You need to learn plenty things wey go make you love Jehovah and want do wetin e want. Play the VIDEO to see how Bible students for the whole world don do this one. After, talk about the question for under.
-
For the video, wetin help some people to dey ready to baptize?
Read Romans 12:2, and talk about this questions:
-
You get any doubt about wetin Bible de teach or you de doubt whether Jehovah Witness them de teach the truth?
-
If you de doubt, wetin you fit do about-am?
5. Try hard make anything no stop you to baptize
All of us de face problem when we decide to give our life to Jehovah and baptize. To see one example, play the VIDEO, and talk about the questions for under.
-
For the video, which problems Narangerel face as e try to serve Jehovah?
-
How love for Jehovah help Narangerel to face this problems?
Read Proverbs 29:25 and 2 Timothy 1:7, and talk about this question:
-
Wetin de give us the strong heart to face problems?
6. Trust the help wey Jehovah de give
Jehovah go help you make you do the correct thing. Play the VIDEO, and talk about the questions for under.
-
For the video, why the Bible student no want baptize?
-
Wetin help the Bible student to make e trust for Jehovah strong?
Read Isaiah 41:10, 13, and talk about this question:
-
Why you dey sure say you go do the thing wey you promise when you give your life to Jehovah?
7. Really show say you dey happy for the love wey Jehovah get for you
If you continue to think about how Jehovah love you, na so you go continue to thank Jehovah and go want serve Jehovah forever. Read Psalm 40:5, and talk about this question:
-
Which things Jehovah don do for you wey you really want thank Jehovah for?
Prophet Jeremiah be love Jehovah and e message, and e really show say e dey happy to be servant of Jehovah. E talk say: “Your word really make me happy and make my heart glad, they don use your name call me, O Jehovah.” (Jeremiah 15:16) Answer this questions:
-
Why e be say to be Jehovah Witness na special honor?
-
You go like baptize as Jehovah Witness?
-
Anything de stop you make you no baptize?
-
Wetin you think say you fit do so that you go fit baptize?
SOME PEOPLE DE TALK SAY: “I de fear say I no go fit do everything wey I go promise when I baptize.”
-
Na so you de feel?
WETIN THIS LESSON TEACH
With help from Jehovah, you fit face any problem wey fit stop you make you no baptize.
Wetin You Don Learn
-
How many things you suppose know for Bible before you baptize?
-
Which things you fit change for your life before you go fit baptize?
-
Why you no need to allow fear stop you?
LEARN OTHER THINGS
Learn about the main reason why you fit choose to baptize.
“You Don Dey Ready to Baptize?” (The Watchtower, March 2020)
Learn how you fit face some problems wey fit de hold you make you no baptize.
“Wetin De Hold Me Make I No Baptize?” (The Watchtower, March 2019)
See wetin one man do with some big problems wey e de face so that e fit baptize.
One man wey e name na Ataa no be want baptize. See wetin help Ataa make e later baptize.
You May Also Like
QUESTIONS WEY PEOPLE DE ASK
How the Bible Study Wey Jehovah Witness De Do With People De Be?
You fit use any Bible translation when you de do free Bible study with Jehovah Witness. You fit tell all your family or friends to join you for the study.
