ROMNHORÉ 47

E tsada hã oto a hã da te aiꞌrãtiꞌi da.

RURUꞌU

Marĩ ahö na ma tô ĩwaihu Jeová ãma Ropotoꞌwai mreme na romnhoré na. Ãté marĩ aihöimanadzém na ma tô ĩtsaprĩ ĩwaihuꞌudzéb dzarina. Tadzahã marĩ dzarina te ĩrotsaꞌra ĩtsadaiꞌõ na hã Jeová ma atsina ropitsutu da duré da te aiꞌrãtiꞌi da. Ãhã romnhoré na wa dza ꞌmadöꞌö dzaꞌra ni nimahã marĩ norĩ ãté te te aiwi ĩroꞌwaꞌrutu waihuꞌu petse dzaꞌra hã da te aiꞌrãtiꞌi tõ da duré e niha te dza tsada ꞌre aihöimana mo.

1. E uburé Ropotoꞌwai mreme na ĩwaihuꞌu petse da tsi da te aiꞌrãtiꞌi wana ré.

Da te aiꞌrãtiꞌi da, ĩmorĩꞌrada ĩwaihuꞌu da tsi ‘roti tô tsena uptabi.’ (1 Timóteo 2:3, 4) Da te aiꞌrãtiꞌi da aima ĩꞌrudzahi õ di tsadaꞌöbö waihuꞌu petse da uburé da te ĩꞌatsadanharĩ dzaꞌra dzé Ropotoꞌwai mreme na. Duréi da te ꞌre ĩꞌrãtiꞌi dzaꞌra mono te te ãma ꞌre udzutsi dzaꞌra Jeová ãma romnhoré na. (Colossenses 1:9, 10) Tadzahã ĩwaihuꞌu da tsi Ropotoꞌwai mreme nhimirowahudu danhipai u ĩpire norĩ. Daꞌmadöꞌöꞌwa norĩ te dza aipawaptob dzaꞌra uburé ĩwaihuꞌu dzô da te aiꞌrãtiꞌi da.

2. E marĩ norĩ ĩꞌmanharĩ da tsi da te aiꞌrãtiꞌi wana ré.

Da te aiꞌrãtiꞌi wana ré, a hã ‘te dza aiwatsété na atsiꞌruiwapa ... ꞌRe ĩhöimana uꞌötsi mono u apö aipiꞌra da.’ (Tsõré na Atos 3:19.) Taha dzarina te dza atsiꞌruiwapari pe uburé marĩ ĩwatsédé duréihã ĩꞌmanharĩdzém na duré te dza ĩwaptẽ Jeová wi aiwatsédé te te aima pari da. Taha dzarina te atsima ĩwẽ duré Jeová ma ĩwẽ dzarina ꞌre aihöimana mono da duré dza ĩwẽꞌõ na hã uburé te te tãma ĩrowẽ õ. Duré datsiꞌrãꞌõtõ norĩ natsi ĩꞌmadöꞌö da tsi duré dama ĩroꞌmahörö da tsi watsitsãnawã norĩ me.

3. E marĩ wa, aipahi tõ da tsi da te aiꞌrãtiꞌi da.

Niꞌwam norĩ te tipahi dzaꞌra te te ꞌmanharĩ dzaꞌra mono õ dzô uburé Jeová ma te te tsina ĩropitsutu dzaꞌra dzarina. Ĩꞌuptabi na hã nimahã na te dza ãma ĩꞌupa, aibö duré piꞌõ ĩtsimidzadzei petse norĩ hã duréihã Bíblia te te ĩwatsuꞌu dzaꞌra te te ãma ĩꞌupa dzaꞌra ne. Jeová ma waihuꞌu petse di tãma ĩromhuriꞌwa norĩ ĩhöimana upa dzaꞌra na. (Tsõré na Salmo 103:13, 14.) Tãma robdze ti tsada ꞌre atsiptete mono wamhã tãma rowẽ da! Duré te dza aipawapto. Tô tsena Jeová te wama ropitsutu dzaꞌra ‘uburé marĩ hã wadzada ꞌre ĩhöimana dzaꞌra mono dzém hawi, ĩtsimidzawi petse dzé hã te te wawi ꞌre ĩꞌadzani mono da hã, mare di.’ — Tsõré na Romanos 8:38, 39.

WAIHUꞌU DURÉ

Jeová waihuꞌu petse wamhã duré ĩtsimipawaptobdzé atsima wẽ wamhã, atsiptede te dza aima ꞌre höimana ãma aiꞌuté da uburé marĩ te te aiwi ĩroꞌwaꞌré na da te aiꞌrãtiꞌi tõ da.

4. Jeová waihuꞌu wẽ na

E niha Jeová ĩwaihuꞌu wẽ da tsi da te aiꞌrãtiꞌi wana ré. Ĩwaihuꞌu petse da tsi Jeová ꞌre tsawi mono da duré tãma ꞌre rowẽ mono da. ꞌMadöꞌö aba ĨROPODO waihuꞌu da Bíblia na romnhoréꞌwa norĩ Tiꞌai mono bö te te ꞌre ĩꞌmanharĩ dzaꞌra mono dzé Jeová te te waihuꞌu wẽ dzaꞌra da. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

ĨROPODO: E niha niꞌwam norĩ ma tô tsina uwaimrami dzaꞌra daꞌrãti. (3:56)

Ĩropoto na, e marĩ ma tô pawapto niꞌwam norĩ tsitsaꞌra wẽ dzaꞌra da daꞌrãtiꞌi da.

Atsiré tsõré aba Romanos 12:2. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

E te aiwawã Ropotoꞌwai mreme te te ĩrowahutudzém na. E te aiwawã Jeová Watsuꞌuꞌwa norĩ rowahutu uptabi na te te dama ĩrowahutu dzaꞌra na hã.
Marĩ na aiwawã wamhã, e marĩ te dza ĩꞌmanha.

5. Ãma aiꞌuté na tsiwaꞌru marĩ te te aiwi ĩroꞌwaꞌré na da te aiꞌrãtiꞌi tõ da

Ropire aihĩni wa norĩ ma te ꞌre höimana wa te watsima wẽ dzaꞌra wamhã Jeová ma wa te watsina ropitsutu dzaꞌra da duré da te waꞌrãtiꞌi dzaꞌra da. Waihuꞌu aba da piꞌõ tsô ĩwatobro watsuꞌu ꞌmadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

ĨROPODO: Ropire na ma tô ãma aiꞌuté Jeová dzawi dzarina (5:22)

Ĩropoto na, e mahã ropire norĩ na piꞌõ ma tô ãma aiꞌuté Jeová ma te te romhuri da.
E niha piꞌõ nhimidzawidzé Jeová ãma ma tô pawapto ropire norĩ na te te ãma aiꞌuté da.

Atsiré tsõré aba Provérbios 29:25 duré 2 Timóteo 1:7. Taha parimhã atsima robdzanhamri aba ãhã dadzadanharĩ ãma piꞌrebamhã:

E ma hawimhã wanhibꞌru ropire na wa te aiꞌuté dzaꞌra da.

6. Umnhatsi Jeová nhimipawaptobdzé

Jeová te dza aipawapto tãma rowẽ da. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

ĨROPODO: Jeová te dza aipawapto (2:50)

Ĩropoto na, e marĩ te aré tiwi roꞌwaꞌré Bíblia na romnhoréꞌwa da te ꞌrãtiꞌi da.
E marĩ ma tô pawapto Jeová te te umnhatsi petse da.

Atsiré tsõré aba Isaías 41:10, 13 TNM. Taha parimhã atsima robdzanhamri aba ãhã dadzadanharĩ ãma piꞌrebamhã:

Jeová ma atsina ropitsutu wamhã, e marĩ dzarina aima waihuꞌu petse di dza atsimiropitsutudzé tãma ãma ĩꞌuwaimrami waihuꞌu petse na hã.

7. Tsada ꞌre atsiptete mono höiꞌré da atsima ĩrowẽ na hã Jeová nhimidzawidzém na

Rotsaꞌrata wamhã Jeová nhimidzawi dzaꞌẽtẽ dzém na aiꞌãma, te dza atsima ĩwẽ tãma höiꞌré da ãma atsima ĩrowẽ na hã duré atsima ĩwẽ na hã tãma ꞌre romhuri uꞌötsi mono da. Atsiré tsõré aba Salmo 40:5. Taha parimhã atsima robdzanhamri aba ãhã dadzadanharĩ ãma piꞌrebamhã:

E mahã Jeová nhoprubdzé aima danhipai u ĩwẽ.

Roꞌmahörö ꞌrata ꞌwa Jeremias ma, tsawi petse uptabi di Jeová duré Ĩmreme hã. Duré tãma rowẽ uptabi di Jeová ma romhuriꞌwai wa. Jeremias te tinha: “Duré aimreme hã ma tô ĩ̱ma wadze rowẽ duré robdze ĩ̱pẽꞌẽ ma, atsitsi te dama ãma ropéi wa.” (Jeremias 15:16 TNM) Tsadaꞌöbö ãhã dadzadanharĩ norĩ hã: