LIJIGANYO 47

Ana Ali Ŵakoseka Kubatisidwa?

ALOLELE

Pakwikanaga apano alijiganyisye yindu yejinji yakwamba Yehofa kupitila mu kulijiganya kwawo Baibulo. Mwangakayichila achenjilesoni yindu yine paumi wawo mwakamulana ni yakulijiganya. Nambope komboleka kuti pana yindu yine yayikwalepelekasya kulipeleka kwa Yehofa soni kubatisidwa. Mu lijiganyoli chitukambilane yindu yine yayikusiyalepelekasya ŵandu kubatisidwa soni yampaka atende kuti amalane nayo.

1. Ana akusosekwa kumanyilila yindu yejinji chamtuli mkanaŵe kubatisidwa?

Kuti abatisidwe akusosekwa ‘kumanyilila yakuwona yisyesyene’ yakwamba Mlungu. (1 Timoteo 2:4) Nambo yeleyi ngayikugopolela kuti mkanaŵe kubatisidwa akusosekwa kumanyilila kwanga kwa chiwusyo chilichose cha m’Baibulo champaka ŵandu ŵawusye. Atamose Aklistu ŵaŵabatisidwe kalakala akusapitilisya kulijiganya. (Akolose 1:9, 10) Nambo chakusosekwa mnope ni chakuti amanyilile yijiganyo yekulungwakulungwa ya m’Baibulo. Achakulungwa ŵa mumpingo chachakamuchisya kulola naga wawojo akumanyilila yijiganyo yekulungwakulungwayi.

2. Ana ni yindu yapi yakusosekwa kuyikuya mkanaŵe kubatisidwa?

Mkanaŵe kubatisidwa akusosekwa, ‘kupitikuka mtima . . . ni kuwujila kwa Mlungu.’ (Aŵalanje Masengo 3:19.) Yeleyi yikugopolela kuti akusosekwa kulitendela chanasa mnope payakulemwa yatesileje munyuma ni kumŵenda Yehofa kuti ŵakululuchile. Soni akusosekwa kusimichisya mumtima mwawo kuti chaŵambaleje ndamo syakusakala soni kuti chatendeje yindu yakumsangalasya Mlungu. Konjechesya pelepa, akusosekwa kutendaga yindu yalumo ni mpingo. Yindu yakwe yili kusongana soni kukamula nawo masengo gakulalichila mpela jwakulalichila jwangabatisidwa.

3. Ligongo chichi ngakusosekwa kogopa kubatisidwa?

Ŵandu ŵane akusatenda woga kuti ngasakombola kutenda yindu yiŵamsalile Yehofa. Yili yisyene kuti ndaŵi sine mpaka alemwesye yindu yine mpela muyaŵelagasoni ni ŵandu ŵakulupichika ŵa m’Baibulo. Nambo Yehofa jwangajembecheya kuti ŵakutumichila ŵakwe chatendeje yindu mwamlama. (Aŵalanje Salimo 103:13, 14.) Myoyo patukulingalinga kutenda yampaka tukombole, jwalakwe akusaŵa jwakusangalala, mwamti chachakamuchisya. Sonitu Yehofa akutusimichisya kuti pangali champaka ‘chitulekanganye uwe ni chinonyelo [chakwe].’—Aŵalanje Aloma 8:38, 39.

KULIJIGANYA YEJINJI

Alole yampaka atende kuti amalane ni yindu yakwalepelekasya kubatisidwa. Yindu yakwe yili kummanyilila chenene Yehofa soni kukunda kuti ŵakamuchisyeje.

4. Ammanyilile chenene Yehofa

Ana akusosekwa kummanyilila chamtuli Yehofa mkanaŵe kubatisidwa? Akusosekwa kummanyilila chenene kuti amnonyeleje soni atendeje yakusasaka jwalakwe. Alolele FIDIYO kuti amanyilile yatesile ŵakulijiganya Baibulo ŵane pachilambo chosope kuti ammanyilile chenene Yehofa. Kaneko akambilane chiwusyo achi.

FIDIYO: Yampaka Atende Kuti Abatisidwe (3:56)

Mwakamulana ni fidiyoji, ana ni chichi chachakamuchisye ŵandu ŵane kosechela kubatisidwa?

Aŵalanje Aloma 12:2, kaneko akambilane yiwusyo ayi:

Ana yajikusajiganya Baibulo soni yakuti ŵa Mboni sya Yehofa akusajiganya usyesyene, akusayikayichilaga?
Naga yili myoyo, ana akusosekwa kutenda chichi?

5. Kumalana ni yindu yampaka yalepelekasye kubatisidwa

Wosopewe patusagwile kulipeleka kwa Yehofa soni kubatisidwa, tukusasimana ni yakusawusya. Kuti alole chisyasyo panganiji, alolele FIDIYO, kaneko akambilane yiwusyo ayi.

FIDIYO: Kumnonyela Yehofa Kukusatukamuchisya Kumalana ni Yakusawusya (5:22)

Ana mu fidiyoji, Narangerel jwasosekwaga kulimbana ni yakusawusya yapi kuti akombole kumtumichila Yehofa?
Ana kumnonyela Yehofa kwamkamuchisye chamtuli jwalakwe kulimbana ni yakusawusyayi?

Aŵalanje Misyungu 29:25 soni 2 Timoteo 1:7, kaneko akambilane chiwusyo achi:

Ana ni chichi chachikusatukamuchisya kuti tukomboleje kumalana ni yakusawusya?

6. Akakayichilaga yakuti Yehofa mpaka ŵakamuchisye

Yehofa chachakamuchisya kuti amsangalasye. Alolele FIDIYO, kaneko akambilane yiwusyo ayi.

FIDIYO: Yehofa Cacakamucisya (2:50)

Mwakamulana ni fidiyoji, ana ni chichi chachamtendekasisye jwakulijiganya Baibulo kuti akabatisidwa?
Ana ŵalijiganyisye chichi chachamkamuchisye kuti amkulupilileje mnope Yehofa?

Aŵalanje Yesaya 41:10, 13, kaneko akambilane chiwusyo achi:

Ana ni chichi champaka chakamuchisye kuti akwanilisye yiŵamsalile Yehofa pandaŵi jiŵalipelekaga kwa jwalakwe?

7. Ayamichileje chinonyelo cha Yehofa

Tukusamyamichila mnope Yehofa soni tukusaŵa ŵakusachilila kumtumichila mpaka kalakala. Yeleyi yikusakomboleka naga tukusaganichisyaga mnope ya chinonyelo chakusatulosyaga. Aŵalanje Salimo 40:5, kaneko akambilane chiwusyo achi:

Ana akusamyamichila Yehofa pa yindu yapi yiŵatendele?

Jwakulochesya Yelemiya jwamnonyelaga mnope Yehofa soni maloŵe gakwe mwamti jwayamichilaga mnope kumanyika ni lina lyakwe. Jwalakwe jwatite: “Pinapikene maloŵe ga ŵalakwe nagapochele chenene, maloŵego gambele lukondwa ni kusangalala. Ŵalakwe AMBUJE Ŵamachiligosope, ngusamanyika ni lina lyawo.” (Yelemiya 15:16) Ajanje yiwusyo ayi:

Ligongo chichi uli upile wekulungwa mnope kuŵa jwa Mboni sya Yehofa?
Ana akusaka kubatisidwa mpela jwa Mboni sya Yehofa?
Ana pana chilichose champaka chalepelekasye kubatisidwa?
Ni akuganisya kuti mpaka atende yamtuli kuti abatisidwe?

YAKUSAŴECHETA ŴANDU ŴANE: “Ngogopa kuti pachinjibatisidwa chinjilepela kutenda yakusasaka Yehofa.”

Ana nombe nawo akwete nganisyo syelesi?

YALIJIGANYISYE

Yehofa mpaka ŵakamuchisye kumalana ni chilichose chakwalepelekasya kubatisidwa.

Yiwusyo Yakuwilisya

Ana akusosekwa kumanyilila yindu yejinji chamtuli yakwamba Baibulo kuti abatisidwe?
Ana akusosekwa kuchenga yindu yapi paumi wawo mkanaŵe kubatisidwa?
Ligongo chichi ngakusosekwa kogopa kubatisidwa?

Tumalisisye kulijiganya pa:

Akole Chakulinga Achi

Alolesoni mitwe jakuti “Ana Ngoseche Kulalichilaga Yimpepe ni Mpingo?” soni “Ana Ngoseche Kubatisidwa?” kumbesi kwa Mbali 4.

Yakulinga yine:

Your other goal