XOOK 47
¿Listoech wa utiaʼal a wokjaʼ?
Yoʼolal le baʼaxoʼob tsʼoʼok a kanik teʼ Bibliaoʼ tsʼoʼok a kʼaj óoltik Jéeoba. Tsʼoʼoleʼ maʼ xaaneʼ utiaʼal a beetik le baʼaxoʼob táan a kanikoʼ tsʼoʼok a beetik jujunpʼéel kʼeexoʼob ichil a kuxtal. Chéen baʼaleʼ yaan wal baʼax beetik maʼ a kʼubik a kuxtal tiʼ Jéeoba yéetel a wokjaʼeʼ. Teʼ xookaʼ yaan a kanik baʼax áant jujuntúul máakoʼob utiaʼal ka okjaʼanakoʼob yéetel yaan xan a kanik baʼax jeʼel u yáantkech utiaʼal ka okjaʼanakecheʼ.
1. ¿Kʼaʼabéet wa a wojéeltik tuláakal baʼax ku yaʼalik le Biblia utiaʼal a wokjaʼoʼ?
Utiaʼal ka okjaʼanak máakeʼ kʼaʼabéet ‹u kʼaj óoltik tubeel le jaajoʼ› (1 Timoteo 2:4). Pero leloʼ maʼ u kʼáat u yaʼal wa kʼaʼabéet a wojéeltik tuláakal baʼax ku yaʼalik le Bibliaoʼ. Tumen tak le máaxoʼob úuch okjaʼanakoʼoboʼ láayliʼ táan u kaanbaloʼobeʼ (Colosenses 1:9, 10). Le baʼaxoʼob kʼaʼabéet a kanikoʼ letiʼe baʼaxoʼob maas kʼaʼanaʼantak ku kaʼansik le Bibliaoʼ. Le ancianoʼoboʼ jeʼel u yáantkechoʼob a wojéelt wa tsʼoʼok a kanik le kaʼansajoʼoboʼ.
2. ¿Baʼaxoʼob unaj a beetik antes tiʼ a wokjaʼ?
Le Bibliaoʼ ku yaʼalik: «Kʼex a tuukuleʼex yéetel utskíint a kuxtaleʼex» (xok Hechos 3:19). Leloʼ letiʼe baʼax kʼaʼabéet a beetik antes tiʼ a wokjaʼoʼ. Chéen baʼaleʼ, ¿baʼax u kʼáat u yaʼal le tʼaanoʼobaʼ? U kʼáat u yaʼaleʼ ku yaatal a wóol yoʼolal le baʼaxoʼob kʼaastak a beetmoʼ yéetel ka kʼáatik tiʼ Jéeoba ka u perdonartech. U kʼáat xan u yaʼaleʼ ka pʼektik le baʼaxoʼob kʼaastakoʼ yéetel jach a kʼáat kuxtal jeʼex uts tu tʼaan Diosoʼ. Tsʼoʼoleʼ táan a bin tiʼ tuláakal le muchʼtáambaloʼoboʼ yéetel publicadorech.
3. ¿Baʼaxten maʼ unaj a sajaktal okjaʼiʼ?
Yaʼab máakoʼobeʼ saajkoʼob okjaʼ tumen ku tuklikoʼobeʼ maʼ kun páajtal u beetkoʼob le baʼax ken u prometertoʼob tiʼ Diosoʼ. Úuchjeakileʼ anchaj máaxoʼob meyajt Jéeoba tu beetoʼob baʼaloʼob maʼ maʼalobtakiʼ, maʼ xaaneʼ bey xan kun úuchultechoʼ. Pero kʼaʼajaktecheʼ Jéeobaeʼ u yojel maʼ perfectoʼoniʼ (xok Salmo 103:13, 14). Letiʼeʼ kiʼimak u yóol kéen u yil táan a tsʼáaik a wóol a beet baʼax uts tu tʼaan, tsʼoʼoleʼ yaan u yáantkech. Jéeobaeʼ ku yaʼalikeʼ mix baʼal «jeʼel u náachkuntkoʼon tiʼ u yaabilaj[eʼ]» (xok Romanos 8:38, 39).
UTIAʼAL A MAAS NAʼATIK
Yaan k-kanik kaʼapʼéel baʼal jeʼel u yáantkech utiaʼal a wokjaʼeʼ: a maas kʼaj óoltik Jéeoba yéetel a chaʼik u yáantkech.
4. Kʼaj óolt Jéeoba tubeel
¿Jach wa kʼaʼabéet a kʼaj óoltik Jéeoba utiaʼal ka páajchajak a wokjaʼ? Kʼaʼabéet, tumen beyoʼ yaan a maas yaabiltik yéetel yaan u taaktal a beetik baʼax uts tu tʼaan. Chaʼanteʼex le VIDEO utiaʼal a wilkeʼex baʼax áant yaʼab máakoʼob ku tsʼaʼabal xook tiʼob yéetel le Biblia utiaʼal ka okjaʼanakoʼoboʼ. Kéen tsʼoʼokkeʼ ka tsikbaltikeʼex lelaʼ:
-
Jeʼex t-ilil teʼ videooʼ, ¿baʼax áant jujuntúul máaxoʼob ku tsʼaʼabal xook tiʼob yéetel le Biblia utiaʼal u yokjaʼoboʼ?
Xokeʼex Romanos 12:2, kéen tsʼoʼokkeʼ ka tsikbaltikeʼex lelaʼ:
-
¿Yaan wa junpʼéel baʼax ku kaʼansik le Biblia maʼ ta jach creerkoʼ? Bix a wilik, ¿jaaj wa le baʼax ku kaʼansik u testigoʼob Jéeobaoʼ?
-
Wa yaan baʼax maʼ ta jach creerkeʼ, ¿baʼax jeʼel a beetkeʼ?
5. Maʼ chaʼik u kʼatkuba mix baʼal ta beel
Tuláakal le máaxoʼob ku kʼubik u kuxtaloʼob tiʼ Jéeoba yéetel ku yokjaʼoboʼ ku yantaltiʼob problemas. Utiaʼal a wilkeʼex baʼax úuch tiʼ juntúul koʼoleleʼ chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax problemasil tu aktáantaj Narangerel utiaʼal ka páajchajak u meyajtik Jéeoba?
-
Le yaabilaj ku yuʼubik tu yoʼolal Jéeobaoʼ, ¿bix tu yáantil utiaʼal u aktáantik le problemas yaan kaʼach tiʼoʼ?
Xokeʼex Proverbios 29:25 yéetel 2 Timoteo 1:7, kéen tsʼoʼokkeʼ ka tsikbaltikeʼex lelaʼ:
-
¿Máax áantkoʼon kéen yanaktoʼon problemas?
6. Jéeobaeʼ yaan u yáantkech
Jéeobaeʼ yaan u yáantkech a beet le baʼax a prometermoʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼaxten maʼ taak kaʼach u yokjaʼ le máak ku chíikpajal teʼ videooʼ?
-
¿Baʼax áant utiaʼal u maas confiar tiʼ Jéeoba?
Xokeʼex Isaías 41:10, 13, kéen tsʼoʼokkeʼ ka tsikbaltikeʼex lelaʼ:
-
¿Baʼaxten ka tuklik jeʼel u páajtal a beetik le baʼax ta prometertaj tiʼ Jéeoba le ka ta kʼubaj a kuxtal tiʼoʼ?
7. Tsʼáa gracias tiʼ Jéeoba yoʼolal u nojoch yaabilaj
Wa ka tuukul tiʼ le nojoch yaabilaj ku yeʼesiktech Jéeobaoʼ yaan u taaktal a tsʼáaik gracias tiʼ yéetel yaan u taaktal a meyajtik mantatsʼ. Xokeʼex Salmo 40:5, kéen tsʼoʼokkeʼ ka tsikbaltikeʼex lelaʼ:
-
Tiʼ le baʼaxoʼob tsʼoʼok u síiktech Jéeobaoʼ, ¿máakalmáak maas jatsʼuts a wilkiʼ?
Jeremíaseʼ jach u yaabiltmaj kaʼach Jéeoba bey xan le baʼaxoʼob ku yaʼalikoʼ. Tsʼoʼoleʼ nojoch baʼal u yilik u kʼaj óoltaʼal bey juntúul máax ku meyajtik Dioseʼ. Letiʼeʼ tu yaʼalaj: «Le baʼax ka waʼalikoʼ tu beetaj u kiʼimaktal in wóol, tu kiʼimakkúuntaj u yóol in puksiʼikʼal, Jéeoba, teneʼ kin tsʼáaik kʼaj óoltbil a kʼaabaʼ» (Jeremías 15:16). Beoraaʼ núuk le preguntaʼobaʼ:
-
¿Baʼaxten jatsʼuts u kʼaj óoltaʼal máak bey u testigo Jéeobaeʼ?
-
¿Taak wa a wokjaʼ utiaʼal a beetkaba u testigo Jéeoba?
-
¿Yaan wa baʼax maʼ tu chaʼik a wokjaʼ?
-
¿Baʼax jeʼel a beetik utiaʼal ka páajchajak a wokjaʼeʼ?
BAʼAX SUUK U YAʼALAʼAL: «Maʼ tin wokjaʼ tumen saajken in beet baʼax kʼaas tu táan Jéeoba».
-
¿Bey wa xan a wuʼuyikabaoʼ?
BAʼAX TSOʼOLI
Jéeobaeʼ jeʼel u yáantkech okjaʼ kex jeʼel baʼalak ka kʼáatak ta beeleʼ.
Baʼax ta kanaj
-
¿Jach wa kʼaʼabéet a wojéeltik tuláakal baʼax ku yaʼalik le Biblia utiaʼal a wokjaʼoʼ?
-
¿Baʼaxoʼob kʼaʼabéet a beetik utiaʼal a wokjaʼ?
-
¿Baʼaxten maʼ unaj a sajaktal okjaʼiʼ?
KAN U MAASIL
Ojéelt baʼax unaj u péeksik máak okjaʼ.
«¿Jeʼel wa u páajtal in wokjaʼeʼ?» (U Pʼíich Tulumil Kanan, marzo tiʼ 2020)
Ilawil bey baʼaxoʼob jeʼel u beetik maʼ u jáan okjaʼ máakeʼ.
«¿Baʼax ku bineltik utiaʼal in wokjaʼ?» (U Pʼíich Tulumil Kanan, marzo tiʼ 2019)
Ilawil baʼax anchaj u pʼatik juntúul máak utiaʼal ka páajchajak u yokjaʼ.
Juntúul máak ku kʼaabaʼtik Ataaeʼ táan kaʼach u sen tuklik wa yaan u yokjaʼ. Ilawil baʼax áant utiaʼal u beetik.