LIKE SUANLƐ 48
Tra sran kpa’m be janvuɛ
Kɛ e tra janvuɛ kpa’n e di aklunjɔɛ. Kpɛkun blɛ kekle nun’n, be suan e bo. Biblu’n se kɛ nán sran ngba yɛ ɔ kwla yo janvuɛ kpa-ɔ. ?Ɔ maan é yó sɛ naan y’a tra janvuɛ kpa? Maan e fa e ɲin e sie i kosan yɛ’m be su.
1. ?Ngue ti yɛ ɔ ti cinnjin kɛ e kpa be nga e tra be janvuɛ’n be nun-ɔn?
Be nga e tra be janvuɛ’n, blɛ sunman’n e yo ninnge mun kɛ be sa. Be kwla yo maan e nzuɛn’n yo kpa annzɛ kusu ɔ yo tɛ. Sɛ e nin be e san nun e ɲin jrɛin su-o, annzɛ kusu ɛntɛnɛti su-o, i kwlaa ti kun. Biblu’n se kɛ: “Sran ng’ɔ nin ngwlɛlɛfuɛ’n be nanti’n, ɔ́ káci ngwlɛlɛfuɛ, sanngɛ sran ng’ɔ nin sinnglinfuɛ’n [yɛle kɛ sran ng’ɔ kloman Zoova’n] be san nun’n, ɔ́ ɲán ndɛ.” (Ɲanndra Mun 13:20) Sɛ e janvuɛ’m be klo Zoova naan be su i’n, be kwla uka e naan e nin i e afiɛn w’a mantan kpa, naan kusu y’a fa ajalɛ kpa. Sanngɛ sɛ e janvuɛ nga e tra be’n be suman Zoova’n, be kwla yo maan e nin Zoova e afiɛn ti nun. I sɔ’n ti yɛ Biblu’n wla e fanngan kɛ e tra sran kpa’m be janvuɛ’n niɔn. Kɛ e janvuɛ’m be klo Zoova’n, i sɔ’n uka e, yɛ ɔ uka be wie. Afin ‘e fɔnvɔ e wiengu titi yɛ e wla e wiengu fanngan titi.’—1 Tesalonikifuɛ Mun 5:11.
2. ?Janvuɛ nga e tra be’n ɔ ti Zoova i cinnjin?
Zoova nian nun kpa naan w’a tra sran kun i janvuɛ. Biblu’n se kɛ ‘sran ng’ɔ nanti ndɛnman su’n yɛ ɔ trɛ i janvuɛ-ɔ.’ (Ɲanndra Mun 3:32) ?Sɛ e tra be nga be kloman Zoova’n be janvuɛ’n, wafa sɛ yɛ i sɔ’n yó i-ɔ? I sɔ’n su yomɛn i fɛ kaan sa! (Kanngan Zaki 4:4 nun.) Sanngɛ sɛ e nin sran tɛ mun e sanman nun, naan e fa e wun e mantan Zoova ɔ nin be nga be klo i’n, i sɔ’n yó i fɛ kpa.—Jue Mun 15:1-4.
SI NDƐ’N NUN KPA EKUN
É wá wún like nga ti yɛ ɔ ti cinnjin kɛ e tra sran kpa’m be janvuɛ’n. Kpɛkun é wún wafa nga a kwla tra janvuɛ kpa mɔ be kwla uka wɔ’n.
3. Kpa sran nga a tra be janvuɛ’n be nun
Be nga be kloman Ɲanmiɛn mɔ be nantimɛn i mmla’m be su’n, be timan janvuɛ kpa. An bo VIDEO’N, i sin’n an koko kosan yɛ’n i su yalɛ.
-
Wie liɛ’n, e nin sran tɛ mun e kwla san nun, sanngɛ e siman sɔ. ?Wafa sɛ?
An kanngan 1 Korɛntifuɛ Mun 15:33 nun, i sin’n an koko kosan yɛ’m be su yalɛ:
-
?Sran wafa benin mun yɛ sɛ a tra be janvuɛ’n i bo’n su guaman kpa manman wɔ-ɔ? ?Ngue ti-ɔ?
An kanngan Jue Mun 119:63 nun, i sin’n an koko kosan yɛ’n i su yalɛ:
-
?Sran wafa benin yɛ a kunndɛ kɛ á trá be janvuɛ-ɔ?
Sɛ pɔmun kun saci’n, ɔ kwla saci be onga mun. ?Wafa sɛ yɛ janvuɛ tɛ’m be kwla yo maan e nzuɛn’n saci-ɔ?
4. Be nga e nin be e timan kun bɔbɔ’n be kwla yo e janvuɛ kpa
Biblu’n kan laa Izraɛli lɔ sran nɲɔn be ndɛ. Be yɛle Davidi nin Zonatan. Be nɲɔn’n be afuɛ’n ɔ nin be su sa’n timan kun. Ɔ nin i sɔ’n ngba’n, be yoli janvuɛ kpa. An kanngan 1 Samiɛli 18:1 nun, i sin’n an koko kosan yɛ’m be su yalɛ:
-
?Ɔ fata kɛ be nga e nin be e afuɛ’n ti kun annzɛ e su sa’n ti kun’n be ngunmin yɛ e tra be janvuɛ-ɔ? ?Ngue ti-ɔ?
An kanngan Rɔmunfuɛ Mun 1:11, 12 nun, i sin’n an koko kosan yɛ’n i su yalɛ:
-
?Wafa sɛ yɛ janvuɛ nga be klo Zoova’n be kwla wla be wiengu fanngan-ɔn?
Video nga nun’n, fa ɔ ɲin sie i wafa nga gbanflɛn kun kwla trali janvuɛ’n i su. An bo VIDEO’N, i sin’n an koko kosan yɛ’m be su yalɛ.
-
?Ngue ti yɛ janvuɛ nga Akili trali be suklu lɔ’n ti’n, i si nin i nin be kokoli-ɔ?
-
?Ngue ti yɛ sran sɔ’m be wun yoli i fɛ-ɔ?
-
?Ngue yɛ ɔ ukɛli i naan w’a wun i wun fɛ-ɔ?
5. ?É yó sɛ naan y’a tra janvuɛ kpa?
Maan e nian wafa nga e kwla tra janvuɛ kpa’n, ɔ nin wafa nga e kwla kle kɛ e bɔbɔ e ti janvuɛ kpa’n. An bo VIDEO’N.
An kanngan Ɲanndra Mun 18:24 nin 27:17 nun, i sin’n an koko kosan yɛ’m be su yalɛ:
-
?Wafa sɛ yɛ janvuɛ kpa’m be uka be wiengu-ɔ?
-
?A le janvuɛ kɛ ngalɛ’n sa? ?Sɛ a leman wie’n, á yó sɛ naan w’a ɲan wie?
An kanngan Filipufuɛ Mun 2:4 nun, i sin’n an koko kosan yɛ’n i su yalɛ:
-
Sɛ ɔ waan á trá janvuɛ kpa’n, ɔ fata kɛ ɔ bɔbɔ a kle kɛ a ti janvuɛ kpa. ?Wafa sɛ yɛ a kwla yo sɔ-ɔ?
Sɛ ɔ waan á ɲán janvuɛ kpa’n, ɔ fata kɛ ɔ bɔbɔ a yo janvuɛ kpa.
SRAN WIE’M BE WAAN: “Janvuɛ kwlaa ti kpa. Sɛ a leman wie mlɔnmlɔn’n yɛ ɔ ti tɛ-ɔ.”
-
?A bu i sɛ?
NDƐ’N I KPƆLƐ BOLƐ
Kɛ e tra sran kpa’m be janvuɛ’n, i sɔ’n yo Zoova i fɛ. Yɛ e bɔbɔ e ɲan su ye.
Ndɛ’n i nun flanlɛ
-
?Ngue ti yɛ janvuɛ nga e tra be’n, ɔ ti Zoova i cinnjin-ɔn?
-
?Wan mun yɛ ɔ fataman kɛ e tra be janvuɛ-ɔ?
-
?Á yó sɛ naan w’a tra sran kpa’m be janvuɛ?
NDƐ WIE MUN EKUN
Wafa nga janvuɛ kpa’m be kwla uka e blɛ kekle’n nun’n.
Ajalɛ wie mɔ a kwla fa naan w’a tra janvuɛ kpa’n.
Ɛntɛnɛti su janvuɛ tralɛ’n i su ndɛ.
“Like nga ti yɛ bian kun wa kacili i janvuɛ mun’n.”