IRUẸMWI 48
Gha Ya Ẹwaẹn Zẹ Ọse
Avbe ọse ni sikẹ ima keghi gu ima ghọghọ vbe emwi ghaa maan, emwi gha vbe wegbe mu ima, iran i he ima yọ. Sokpan e Baibol gi ima rẹn wẹẹ, ẹi re emwa hia ọre ọse nọ maan. Nọnaghiyerriọ, vbua khian ya sẹtin zẹ avbe ọse ni maan hẹ? Gia ziro yan inọta ni rre ototọ mwa.
1. Vbua khian lae miẹn vbe u gha zẹ ọse nọ maan ra nẹi maan?
Ma mobọ ya egbe taa emwa ne ima gu mu obọ, ya sẹ egbe emwa ne ima gu mu obọ vbe intanẹt. Iran ghaa re emwa esi, ma sẹtin vbe gha mwẹ uyinmwẹ esi; iran ghaa re emwa dan, iran sẹtin vbe mu uyinmwẹ ima rhia. E Baibol khare wẹẹ: “Gha gu umẹwaẹn mu obọ, wẹ gha vbe do khian umẹwaẹn. Adeghẹ u gu avbe akpa gha ru ọse, [ọni ọre emwa ni ma hoẹmwẹ e Jehova] ọni ọre ọghuẹ fo.” (Itan 13:20) U ghaa gu eguọmwadia e Jehova ni hoẹmwẹ ọnrẹn ru ọse, iran gha ru iyobọ nuẹn ya sikẹ ọre sayọ, iran gha vbe sẹtin ru iyobọ nuẹn ya gha ru azẹ ni maan. Sokpan ma ghaa gu emwa ni ma hoẹmwẹ e Jehova ru ọse, iran sẹtin ya ima khian rree nẹẹn. Ẹi khabe ne Baibol na wẹẹ ne ima gha ya ẹwaẹn zẹ ọse! Ma ghaa gu emwa ni hoẹmwẹ e Jehova ru ọse, ma gha miẹn ere vbọ, iran tobọ iran ghi vbe miẹn ere vbọ. Ma ghi sẹtin gha ‘rhie ẹtin ye egbe iwu, ma ghi vbe gha ye egbe obọ.’—1 Tẹsalonaika 5:11.
2. Vbọ ye Jehova hẹ vbe ekhọe vbe u ghaa gu emwa esi ra emwa dan mu obọ?
Ẹi re emwa hia ẹre Jehova gu ru ọse. ‘Emwa ẹmwata ẹre irẹn mu iro ma.’ (Itan 3:32) Vbọ khian gha ye Jehova hẹ vbe ekhọe, vbe ima ghaa gu emwa ni ma hoẹmwẹ irẹn ru ọse? Ẹko i khian rhiẹnrhiẹn ọnrẹn hiehie! (Tie Jems 4:4.) Sokpan deghẹ ima i gu emwa dan mu obọ, ma na vbe gha hia ne ima sikẹ e Jehova kevbe emwa ni hoẹmwẹ ọnrẹn, ẹko ghi gha rhiẹnrhiẹn ọnrẹn, ọ ghi vbe zẹ ima zẹvbe ọsiọre.—Psalm 15:1-4.
GUALỌ OTỌ RE SAYỌ
Gia ziro yan evbọzẹe nọ na khẹke ne ima gha zẹ ọse ni maan, kevbe vbene u gha ya sẹtin zẹ ọse ni gha ya ruẹ gha sọyẹnmwẹ arrọọ.
3. Gha begbe ne u ghẹ ya zẹ ọse dan
Emwa ni ma hoẹmwẹ Osanobua, nẹi vbe ya ilele ọghẹe ru emwi, ọse dan ẹre iran khin. Kpee VIDIO na, iyeke ọni, uwa ghi ziro yan inọta nọ lelẹe.
-
De vbene ima gha ya sẹtin gha gu avbe ọse dan mu obọ hẹ, vbene ima i na rherhe rẹn?
Tie 1 Kọrinti 15:33, iyeke ọni, uwa ghi ziro yan avbe inọta na:
-
De aro ọmwa nọ ma khẹke ne u gu gha ru ọse? Vbua gu kha vberriọ?
Tie Psalm 119:63, iyeke ọni, uwa ghi ziro yan inọta na:
-
Vbọ khian ya ruẹ rẹn ọmwa nọ khẹke ne u gu ru ọse?
Ọmọ erhan ọkpa nọ kẹkẹ gha sẹtin mu enikẹre rhia. De vbene ọse dan ọkpa gha ya sẹtin mu uyinmwẹ ruẹ rhia hẹ?
4. Ma gha sẹtin gu emwa ughughan ru ọse
E Baibol guan kaẹn e Devid vbe Jonatan, Ivbi Izrẹl ẹre iran ghaa khin. E Jonatan wa kakabọ diẹn e Devid, ovbi ọba vbe gha nọ. Ọrheyerriọ, ọse ọghe obọ ma miẹn uhunmwu ẹi vbiẹ, ẹre iran ghaa khin. Tie 1 Samuẹl 18:1, iyeke ọni, uwa ghi ziro yan avbe inọta na:
-
Emwa ne ima gba re ihegbe, ra emwa ni zẹ vbe ukpo ne ima na zẹ ọkpa, ẹre ọ wa khẹke ne ima gha gu ru ọse ra? Vbua gu kha vberriọ?
Tie Rom 1:11, 12, iyeke ọni, uwa ghi ziro yan inọta na:
-
De odẹ ne avbe ọse ni hoẹmwẹ e Jehova gha ya sẹtin rhie igiọdu ne egbe?
Vbe vidio na, ghee vbene ọvbokhan okpia ọkpa ya do gha mwẹ ọse vbe ehe nọ ma te ya aro yi. Kpee VIDIO na, iyeke ọni, uwa ghi ziro yan inọta ni lelẹe.
-
Vbe vidio na, vbọzẹ ne evbibiẹ Akil na gha si osi vbekpa aro ọse ne ovbi iran gu mu obọ vbe owebe?
-
De emwi eso nọ te ya Akil gha roro ẹre wẹẹ, emwa esi ẹre irẹn ghaa gu ru ọse?
-
Vbọ ghi ru iyobọ nẹẹn vbe uwu ohioro nọ te gha ye?
5. Vbene u gha ya sẹtin gha mwẹ avbe ọse ni maan hẹ
Ghee vbene u gha ya sẹtin gha mwẹ avbe ọse ni maan hẹ kevbe vbene uwẹ gha ya sẹtin gha re ọse nọ maan. Kpee VIDIO na.
Tie Itan 18:24 kevbe 27:17, iyeke ọni, uwa ghi ziro yan avbe inọta na:
-
De vbene avbe ọse ni maan ya ru iyobọ ne egbe hẹ?
-
Uwẹ mwẹ egbe avbe ọse vberriọ ra? Deghẹ u i mwẹ, vbua khian ya sẹtin gha mwẹ avbe ọse vberriọ hẹ?
Tie Filipai 2:4, iyeke ọni, uwa ghi ziro yan inọta na:
-
U ghaa hoo ne u gha mwẹ avbe ọse ni maan, ọ khẹke ne uwẹ tobọ uwẹ vbe gha re ọse nọ maan. Vbua khian ya sẹtin ru ọna hẹ?
U ghaa hoo ne u gha mwẹ avbe ọse ni maan, ọ khẹke ne uwẹ vbe gha re ọse nọ maan
EMWA ESO KEGHI KHA WẸẸ: “Ai lele ọmwa na gu ru ọse; a zẹdẹ mwẹ, ẹre ọ maan sẹ ai mwẹ hiehie.”
-
Vbua khian tama ọmwa vberriọ?
OLIKA ẸMWẸ
Ma ghaa ya ẹwaẹn zẹ ọse, te ima ya ẹko rhiẹnrhiẹn e Jehova, ma tobọ ima ghi vbe gha miẹn ere vbọ.
Ogbewerriẹ
-
Vbọzẹ ne aro e Jehova na sotọ vbe egbe aro ọse ne ima zẹ?
-
De aro emwa nọ ma khẹke ne ima gha gu ru ọse?
-
De emwi ne uwẹ gha ru, ne u mieke na sẹtin gha mwẹ avbe ọse ni maan?
RUẸ SAYỌ
Ghee vbene avbe ọse ni maan gha ya sẹtin ru iyobọ ne ima hẹ vbe ẹghẹ ibavbaro.
Ghee emwi eso ne u gha ru, nọ gha ya ruẹ gha mwẹ avbe ọse ni maan.
De emwi nọ khẹke ne u rẹn vbekpa avbe ọse na zẹ vbe intanẹt?
Vbe okha nọ mwẹ uhunmwuta na, “Ẹmwẹ Erha Mwẹ Kegha Da Mwẹ,” u gha miẹn vbene okpia ọkpa ghi ya do sẹtin zẹ avbe ọse ni maan hẹ.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
