PELAJAREN 48

Pilihlah Teman alu Pentar

MAINKEN

Sanga meriah ukurta, teman-temanta banci erban tambah keriahen ukurta. I bas masa-masa si sulit pe, temanta banci mpegegehi kita. Tapi, Pustaka si Badia mpersingeti kita maka labo kerina kalak banci jadi teman si mehuli. Jadi, uga kita banci milih teman si mehuli? Cuba ukurindu penungkunen-penungkunen enda.

1. Kai pengaruh temanta man banta?

Adi rusur kita bergaul ras kalak, la soal secara langsung ntah pe arah media sosial, kalak e banci mpengaruhi kita. Banci saja carata ngerana, perbahanenta, bage pe cara rukurta dungna seri ras temanta bergaul ndai. Nina Pustaka si Badia, “Kalak si erteman ras kalak pentar jadi pentar, tapi kalak si erteman ras kalak si motu [kalak si la engkelengi Jahwe] pasti pagi kena cilaka.” (Kuan-kuanen 13:20) Adi temanta engkelengi Jahwe janah isembahna Jahwe, enda banci erban kita reh deherna ras Jahwe janah banci ka siban keputusen si mehuli. Tapi, adi temanta la engkelengi Jahwe, enda banci erban kita reh dauhna arah Jahwe. Em sebapna Pustaka si Badia mpersingeti kita gelah milih teman alu pentar! Adi temanta engkelengi Jahwe, banci sidatken pengaruh si mehuli arah ia, janah banci ka sibereken pengaruh si mehuli man bana. Kita banci ‘terus siiah-iahen janah mpegegehi sada ras si debanna.’—1 Tesalonika 5:11.

2. Uga nge perasan Jahwe ngidah teman si enggo sipilih?

Jahwe pe pilihNa ka nge temanNa. “Kompak Ia erteman ras kalak si bujur.” (Kuan-kuanen 3:32) Uga perasan Jahwe adi sipilih temanta si la engkelengi Ia? Pasti kecewa kel Jahwe! (Baca Jakup 4:4.) Tapi, adi sipilih temanta si engkelengi Jahwe janah siusahaken ndeher ras Ia, e pasti erban meriah ukurNa janah nggit Ia erteman ras kita.—Masmur 15:1-4.

PELAJARI TERBAGESEN

Sibahas kari engkai maka penting sipilih teman si mehuli. Sibahas ka kari uga carana gelah banci sidat teman si mehuli.

3. Ula erteman ras kalak si mereken pengaruh si la mehuli

Kalak si pengaruhna la mehuli eme kalak si la engkelengi Jahwe ras standarNa. Putar VIDEO, kenca si e bahas penungkunen enda:

VIDEO: Tulaklah Pergaulen si La Mehuli (6:17)

Uga maka banci la sisadari kepe enggo erteman kita ras kalak si pengaruhna la mehuli?

Bacalah 1 Korinti 15:33, kenca si e bahas penungkunen enda:

Kalak si uga nge si pengaruhna la mehuli man bandu? Engkai?

Bacalah Masmur 119:63, kenca si e bahas penungkunen enda:

Janari tehndu maka temanndu e mereken pengaruh si mehuli man bandu?

Sada apel si macik banci erban apel si deban pe ikut macik. Uga sada teman si la mehuli banci mpengaruhi kam?

4. Banci kita erteman ras kalak si beda ras kita

I bas Pustaka si Badia lit iceritaken kerna Daud ras Jonatan si tading bas Israel mbarenda. Jonatan ndauh tuan asangken Daud janah Jonatan pe anak raja, tapi kalak e teman kompak. Bacalah 1 Samuel 18:1, kenca si e bahas penungkunen enda:

Engkai maka ula min kita erteman ras kalak si sebaya saja ras kita, ntah pe si seri latar belakangna ras kita?

Bacalah Roma 1:11, 12, kenca si e bahas penungkunen enda:

Uga carana kita ras temanta si engkelengi Jahwe banci saling mpegegehi?

Bas video enda, nenlah uga sekalak anak muda banci erteman ras kalak si la isangkana. Putar VIDEO, kenca si e bahas penungkunen enda:

VIDEO: Ndatken Teman Meriah bas Ingan si La Sisangka (5:06)

Bas video e, engkai maka orang tua Akil kuatir kerna pergaulen Akil ras teman sekolahna?
Kai si tangtangna erban meriah akap Akil erteman ras teman sekolahna?
Engkai maka dungna lanai melungen akap Akil?