NLO AJO 48

Yeme’e tobe bemvôé bôé

Vô’ôlô nkobô

Benya bemvôé ba vak a bia mbamba biyoñ, a ba su’u bia éyoñe bia tôban minjuk. Ve Kalate Zambe a kate bia na sa ke môt ase bia yen nnye a ne bo mbamba mvôé. Nde ñhe, aval avé ô ne yeme tobe bemvôé bôé? Bi tame zu jeñe biyalan ya minsili mia tôé valé.

1. Aval avé bemvôé wo top be ne volô wo nge ke soo wo minjuk?

Bia ji’a vu bôte bia yeñ a be. Jam ete e ne volô bia nge ke soo bia minjuk, to’o bia yeñ a bôte bete a zene ya internet. Kalate Zambe a jô na: “Wulu’u nsamba beyeme mam, nde wo ye bo fek; ve ñyeñe mekut [ba ba nye’e ki Yéhôva] a ye wô’ô jam ete ésôbôk.” (Minkana 13:20) Nge ô bili bemvôé ba nye’e Yéhôva a kañe nye, be ne volô wo na ô yemete élate jôé a nye a na ô nyoñe mbamba mintyi’an ényiñe jôé. Ve nge ô bili bemvôé ba kañe ki Yéhôva, be ne bo na ô lume Yéhôva mvus. Jôme te nje Kalate Zambe a lebe bia na bi tobe bemvôé bangan a fek! Éyoñe bi bili bemvôé ba kañe Yéhôva, nalé é soo bia bese abui bibotan. Bii kui na bi su’an, “wua a lebe’e nyô mbok, a wua a volô’ô nyô mbok.”—1 Bethessalonicien 5:11.

2. Yéhôva é wô’ôtan aya éyoñ é yene bemvôé wo top?

Yéhôva a kôme nyoñ éyoñe ya tobe bemvôé bé. “A ñbwaane bôt be ne mvaé [nge ke zôsô].” (Minkana 3:32) Yéhôva é wô’ôtan aya nge bia tobe bemvôé ba kañe ke nye? É wô’ô nlem mintaé! (Lañe’e Jacques 4:4.) Ve é wô’ô nlem avak a late ngbwa a bia nge bia sa’ale mbia mewoso, nge bia wulu ba’aba’a a nye a bôte ba nye’e nye.—Besam 15:1-4.

TUKA’A FAK

Yene’ amu jé e ne nya mfii na bi yeme tobe bemvôé bangan, a aval avé ô ne late memvôé me ne kôme volô wo.

3. Sa’ale’e mbia mewoso

Bôt ba nye’e ki Yéhôva a memvinda mé be ne mbia mewoso. Futi’i VIDÉO, mvuse ya valé, yala’ane nsili wo tôé valé.

VIDÉO: Sa’ale’e mbia mewoso (6:17)

Aval avé bi ne bi mbia mewoso biabebien teke de yem?

Lañe’e 1 Becorinthien 15:33, mvuse ya valé, yala’ane nsili wu:

Avale bôt avé e ne bo mbia mewoso asu dôé? Amu jé?

Lañe’e Besam 119:63, mvuse ya valé, yala’ane nsili wu:

Jé ja ye liti wo na môte si môte ka a ne bo mbamba mvôé asu dôé?

Nge ébuma jia é ne ébol, é ne mane ndamane bibuma bivok. Aval avé ô ne tôbane minjuk to’o ô bili ve mbia mvôé wua?

4. Bôte ya meyoñ mese a ôkala ôse be ne bo bemvôé bangan

Kalate Zambe a kobô ajô David ba Jonathan. Be nga nyiñ Israël melu mvus. Be nji be ôkala wua, a be nji be be bili aval ényiñe da, ve be mbe be bili ngul amvôé. Lañe’e 1 Samuel 18:1, mvuse ya valé, yala’ane nsili wu:

Amu jé da sili ki ve na bemvôé bangan be bo bôte bia be be bi ne ôkala wua, nge ke ba bia be be bi bili nkôñ ényiñe wua?

Lañe’e Beromain 1:11, 12, mvuse ya valé, yala’ane nsili wu:

Aval avé bemvôé ba nye’e Yéhôva be ne veane ngule nyul?

E vidéo nyi, yene’ aval ésoé mojañ éziñ é nga bi bemvôé vôm a nji be a buni’i. Futi’i VIDÉO, mvuse ya valé, yala’ane minsili mia tôé valé.

VIDÉO: E bi bemvôé vôme bi nji be bi buni’i (5:06)

Amu jé bebiaé be Akil be mbe be tyelé’é minleme yôp a lat a bemvôé a mbe a bili sikôlô?
Amu jé Akil a nga kômbô late ngbwa a bongô bete?
Jé é nga volô nye na a bo teke beta wô’ôtan na a ne étam?