ARUFUDAHANI 48
Anúadira humaña humadagu buidu
Gánwoungüda hamuti umadagu buítiña wagundan ani rútiña erei woun lidan lidaani lénrengunga. Lau sun lira, eweridihatu Bíbülia luagu mama lan sun gürigia lun ábanbei lan umadaü buiti. Ida lubati hanúadiruniña humadagu buidu? Samina humá luagun álügüdahani burí le asigirubei.
1. Ka idoun hínchahaün humadagu?
Liibe-agei dan, aba burí wáyeihaniña gürigia ha úmabaña wásügüra saragu dan. Gayaraati lanügün lira buiti o wuribati woun, ani gayaraati lasuseredun lira meberesenga anhein hámañadiwa lubéi gürigia hagía o luéigiñe lan Internet wásügüra dan hama. Kei tariñaguni Bíbülia: “Ha óundaragutiña hama chu tau, lachuuduba hau, ánhaña ha óundaragubaña hama ibidiougua tau, heferidiruba” (Ariñawagúni 13:20). Umadagu ha hínsiñehabubaña lun Heowá ani hudugua hagía lun, gayaraabei híderagunün lun herederun yarafa lun luma lun hanúadirun buidu. Ánheinti weiri lubéi humadagua hama gürigia ha mámabaña lílana damuriguaü, gayaraabei hadisedagüdünün luéi Heowá. Ligía tariñagunbei Bíbülia woun lun wanúadiruniña wamadagu lau lichú aau. Dan le hínsiñe lan Bungiu houn wamadagu, buiti lidin woun ani buiti giñe lidin houn. Ítarati, gaganbadibadiwa lun adundehani le: “Ligía rúmeme humá lubéi gurasu luma erei húniwagua” (1 Tesalónikana 5:11).
2. Ida liña lasandiragun Heowá lungua hau umadagu ha hanúadirubaña?
Anúadira lumutiña Heowá lumadagu buidu. “Hama ha buídubaña, gamadaguati lungua” (Ariñawagúni 3:32). Ida luba lasandiragun Heowá lungua ánhawa gamadagua hama gürigia ha mínsiñehabubaña lun? Lasandiruña hamuga saragu íruni (aliiha huméi Santiagu 4:4). Ánhawati adiseda hawéi hagübüri umadagu, wayarafadame lun Heowá luma houn ha hínsiñehabubaña lun, wagundaaragüdübei ani ábame lígirun lun gamadagua wamá luma (Sálumu 15:1-4).
SIGÍ HUMÁ AFURENDEIRA
Ariha waméi ka lan uagu lunti lubéi wanúadiruniña wamadagu buidu luma ka lan gayaraabei hadügüni lun gamadagu humá gürigia ha barütiña buiti hun.
3. Góunigi humá, manúadira humaña humadagu wuriba
Gürigia ha mínsiñehabubaña lun Bungiu, mineben ligía lilurudun houn, hagía gürigia ha mabuidunbaña lun gamadagua wamá hama. Ariha huméi BIDÉU, ábameti hayanuhan luagu álügüdahani le:
-
Ida luba gamadagua wamá hama hagübüri umadagu ibidiñounga woun?
Aliiha huméi 1 Korintuna 15:33, ábameti hayanuhan luagu álügüdahani burí le:
-
Ka gürigia gayaraabei aban lan lagübüri umadaü hun? Ka uagu?
Aliiha huméi Sálumu 119:63, ábameti hayanuhan luagu álügüdahani le:
-
Ka lunbei háluahani luagu aban umadaü?
Gayaraati tagadeirunu aban mansana ñalaaru to tíbiri. Ka gayaraabei hadügüni hagübüri umadagu hun?
4. Gayaraati gamadagua wamá hama gürigia ha mítarantiña kei wagía
Ayanuhatu Bíbülia luagu Dawidi luma Yónatan, bián wügüriña ha meha awinwandubaña lidan binadu Ísüraeli. Lau sun meha liráü lan urúei Yónatan ani díseeli meha laweiridun luéi Dawidi, buiti meha hamadagua. Aliiha huméi 1 Samueli 18:1, ábameti hayanuhan luagu álügüdahani le:
-
Ka uagu mama lubéi mosu ábanmeme lan warumudiri hama wamadagu ni lun ábanmeme lan ligaburi wawinwandun?
Aliiha huméi Rómana 1:11, 12, ábameti hayanuhan luagu álügüdahani le:
-
Ida liña híchugun umadagu ha hínsiñehabubaña lun Heowá gurasu hóuniwagua?
Ida liña ladarirun aban nibureinti umadagu le ñein lubéi magurabun lani? Ariha huméi BIDÉU, ábameti hayanuhan luagu álügüdahani burí le:
-
Ka uagu hadiherida lagübürigu Akili hawagu lumadagu hasaani leskuelarugu?
-
Ka yebe uagu hínsiñe habéi umadagu ha lun Akili?
-
Ka ladügübei lun masigi lan asandiragua lungua lábugua?
5. Ida luba wadügün umadagu buítiña?
Furendei huméi ida luba lan hadarirun umadagu buítiña luma ida luba lan aban lan umadaü buiti huguya. Ariha huméi BIDÉU.
Aliiha huméi Ariñawagúni 18:24 luma 27:17, ábameti hayanuhan luagu álügüdahani burí le:
-
Ida liña hídehan umadagu inarünitiña hámagua?
-
Gamadatün san gürigia buítiña kei ha uágubaña layanuhóua lidan Ariñawagúni? Anhein mítaran lubéi, ka gayaraabei hadügüni lun hadariruniña?
Aliiha huméi Filipuna 2:4, ábameti hayanuhan luagu álügüdahani le:
-
Lun gamadagu humá gürigia buítiña, mosu ábanbadün lan umadaü buiti. Ida luba hibihini?
Lun gamadagu humá ha buítiña, mosu aban humá umadaü le buiti.
LE HARIÑAGUBEI FIU GÜRIGIA: “Himei nágiña umadagu ha númabaña sügǘ lau nerederun nábugua”.
-
Agia huguya, ka hasaminarubei?
LE HAFURENDEIRUBEI
Buítimati wabagari dan le wanúadirun umadagu buítiña ani gúndaagüda wamuti Heowá.
Águyuguagüdüni
-
Ka uagu busén lubéi Heowá lun wanúadiruniña wamadagu buidu?
-
Ka hawuyeri umadagu lúnbaña wadisedun hawéi?
-
Ida luba hadügün umadaguaü derebuguti hama gürigia ha buídubaña?
FURENDEI HUMÁ LANWOUN
Ariha huméi ida luba lan híderaguniwa umadagu ha inarünitiña lidan lidaani lénrengunga.
“Héregüda waméi wamadagua lubaragiñe lagumuchun ubóu” (Garüdia Awisahatu, unsu-hati, irumu 2019)
Ariha humá fiu adundehani le gayaraabei hafalaruni lun hadarirun umadagu buítiña.
Ka lunbei hasubudiruni hawagu umadagu ha adügǘbaña lidan Internet?
Aliiha huméi abahüdaguni luáguti ibagari le gíribei “Anhelaba tener un padre” ani ariha huméi ka lan uagu lasansiraña aban wügüri lumadagu.
“La Biblia les cambió la vida” (La Atalaya, to lánina 1 lidan gádürü-hati, irumu 2012)
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
