Teri sɔbɛw be dɔ fara an ka ninsɔndiya kan ani u b’an barika bonya gwɛlɛyaw wagati la. Nka Bibulu b’an lasɔmi ko teriw bɛɛ lo tɛ teri ɲumanw ye. O la, i be se ka teri ɲumanw sugandi cogo di? An k’a filɛ an be se k’o kɛ cogo min na:

1. Mun na i ka ɲi k’i teriw sugandi koɲuman?

An be wagati kɛ ni mɔgɔ minw ye, hali ni rezo sosiyow kan le, an ka teli k’u ka kɛwale ɲuman, wala u ka kɛwalew juguw ladegi. I ko Bibulu b’a fɔ cogo min na, “mɔgɔ min be taama ni lɔnnikɛla ye, o tigi bena koo lɔn. Nga min be taama ni naloman ye, ale b’a yɛrɛ cɛn le.” (Talenw 13:20). Teri minw be Jehova kanu, u be se k’i dɛmɛ i magwɛrɛnin ka to Jehova la kosɔbɛ. U be se k’i dɛmɛ fana ka desizɔn ɲumanw ta. Nka teri minw tɛ Jehova sagokɛlaw ye, u be se k’a to an b’an yɔrɔ janya Jehova la. O lo kama Bibulu b’an jija ko an k’an teriw sugandi ni hakilitigiya ye! N’an teriw be Jehova kanu, o b’an nafa ani o be olu fana nafa: an be “ɲɔgɔn jigi tugu, ani ka ɲɔgɔn dɛmɛ.”—1 Tesalonikaw 5:11.

2. N’an t’an teriw sugandi ni hakilitigiya ye, o be mun lo kɛ Jehova la?

Jehova tɛ bɛɛ lo kɛ a teri ye. “A be mɔgɔɲumanw [le] kɛ a teriw ye.” (Talenw 3:32). Mɔgɔ minw tɛ Jehova kanu, n’an b’olu kɛ an teriw ye, o bena mun lo kɛ a la do? O tɛna diya a ye fewu! (Zaki 4:4 kalan). Nka n’an be faran ka bɔ jɛnɲɔgɔn juguw la do? Ani, n’an b’an magwɛrɛ Jehova la ani a kanubagaw la, o bena mun lo kɛ a la? A ninsɔn bena diya an kɔrɔ ani an bena kɛ a teri ye.—Zaburuw 15:1-4.

 A ƝINI KA DƆ LƆN TUGUN

4. Mɔgɔ minw sanda n’u lɔyɔrɔ n’an ta tɛ kelen ye, u be se ka kɛ an teri sɔbɛw ye

Bibulu be kuma Dawuda ni Zonatan ka teriya koo la. U sanda n’u lɔyɔrɔ tun tɛ kelen ye hali dɔɔni. Nka, u fila bɛɛ kɛra teri sɔbɛw ye. 1 Samuyɛli 18:1 kalan. O kɔ, a’ ye ɲiningali nin kɛ ani ka baro kɛ o kan:

• Waajibi tɛ an n’an teriw sanda ka kɛ kelen ye wala an lɔyɔrɔ ka kɛ kelen ye. Mun na do?

Ɔrɔmukaw 1:11, 12 kalan. O kɔ, a’ ye ɲiningali nin kɛ ani ka baro kɛ o kan:

• Ni teri fila be Jehova kanu, u be ɲɔgɔn jija. Cogo di do?

A filɛ cogo min na kanbele dɔ sera ka teriya kɛ ni mɔgɔ dɔ ye min ka kɔrɔ n’a ye fɔɔ ka taga ka na. A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:

• Mun na Akil bangebagaw tun be jɔrɔla a koo la?

• A daminɛ na, mun na Akil y’a ɲini ka teriya kɛ n’a ka lakɔli filankuru dɔw ye?

• Mun lo y’a dɛmɛ a y’a ye ko a t’a kelen na tugun?

5. Teriya sɔbɛ gundo

 MIIRIYA JƆNJƆN

N’an b’an teriw sugandi ni hakilitigiya ye, o be Jehova ninsɔndiya ani o b’an yɛrɛ nafa.

I ye mun lo faamu?

• Mun na Jehova b’a fɛ an k’an teriw sugandi ni hakilitigiya ye?

• An ka ɲi k’an mabɔ teri sugu jumanw lo la?

• Mɔgɔ minw be Jehova kanu, i be se ka teriya sɔbɛ kɛ n’u ye cogo di?