LESSON 48
Tuene tòb bemvoé boé
Bia ding bi loro mbembe abog ai bemvoé baan, bia yem fe na bi ne bi afiri ai bò éyòng mindzug mia kui. Bibel a kòbò é mam ma bebe amvoé. A leb bia na bi tuene tòb bemvoé baan. Bi tam yen akia ya a vòli bia.
1. Asu dzé a ne ai nfi na bi tuene tòb bemvoé baan?
Ane bia lot abog ai mot, éye fe bia vu nyè nala, tò a mbòen mbeng ngeki abé. Dzam deda fe ai bemvoé bi bele a beréseaux sociaux. Bibel a dzo na: “É mot a wulu ai mimfefeg mibot a ne feg, ve mot ya nsamba mekut a yi toben ai mindzug” (Minkana 13:20). Bemvoé ba ding Yéhova be ne bi vòli na bi tòbò babi ai nyè, bi yem fe nòng mimbembe mintsigen. Ve é bemvoé ba kang ki Yéhova be ne dzam bò na bi ke oyab ai nyè. Asu té nde a ne ai nfi na o tuene tòb bemvoé boé! Nge bemvoé baan ba ding Yéhova, bia yi fulen ai bò a mimbembe mefulu, éyòng té fe amvoé daan da yi tòbò nfi. Bibel a dzo na ‘vòligen mina mina, mi veen fe awonoʼ (1 Tésaloni 5:11).
2. Asu dzé a ne nfi a mis me Yéhova na bi yem tòb bemvoé baan?
Yéhova émen a yem tòb bemvoé boé. “Betetele bebot mbò be ne afiri dié” (Minkana 3:32). Dzé Yéhova a yi woren nge bemvoé baan be ne é bot ba kang ki nyè? Tegè selen na a yi wog olun (Langʼa Yakòbus 4:4). A yi tòbò mintak abui na a lang bia a tang bemvoé boé nge bia dzogè bebé biyòng, bi subugu fe nyè babi tò é ba ba ding nyè (Salmen 15:1-4).
TUENE FAG
Bia tam yen asu dzé a ne ai nfi na bi yem tòb bemvoé baan, ai akia afé bi ne dzam lat mimbembe memvoé.
3. Bò okala ai bebé biyòng
É bot ba ding ki Zamba ai memvéndé moé be seki mimbembe biyòng asu kristen. Bebege VIDÉO ai yalen a nsili hi:
-
Akia afé bi ne bi bebé memvoé, ve tege yem na me ne abé?
Langʼa 1 Kòrinti 15:33 ai yalen minsili mi tsaa mi:
-
Akia afé o ne baala é tin mvéndé nyi a énying dzoé? Asu dzé?
Langʼa Salmen 119:63 ai yalen a nsili hi:
-
Za wò yeane tòb ane mvoé dzoé?
Mbe éyòng mbòk mbòk a ne bi sò ai abui mindzug
4. É mot a selen ai wò a ne dzam tòbò mvoé dzoé
Bibel a lere bia mbembe amvoé a nga be a zang David ban Yonathan. Veda, mbòk a nga be nnòni biyem ényò mbòk ki, mòn nkukuma. Nde fe be nga beki okala. Langʼa 1 Samuel 18:1 ai yalen a nsili hi:
-
Ye bemvoé baan ba yeane fò tòbò ve okala waan, ngeki a bi nkong énying mbòk ai bia? Asu dzé?
Langʼa Romani 1:11, 12 ai yalen a nsili hi:
-
Akia afé é bemvoé bebè ba ding Yéhova be ne veen bò bò ngul a nyòl?
Asu yi na o yen akia ya énanga madzang zing ya lat amvoé ai ényò a ne nya moro abui ai nyè, bebege VIDÉO ai yalen minsili mi tsaa:
-
Bebondé be Akil be nga be sangʼen asu dzé?
-
Asu dzé a nga ke lat éyòng ai binanga ya zukulu woé?
-
Dzé é nga vòli nyè na te a bare woren na a ne étam?
5. Akia afé bi ne dzam lat mimbembe memvoé?
Akia afé bi ne dzam lat mimbembe memvoé? Akia afé wòmen o ne dzam lere na o ne mbembe mvoé? Bebege VIDÉO.
Langʼa Minkana 18:24 ai 27:17, ai yalen minsili mi tsaa mi:
-
Akia afé mimfang bemvoé be ne vòlen bò bò?
-
Ye o nga lat akia memvoé té? Nge tegè, o ne dò bò akia afé?
Langʼa Filippi 2:4 ai yalen a nsili hi:
-
Asu yi na o bi mimfang bemvoé, wòmen wò yeane tari tòbò mfang mvoé. Akia afé mot a lere hm na a ne mfang mvoé?
Asu yi na o bi mimfang bemvoé, wòmen wò yeane tari tòbò mfang mvoé
ABUI BOT DA DZO NA: “Tò ane bi seki nyebe mbòk, nala a kamen ki na bia tòbò amvoé.”
-
Mfaa woé, wò yen ya?
OBALBAS
Nge bia tuene tòb bemvoé baan, bia yi bi abui mintak ai fe mvam Yéhova.
Dzé bia baala
-
Asu dzé a yem tòb bemvoé baan o ne nfi abui a mis me Yéhova?
-
Akia bemvoé afé a ne sò ai bia mindzug?
-
Akia afé bi ne lat mimfang memvoé?
O NE FE BEBE
Yene akia afé mimfang bemvoé mia vòli bia abog mindzug.
“Noue des amitiés solides avant que la fin nʼarrive” (La Tour de Garde, novembre 2019)
Yene é mam o ne bò asu yi na o bi mimfang memvoé.
“Comment choisir mes amis?” (Les jeunes sʼinterrogent. Réponses pratiques [Volume 1], chapitre 8)
É dzom wò yeane yem é bebege bemvoé ya beréseaux sociaux?
“Jʼavais tant besoin dʼun père”. Nlang énanga mot zing é nga bi azombo ya tséndé bemvoé boé.
“La Bible transforme des vies” (La Tour de Garde, 1er avril 2012)
