ADZESUA 48
Hwɛ W’anyɛnkofa Yie
Anyɛnkofo dze, sɛ ewɔ bi a, oye. Yebotum nye hɔn abɔ mu agye hɛn enyiwa. Ɔtɔ da na sɛ ndzɛmba nnkɔ yie wɔ hɛn asetsena mu a, wɔboa hɛn. Naaso Bible no bɔ hɛn kɔkɔ dɛ nnyɛ obiara na ɔwɔ dɛ yɛfa no nyɛnko. Ntsi asɛm no nye dɛ, ibesi dɛn enya anyɛnkofo pa? Ɔwodze, ma yensusu nsɛmbisa a odzidzi do yi ho.
1. Ebɛn kwan do na w’anyɛnkofo botum ama w’abrabɔ ayɛ papa anaa asɛɛ?
Wɔtaa ka asɛm bi dɛ, ‘Kyerɛ me wo nyɛnko na menkyerɛ wo wo suban.’ Dza dɛm asɛm yi kyerɛ nye dɛ yebotum esuasua hɛn anyɛnkofo hɔn suban. Hɔn a yɛnye hɔn bɔ wɔ sohyial media do no mpo, yebotum esuasua hɔn. Bible no ka dɛ: “Enye enyansafo nnantsew, na ibohu nyansa: na nkwasea [hɔn a wɔnndɔ Jehovah] adamfo dze, no ho bɛhyehye no,” anaadɛ obowie no bɔn. (Mbɛbusɛm 13:20) Sɛ efa hɔn a wɔdɔ Jehovah na wɔsom no no nyɛnko a, wobotum aboa wo ma enye Jehovah ntamu aayɛ papa, na wobotum so aboa wo ma eesisi gyinae pa. Naaso sɛ efa hɔn a wɔnndɔ Jehovah no nyɛnko a, wobotum ama aatwe woho efi Jehovah ho. Iyi ntsi na Bible no tu hɛn fo dɛ yɛnhwɛ yie wɔ hɔn a yɛfa hɔn nyɛnko no ho no! Sɛ yɛfa hɔn a wɔdɔ Jehovah no nyɛnko a, wɔbɔboa hɛn ma hɛn suban aayɛ papa, na dɛmara na hɛn so yebotum aboa hɔn ma woeenya suban pa. Anyɛnkofo a wɔwɔ suban pa no ‘hyehyɛ hɔnho nkuran na wɔboa hɔnho.’—1 Thessalonicafo 5:11, Baebor.
2. Jehovah tse nka dɛn wɔ hɔn a yɛfa hɔn nyɛnko no ho?
Ɔnnyɛ obiara kɛkɛ na Jehovah fa no nyɛnko. Bible no ka dɛ Jehovah ‘nye atseneneefo dzi etsirmsɛm.’ (Mbɛbusɛm 3:32) Ntsi sɛ yɛfa obi a ɔnndɔ Jehovah nyɛnko a, ehwɛ a, ɔbɛtse nka dɛn? Nokwasɛm nye dɛ, ɔbɛyɛ no yaw paa! (Kenkan James 4:4.) Naaso sɛ yɛfa hɔn a wɔdɔ Jehovah no nyɛnko a, n’enyiwa bɛgye na ɔno so bɛfa hɛn nyɛnko.—Ndwom 15:1-4.
PƐNSAPƐNSA MU KƆ EKYIR
Ma yɛnhwɛ siantsir a no ho hia paa dɛ ehwɛ w’anyɛnkofa yie nye kwan a ebɛfa do enya anyɛnkofo pa.
3. Hwɛ yie na aammfa nyɛnko bɔn
Onnyi dɛ yɛfa hɔn a wɔnndɔ Nyankopɔn na wɔmmfa ne mbransɛm nnyɛ hwee no nyɛnko. Ma yɛnhwɛ VIDEO yi, na yensusu asɛmbisa a odzi do no ho.
-
Sɛ yɛannhwɛ no yie a, yɛnye hɔn a wɔnndɔ Jehovah no bɔbɔ ber mpo a hɛn enyi nnda. Ebɛn kwan do?
Ma yɛnkenkan 1 Corinthfo 15:33, na yensusu nsɛmbisa yi ho:
-
Woananom na ɔnnsɛ dɛ yɛnye hɔn bɔ fɛkuw? Ebɛnadze ntsi a?
Ma yɛnkenkan Ndwom 119:63, na yensusu asɛmbisa yi ho:
-
Ebɛnadze na ɔbɛma ehu dɛ obi botum ayɛ nyɛnko pa?
Sɛ edze apple kor pɛ a ɔaprɔw ka dza ɔmmprɔwee ho a, ne nyina bɛsɛɛ. Sɛ ewɔ nyɛnko bɔn kor pɛ mpo a, ebɛn ɔhaw na obotum akɛfa abrɛ wo?
4. Ɔmmfa ho mbrɛ obi tse biara no, sɛ ɔwɔ suban pa nkotsee dze a, yebotum afa no nyɛnko
David na Jonathan yɛ Israelfo mbarimba beenu bi a wɔtsenaa ase. Bible no ma yehu dɛ nna Jonathan enyin kyɛn David koraa. Afei so, nna Jonathan yɛ ɔhen ne ba. Naaso, nna kor nnkɔ nngya ne nyɛnko; nna wɔyɛ anyɛnkofo paa. Ma yɛnkenkan 1 Samuel 18:1, na yensusu asɛmbisa yi ho:
-
Ɔnnyɛ hɛn etsipɛmfo anaa hɔn a yɛnye hɔn wɔ dzibew kor no nkotsee na ɔsɛ dɛ yɛfa hɔn nyɛnko. Ebɛnadze ntsi a?
Ma yɛnkenkan Romefo 1:11, 12, na yensusu asɛmbisa yi ho:
-
Ebɛnadze na anyɛnkofo a wɔdɔ Jehovah no botum ayɛ dze ahyehyɛ hɔnho nkuran?
Kwan a aberantsɛ bi faa do nyaa nyɛnko bi no, nna ɔnnhwɛ kwan koraa. Ma yɛnhwɛ VIDEO yi, na ibohu dza osii. Yewie a, yebosusu nsɛmbisa a odzidzi do no ho.
-
Wɔ video no mu no, ebɛnadze ntsi na hɔn a nna Akil nye hɔn bɔ wɔ skuul mu no ho asɛm haw n’awofo?
-
Nna ebɛnadze ntsi na ɔpɛ dɛ ɔnye dɛm nkorɔfo no bɔ?
-
Ekyir yi ɔbɛtsee nka dɛ ɔnnyɛ ankonam bio. Ebɛnadze na ɔboaa no?
5. Mbrɛ ibesi enya anyɛnkofo pa
Ma yɛnhwɛ VIDEO yi, na ibohu kwan a ibotum afa do enya anyɛnkofo pa, nye ndzɛmba a eyɛ a ɔbɛma ayɛ nyɛnko pa.
Ma yɛnkenkan Mbɛbusɛm 18:24 na 27:17, na yensusu nsɛmbisa yi ho:
-
Ebɛnadze na anyɛnkofo pa yɛ dze boa hɔnho?
-
Aso ewɔ anyɛnkofo pa a wɔtse dɛm? Sɛ innyi bi a, ibesi dɛn enya bi?
Ma yɛnkenkan Philippifo 2:4, na yensusu asɛmbisa yi ho:
-
Sɛ ibotum enya anyɛnkofo pa a, ɔwɔ dɛ woara so eyɛ nyɛnko pa. Ebɛnadze na ibotum ayɛ dze akyerɛ dɛ eyɛ nyɛnko pa?
Sɛ ibotum enya anyɛnkofo pa a, ɔwɔ dɛ woara so eyɛ nyɛnko pa
BINOM KA DƐ: “Ibotum afa nyimpa biara nyɛnko. Ɔnnyɛ hwee.”
-
Sɛ obi ka dɛm a, ebɛn asɛm na ebɛka?
DZA ESUA
Sɛ yɛfa anyɛnkofo pa a, ɔma Jehovah n’enyiwa gye paa, na ɔboa hɛnankasa so.
Mbobɔdo
-
Ehwɛ a, ebɛnadze ntsi na hɔn a yɛfa hɔn nyɛnko no ho hia Jehovah?
-
Woananom na ɔnnsɛ dɛ yɛfa hɔn nyɛnko?
-
Ebɛnadze na ibotum ayɛ na ama eenya anyɛnkofo pa, na ebɛnadze so na ibotum ayɛ ama dɛm anyɛnkofa no mu aayɛ dzen?
HWEHWƐ PII KA HO
Sɛ ekɔ ahokyer mu a, anyɛnkofo pa besi dɛn aboa wo?
“Hyɛ Anyɛnkofa A Enye Wo Nuanom Wɔ No Mu Dzen Ansaana Ewiei No Aba” (Ɔweɔn-Aban, November 2019)
Ebɛn ndzɛmba na ibotum ayɛ ama eenya anyɛnkofo pa?
“Mibesi Dɛn Enya Anyɛnkofo Pa?” (Nsɛm A Mbabun Bisa—Mbuae A Ɔbɔboa Hɔn, Ɔfa 1, tsir 8)
Sɛ epɛ dɛ efa obi nyɛnko wɔ intanɛt do a, ebɛn nsɛm na ɔsɛ dɛ isusu ho?
Wɔ asɛm a wɔato dzin “Nna Morohwehwɛ Obi A Ɔbɛyɛ M’egya” mu no, ibohu adze a ɔboaa banyin bi ma ohun dɛ, ɔsɛ dɛ ɔhwɛ n’anyɛnkofa yie.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
