LESONI 48
Digitaka Vinaka Nomu iTokani
O ira na noda itokani voleka era dau vakamarautaki keda ena gauna vinaka, era na vakayaloqaqataki keda tale ga nida sotava na ituvaki dredre. Ia e veivakasalataki na iVolatabu ni tiko ga eso na itokani vinaka. O na kilai ira vakacava? Dikeva mada e vica na taro qo.
1. Na cava e rawa nira cakava noda itokani?
Eda dau vakatotomuri ira eda veimaliwai vakalevu nida cakava na ka e donu se ka e ca, qori nida veimaliwai kei ira e veisiga se na sala ni veikilai ena Internet. E kaya na iVolatabu, “o koya e vakailala kei ira na vuku ena vuku, ia o koya e veitokani kei ira na lialia [ira na sega ni lomani Jiova] ena tini ca.” (Vosa Vakaibalebale 13:20) Era na vukei iko na itokani era lomani Jiova mo volekati koya, mo vakatulewa tale ga vakavinaka. Ia o ira noda itokani voleka era sega ni qaravi Jiova era na vakavuna meda yawaki koya. Sa rauta me tukuna na iVolatabu meda digi ira vinaka na noda itokani. Ena yaga vei keda nira lomana na Kalou na noda itokani, ena yaga tale ga vei ira. Eda na rawa kina ni ‘veivakayaloqaqataki meda veivakauqeti.’—1 Cesalonaika 5:11.
2. Na cava na rai i Jiova ena itokani o digia?
O Jiova e digitaki ira vinaka na nona itokani. “E veitokani voleka kei ira na yalododonu.” (Vosa Vakaibalebale 3:32) Na cava na rai i Jiova ke da digia na itokani era sega ni lomani koya? Ena sega sara ga ni taleitaka! (Wilika Jemesa 4:4.) Ia ke da cata na ilala ca qai kabiti Jiova kei ira na lomani koya, ena marautaka o Jiova, ena digitaki keda tale ga meda nona itokani.—Same 15:1-4.
VAKEKELI
Dikeva na vuna e bibi kina na itokani o digia, kei na sala mo bucina kina na veitokani ena yaga vei iko.
3. Qarauna na ilala ca
Era ilala ca o ira na sega ni lomana na Kalou kei na nona ivakatagedegede. Sarava na VIDIO, qai veivosakitaka na taro tarava.
-
Sala cava eda rawa ni lai vakailala ca tu kina da qai sega ni liaca?
Wilika 1 Korinica 15:33, qai veivosakitaka na taro qo:
-
O cei o ira na ilala ca? Na vuna?
Wilika Same 119:63, qai veivosakitaka na taro qo:
-
Na itovo cava mo raica vua na itokani?
E dua na yapolo ca e rawa ni vakaleqa na vo ni yapolo. Ena rawa ni vakaleqai iko vakacava e dua na itokani ca?
4. E rawa ni noda itokani vinaka o ira era duidui sara vei keda
Na iVolatabu e vakamacalataka e rua na tagane e Isireli makawa o Tevita kei Jonacani. E veisivi nodrau yabaki qai duidui na kedrau ituvaki. Ia erau veitokani voleka. Wilika 1 Samuela 18:1, qai veivosakitaka na taro qo:
-
Na cava eda kaya kina ni rawa tale ga ni noda itokani o ira eda sega ni taba vata se duidui na kedra ituvaki?
Wilika Roma 1:11, 12, qai veivosakitaka na taro qo:
-
E rawa vakacava nira dau veivakayaloqaqataki na itokani era lomani Jiova?
Sarava ena vidio qo, na nona kunea rawa e dua na itabagone na nona itokani. Sarava na VIDIO, qai veivosakitaka na taro tarava.
-
Ena vidio, na cava erau kauaitaka kina na itubutubu nei Akil na nona itokani e koronivuli?
-
Na cava e taleitaki ira kina na itokani qori o Akil?
-
Sa qai oti vakacava na nona galili?
5. O na kunei ira vakacava na itokani vinaka?
Dikeva na sala mo kunei ira kina na itokani dina, kei na sala mo dua tale ga kina na itokani vinaka. Sarava na VIDIO.
Wilika Vosa Vakaibalebale 18:24 kei na 27:17, qai veivosakitaka na taro qo:
-
Era dau veivukei vakacava na itokani dina?
-
Era tiko nomu itokani va qori? Ke sega, cava o rawa ni cakava?
Wilika Filipai 2:4, qai veivosakitaka na taro qo:
-
Me rawa ni so noda itokani vinaka, e dodonu mo dua sara ga na itokani vinaka. O na cakava vakacava?
Mo rawa ni kunea e dua na itokani vinaka, ena vinakati sara ga e liu mo dua na itokani vinaka
KA ERA KAYA ESO: “E bibi ga me tiko nomu itokani.”
-
Na cava o na kaya?
KA O VULICA
Nida digia vinaka na noda itokani, ena marau o Jiova, ena yaga tale ga vei keda.
Railesuvi
-
Na cava e kauaitaka kina o Jiova na itokani eda digia?
-
Na itokani vakacava meda qarauna?
-
Na cava mo cakava me dei tiko ga kina nomu veitokani?
IKURI
Dikeva na sala era na vukei keda kina na itokani dina ena gauna ni leqa.
“Me Dei Noda Veitokani ni Bera na iCavacava” (Na Vale ni Vakatawa, Noveba 2019)
Dikeva na ka o rawa ni cakava mo kunei ira kina na itokani vinaka.
“Au na Kunea Vakacava na iTokani Vinaka?” (Ra Taroga na iTabagone—Kena iSau, iTabataba 1, wase 8)
Na cava mo kila me baleta na vakailala ena Internet?
O via kila se cava e cakava e dua na turaga me digi ira vinaka nona itokani? Wilika ena ulutaga qo “Au Diva me Dua na Tamaqu.”
“E Veisautaka na Bula na iVolatabu” (Na Vale ni Vakatawa, 1 Epereli, 2012)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
