LÉSON 48
Byen chwazi ou zanmi
Lò nou gen zanmi, nou pouvé pasé bon ti moman ké yé, é yé la osi pou idé nou lò nou gen problèm. Mé Labib-a ka avèrti nou ki a pa tout moun ki pouvé sa roun bon zanmi pou nou. Atò, kouman ou pouvé byen chwazi ou zanmi ? Réfléchi asou késyon-yan ki ka swiv.
1. Poukisa byen chwazi ou zanmi, a roun bagaj ki enpòrtan pou ou ?
Pi ou ka pasé tan ké roun moun pi i ka détenn asou ou. Sa moun-an pouvé mennen bon ouben mové bagaj pou ou. É sa vré osi lò ou ka pasé tan ké sa moun-an asou rézo sosyal. Kou Labib-a ka di : « Moun-an ki ka maché ké moun ki saj ké gen sajès, mé sa-la ki ka frékanté moun ki sòt [sa lé di sa-ya ki pa kontan Jéova] ké gen traka » (Proverbes 13:20). Si ou zanmi kontan Jéova é si yé ka adoré li, yé ké pouvé idé ou pran bon désizyon é fè ou lanmityé ké Jéova vin pi fò. Mé lò nou ka divini zanmi ké moun ki pa kontan Jéova, sa pouvé fè nou pédi nou lanmityé ké li. A pou sa Labib-a ka ankourajé nou byen chwazi nou zanmi ! Lò nou gen zanmi ki kontan Bondjé, sa bon pou nou menm é sa bon pou yé osi. Konsa nou ké pouvé kontinyé ‘ankourajé ké bay nou konpanyen plis fòrs’ (1 Thessaloniciens 5:11).
2. Poukisa byen chwazi ou zanmi, a roun bagaj ki enpòrtan pou Jéova ?
Jéova ka byen chwazi so zanmi. « I ka divini bon zanmi ké moun-yan ki ka maché drèt » (Proverbes 3:32). Kisa Jéova té ké rousanti si nou té ka divini zanmi ké moun ki pa kontan li ? Sa té ké fè li bokou lapenn (li Jacques 4:4). Mé Jéova ké kontan é nou ké divini so zanmi si nou ka rété lwen di mové frékantasyon-yan, si nou ka rété pròch di li é si nou ka divini zanmi ké moun ki kontan li ! (Psaume 15:1-4).
ANNOU FOUYÉ ANNAN LABIB-A
Gadé poukisa sa enpòrtan toubonnman byen chwazi nou zanmi. É gadé osi kouman ou pouvé trapé zanmi ki ké vréman bon pou ou.
3. Panga « mové frékantasyon » !
Moun-yan ki pa kontan Bondjé é ki pa ka obéyi so lalwa, yé sa mové frékantasyon. Gadé VIDÉYO-a, épi kozé asou sa késyon-an :
-
Kouman nou pouvé koumansé gen vyé kalité zanmi san nou pa randé nou kò kont ?
Li 1 Corinthiens 15:33, épi kozé asou sa késyon-an :
-
Ki kalité moun pouvé sa roun mové frékantasyon pou ou ? Poukisa ?
Li Psaume 119:63, épi kozé asou sa késyon-an :
-
Ki kalité zanmi ou divèt chwazi ?
Roun pòm pouri pouvé gaté tout ròt-ya. Atò, kisa roun mové frékantasyon pouvé mennen pou ou ?
4. Moun ki diféran di nou pouvé sa nou bon zanmi
Labib-a ka palé di David ké Jonatan, dé wonm annan pèp Israyèl tan-lontan. David té sa roun bèrjé, Jonatan té sa pitit rwa-a, é i té lontan pi vyé pasé David. Li 1 Samuel 18:1, épi kozé asou sa késyon-an :
-
Poukisa nou zanmi pa bézwen gen menm laj-a ki nou ouben menm sitiasyon ki nou ?
Li Romains 1:11, 12, épi kozé asou sa késyon-an :
-
Kouman zanmi ki kontan Jéova pouvé ankourajé yé konpanyen ?
Gadé annan sa vidéyo-a kouman roun jennjan trapé zanmi koté i pa té ké janmen pansé. Gadé VIDÉYO-a, épi kozé asou sa késyon-yan :
-
Annan vidéyo-a, poukisa manman ké papa Akil té enkyèt akoz di zanmi i té gen lékòl ?
-
Poukisa Akil koumansé divini zanmi ké jennjan-yan annan so lékòl ?
-
Kisa ki idé l’ pa santi so kò tousèl ankò ?
5. Kouman ou pouvé gen bon zanmi
Kouman ou pouvé trapé vré zanmi ? Kouman ou pouvé sa roun bon zanmi ? Gadé VIDÉYO-a.
Li Proverbes 18:24 ké 27:17, épi kozé asou sa késyon-yan :
-
Kouman vré zanmi ka idé yé konpanyen ?
-
Ès ou gen zanmi konsa ? Si ou pa gen zanmi konsa, kisa ou pouvé fè pou trapé vré zanmi ?
Li Philippiens 2:4, épi kozé asou sa késyon-an :
-
Si ou lé gen vré zanmi, ou menm ou divèt sa roun bon zanmi. Kouman ou pouvé rivé sa roun bon zanmi ?
Pou gen bon zanmi, ou divèt sa roun bon zanmi.
I GEN MOUN KA DI : « Si to tro konparézon lò to ka chwazi to zanmi, ében to ké rété to ké to kò. »
-
Kisa ou té ké di ?
SA NOU WÈ
Lò nou ka pran tan byen chwazi nou zanmi, a roun bon bagaj pou nou é sa ka fè tchò Jéova kontan.
Kisa ou anprann
-
Poukisa byen chwazi nou zanmi a roun bagaj ki enpòrtan pou Jéova ?
-
Ké ki kalité zanmi nou pa divèt maché ?
-
Kouman nou pouvé gen roun lanmityé ki fò ké moun ki kontan Jéova ?
SA OU POUVÉ TRAPÉ OSI
Gadé kouman vré zanmi pouvé idé nou lò nou anba dlò.
« Noue des amitiés solides avant que la fin arrive » (La Tour de Garde, novanm 2019)
Gadé kisa ou pouvé fè pou gen bon zanmi.
« Comment choisir mes amis ? » (Les jeunes s’interrogent. Réponses pratiques [volume 1], chapit 8)
Kisa ou divèt savé asou zafè chaché zanmi asou Entèrnèt ?
Li istwè roun jennjan ki désidé chanjé zanmi (istwè mo lavi : « J’avais tant besoin d’un père ! »).
« La Bible transforme des vies » (La Tour de Garde, 1é avril 2012)