Bẹẹ díì díílá kóò ólò naa kọọ̀ nyíéi á palàge ẹẹ tṍó e dìtõ̀ò léeí ló vaá bà ólò sièi kpóó ló tṍó e dìtõ̀ò tavàlàí ló. Sõò Kpá Káí kọ́ọ̀ níì dénè nen ní ea dú lé kóò e nì. Vóà naa, mósĩ́ deè ní eo é láá sà lé kóò eo é bãaà ẽ? Bugi togó boo gbò bíbví.

1. Éé ní e gbò kóò eo bãaà é láá naa ní ló é?

È ólò gbĩ́ gè belí gbò e zọọ̀ naaá nu. Gbò e zọọ̀ naaá nu é láá naa kọ é dú lé àbèè pọ́lọ́, kọbèè è ólò zọ̀ va naaá nú sĩ́ nè sĩ́ àbèè tenmá boo íntanèt. Dì belí bé e Kpá Káí kọ́ naa, “nen ea zọ neǹ nyìmànù gbá tọ é nyímá nu, sõò nu é bẽ́é ló nen ea zọ nen ból [gbò e bà náa vulè Jìhóvà] naaá nu.” (Próvẹẹ̀b 13:20) Gbò e bà vulè Jìhóvà vaá fã̀e é láá nvèè bá nè ni kọ ó kilsĩ́ gè tõo bã̀é ló vaá nè lé béèlàfùl. Sõò, be è túù gbò e bà náa vulè Jìhóvà naamá bẹẹ díì díílá kóò, bàé láá naa kọ é òòà aa ló gè fã̀ Jìhóvà. Níà nú ea náa vaá Kpá Káí à sièi kpóó ló kọ é tú nyìmànù sààmà bẹẹ kóò e! Be è bãaà kóò gbò e bà vulè Jìhóvà, bàé náa kọ é naa nú ea dú lé vaá beele é náa nagé kọọ̀ baala á naa nú ea dú lé. Èé gbóó láá kilsĩ́ gè ‘nvèè kpóó ló ene vaá nvèè bá nè ene.’—1 Tẹ̀sàlónaikà 5:11.

2. Gbò kóò eo bãaà tọ́á ló Jìhóvà naa vàẹ?

Jìhóvà ólò tú ọ̀ẹ̀ dẽe sààmà pá a kóò. “À ólò zọ̀ nen ea tõo lèlà bã̀àà díì díílá kóò.” (Próvẹẹ̀b 3:32) Àé tọ́á ló Jìhóvà naa vàẹ be è bãaà kóò gbò e bà náa vulèè é? Àé palàge biilée nyíe! (Bugi Jém̀z 4:4.) Sõò be à gá náa vaá è tõo bã ló Jìhóvà vaá bã̀àà kóò gbò e bà vulèe, nyíè Jìhóvà é ẹ́ẹí ló vaá àé túi naamá pá a kóò.—Psalm 15:1-4.

 KPÁÁ NÓ BỌ̀Ọ̀VẸ̀

4. Gbò e bà dú kele ló beele é láá dú bẹẹ lé kóò

Kpá Káí kọ́ nu ea kil ló Dévìd nè Jónatàn e ba beè di Ízràẹ̀l deè kéléá. Jónatàn beè palàge nomá Dévìd vaá a beè du nágé sã́áná méné; sõò, ba beè duá díì díílá kóò. Bugi 1 Sámuẹ̀l 18:1, vaá ò gbóó aalai nakà bíbví:

• Éé ní ea náa vaá náa bọ́ló kọọ̀ gbò eé bãàà kóò á dú áá bẹẹ sĩ́ gbò àbèè gbò e ólò gbá naa tẽ̀ènè íb nu ẽ́?

Bugi Róm̀ 1:11, 12, vaá ò gbóó aalai nakà bíbví:

• Mósĩ́ deè ní e gbò kóò e bà vulè Jìhóvà é láá gbá siè kpóó ló ene ẽ́?

Mm̀ vídiòí, ẹ̀b bé e ene kà nvín ãa gbálà beè bã̀àà kóò gbẹá kiẽ́e e náa beè ẹ̀bmà dẽe naa. Bìlà VÍDIÒÍ, vaá ò gbóó aalai bíb ea nyoone.

• Mm̀ vídiòá, éé ní ea náa vaá tẹ̀ nè kà Akil beè ié tã̀àgã̀ bùlà ea kil ló gbò ea géè zọ̀ naaá nu gbẹá tọọ̀ kpá ẹ́?

• Éé ní ea beè zẹ́ẹ́ naa kọọ̀ gbò ea géè zọ̀ naaá nuá á palàge leemáe ẽ́?

• Éé ní ea beè nvèè bá nèe kọ á gá tõonáé ló kọ à dúè áá ẹ̀ẹ̀ ẹ?

 5. Bé eo é láá bã̀àà lé kóò naa

 NÚ E NI NÓ

Tṍó e túù nyìmànù sààmà bẹẹ kóò, nyíè Jìhóvà ólò ẹẹ vaá à ólò dọ̀ bélè nèi.

Ge Òòa Boo

• Éé ní ea náa vaá íb gbò e bãaà kóò à bọọ́ ló Jìhóvà ẹ?

• Mó íb gbò ní e bè náa bọ́ló kọ é bã̀àà kóò e?

• Mósĩ́ deè ní eo é láá zọ̀ gbò e bà vulè Jìhóvà bã̀àà díì díílá kóò e?