Ɓəlan nɛlɛɛɠaa akɛ gu yəi, gwa diɛni guɔ lowai kɛ gee ɓa, yili a gu wɔ kwəinɛɛ ta pɛlɛma ə lɛɛ mɛni ɲaanwanaa a laa guɔ, da gu hwaŋalɔ. Kəlaa Biblə a mo yɛ ma nu kəlee hwəi a pɛli kɛi a ɓəlan nɛlɛɛ. Yili ɓa, ya tɛɛ ləi ə́i ɓəlaa həɠə ɉu a nɛlɛɛ ? Gu gaa pələi Biblə a pɛli kpɔnmaa tɛɛ la gu pɔ.

1. Lə mɛni ɓa maanɛɛ gu gu ɓəlaa həɠə ɉu a nɛlɛɛ ?

Gwa nua gwa kɛi lowai kɛ gee ɓa, gwa kɛ yɛ diɛ. Gwa nuai tii gwa pɛli gu kɛ kɛɛnaa tanɔn awala kɛtii gwa pɛli guɔ gu kee kaa internet ɓa. Yili a pɛli ə kɛ a mɛni lɛlɛɛ awala kɛtii a mɛni ɲɔnwɔɔn. Yɛ pələi Biblə a mo la, “ nui a hwilɛn kilimaa nua pɔ, a kɛ a kilimaa mun, nui a kanan kilikpɛɛgwəi nua diɛ [yili mukulaa ɓaa nuai Zehova wɛli ho diɛ,] a ɉu mɔnɔ mii ” (Hanwon 13:20). Gu ɓəlaa da kɛ a nuai Zehova wɛli kaa diɛ, da pɛli di kpɔnmaa tɛɛ gu pɔ gu gu maalɛɠɛ Zehova ɓa ə lɛɛ gu mɛniɠaa həɠə ɉu a nɛlɛɛ. Kəlaa gu ɓəlaa da kɛ a nuai Zehova wɛli ho diɛ, da pɛli di gu maakwea Zehova ɓa. Yili ɓə a gɛ Biblə yɛ gu hwaŋalɔ ə gɛ gu gu ɓəlaa həɠə ɉu a nɛlɛɛ. Yili ɓa gwa gu ɓəlaa həɠə ɉu a nɛlɛɛ, gwa bulu mɛinɛɛ hɔlɔɓo, diɛ kpɛlima da yili pulu mɛinɛɛ hɔlɔɓo. Yɛ pələi Biblə a mo la, gwa pɛli gu gu ‘ keeni hwaŋalɔ a yələ kələi, guɔ gu keeni liikpələ ’ (Tesalonikə dɔlɔɔ 5:11).

2. Pələi gwa gu ɓəlaa həɠə la ɉu, lə mɛni ɓa yili maamɛni wala-walai Zehova ɲɛi mu ?

Nu lɔpee gəlee hwəi Zehova a ɉəɠə ɉu a məlan. “ Nu haŋaaɠaa wɛli kaa ma, ” diɛ ɓə a di həɠə ɉu a məlaa (Hanwon 3:32 ; Ɉakə 2:23). Gwa nua həɠə ɉu a gu ɓəlaa diɛi Zehova wɛli ho diɛ, lə ɓə yili a gɛ Zehova ɓa ? Yili a hee ɉu kpɔ kɛnɛ (Ɉakə 4:4 ɓo). Kəlaa nuai Zehova wɛli kaa diɛ, gwa diɛni gwa kɛi hiɛ, gu hiɛ gee pulu ɲɔnwɔɔɠaa lɛɛ laa, gwa kɛ a Zehova məlaa (Maatɛnɛ 15:​1-4).

 Ə́ WƆ MƐNIKƆLƆNŊAA TA PƐLƐ MA

4. Nuai gwa diɛni gu ho ɉu tanɔn, gwa diɛni gwa pɛli gu ɓəlannaa lɛlɛɛ kɛ

Məlannaa lɛlɛɛ kɛ Davidə da Ɉonatan di lowai, Biblə a maamɛni ɓo. Ya pa Davidə ə kɛ a ɓəlaa pulu mun, ə lɛɛ Ɉonatan yɛ ɓo a tɔɔmun non. Ə lɛɛ nwɔnɔ di kaa kwəlan ho kɛ tanɔn. Pələi ma ə kɛ la tii yili ho kpean di wɔ ɓəlannaa tɔwɔ. Samuɛlə dɔlɔɔ 18:1 ɓo, ə lɛɛ ka lono kɛ gɛɛmaalən ŋɛi mɛi :

• Nua gwa diɛni gu kaa ɉu tanɔn awala kɛtii gu kaa kwəlan yɛ ɓo tanɔn, lə mɛni ɓa diɛ lɔ hwəi da pɛli di kɛ a gu ɓəlaa ?

Romə 1:​11, 12 ɓo, ə lɛɛ ka lono kɛ gɛɛmaalən ŋɛi mɛi :

• Nua da kɛ a ɓəlanŋaa, Zehova wɛli yɛ ɓo diɛ, da di kee ni hwaŋalɔ ləi ?

Vidio ŋɛi hu, gaa pələi nan non ɉulɔnon ta da nan non ɉulɔnu dakpɛli diɛi di kaa-kwəlan ho kɛ tanɔn di pɛli ɓəlannaa kɛi la. VIDIO kaa, ə lɛɛ ka lono kɛ gɛɛmaalənŋaa ŋɛi mɛi.

• Vidio hu, lə mɛni ɓa Akil kaanua di kɛi di liihɛlɛn ŋɔ ɓəlannaa maamɛni ɓa ɲəi nakwəlitaa ?

• Lə mɛni ɓa muhəɠəninɛɠaa ŋɛi kɛ ɲəi nakwəlitaa, di wɔ ɓəlannaa wɛli ə too ma ?

• Lə ɓə kpɔnmaa tɛɛ bɔ ə gɛ ho kea gbɔɔ kaa dɔnɔ koɉu ?

 5. Pələi gwa pɛli ɓəlannaa lɛlɛɛ kɛi la

 YII GU GALAN

Gwa gu ɓəlaa həɠə ɉu a nɛlɛɛ gwa yili pulu mɛinɛɛ tamaa hɔlɔɓo ə lɛɛ gwa Zehova kwəinɛɛ.

Nɛɛ ə́ kili pɔ

• Gwa gu ɓəlaa həɠə ɉu a nɛlɛɛ, lə mɛni ɓa yili maamɛni wala-walaa Zehova ɲɛi mu ?

• Ɓəlannaa huwu ləkɛɛ ɓə mahonɛɛli guɔ gɛ ?

• Ya pɛli ɓəlannaa leelee hɔlɔɓoi ləi ?