Waʼaleewajaale namaa na wayuu anakana akuwaʼipa, talateerü waaʼin natuma jee namülialeerü waaʼin weʼrüle müliaa. Jülüjainjatpejeʼe waaʼin tü sümakat tü Bibliakat waneeküinjanapa na waʼaleewainkana. ¿Kasa paaʼinrajatka süpüla püneeküin na anakana süpüla paʼaleewain? Wekirajaa sünain tü paaʼinrajatkat.

1. ¿Jameerü pukuwaʼipa natuma na paʼaleewajaakana amaa?

Aleewale pia namaa na wayuu anakana akuwaʼipa, aneerü pukuwaʼipa jee aleewale pia namaa na mojukana akuwaʼipa mojeerü pukuwaʼipa jaʼitainna paʼaleewajaain namaa suluʼupünaa redes sociales. «Kekiijeechi maʼin wanee wayuu naʼaleewajaale nümaa chi wayuu kekiikai maʼin. Mojeerü nukuwaʼipa wanee wayuu naʼaleewajaale nümaa chi wayuu eekai mojulaain [chia nia chi maalinkai apüla Jehová]» müsü tü Bibliakat (Proverbios 13:20). Waʼaleewajaale namaa na wayuu aikana apüla Jehová jee aʼwaajakana nia, nakaalinjeena waya süpüla aleewain maʼin waya nümaa jee süpüla anain watuma tü waneekakat. Paʼaleewajaale namaa na nnojoliikana anain akuwaʼipa, nakayaleʼereechi pia nuulia Jehová. Shiajaʼa sümaka tü Bibliakat wamüin anainjatüin nakuwaʼipa na wayuu waʼaleewajaakana amaa. Aire napüla Maleiwa na waʼaleewainkana, natütüleʼereerü waaʼin soʼunnaa müliaa. Müshiʼiya wayakana, watütüleʼereerü naaʼin (1 Tesalónica 5:11).

2. ¿Anasüche nümüin Jehová waʼaleewajaale sümaa wayuu eeka eein?

Nüneeküin Jehová na wayuu naʼaleewajaakana amaa. Saashin tü Bibliakat, aleewashi maʼin nia namaa na wayuu lotokana akuwaʼipa (Proverbios 3:32). ¿Jameetche naaʼin Jehová aleewale waya namaa na nnojoliikana alin apüla nia? Mojeerü naaʼin watuma (paashajeʼera Santiago 4:4). Wayoutule aleewaa namaa na nnojoliikana anain süpüla waʼaleewain, arütkaajeena waya nünain Maleiwa jee nanain na aikana apüla nia. Talateerü naaʼin Jehová jee aleeweechi nia wamaa (Salmo 15:1-4).

 WEKIRAJAA SOOʼOMÜIN

4. Jaʼitairü naatain nakuwaʼipa na wawalayuukana, eeshii süpüla waʼaleewajaain namaa

Süküjain tü Bibliakat nüchiki David otta Jonatán, chejeʼewalii naya suluʼu tü mmakat Israel. Mayaainjeʼe nnojoluin wanaawain nouyase jee nakuwaʼipa, aleewashii maʼin naya. Jaashajeʼera 1 Samuel 18:1 otta yooto jia süchiki tüü:

• ¿Wanaawainjatche nouyase wamaa jee nakuwaʼipa na waʼaleewainkana?

Jaashajeʼera Roma 1:11, 12 otta yooto jia süchiki tüü:

• ¿Kasa naaʼinraka na aikana apüla Jehová süpüla natütüleʼerajiraain naaʼin?

Eeshi wanee jimaʼai aleewalaʼa makai nümaa wanee wawala anakai süpüla naʼaleewain. Jünaja tü VIDEOKOT otta yooto jia süchiki tüü:

• ¿Jamüsü shapaaka naaʼin na wayuu kachooinkana Akil saaʼu naʼaleewajaain namaa na koleejiajiraakana nümaa?

• ¿Jamüsü kamalainka paala nümüin Akil aleewajiraain nia namaa naya tepichikana?

• ¿Kasa naaʼinraka süpüla nnojoluinjatüin mojuin naaʼin süka maʼaleewain nia?

 5. ¿Kasa paaʼinrajatka süpüla paʼaleewajaain namaa na wayuu aikana apüla Maleiwa?