LEKSION 48
Pilia sing Maayo ang Imo mga Abyan
Nalipay kita kon upod naton ang aton suod nga mga abyan, kag ginabuligan nila kita sa tion sang kabudlayan. Pero nagpaandam ang Biblia nga indi tanan maayo nga abyan. Gani, paano ka makapili sing maayo nga mga abyan? Binagbinaga ang masunod nga mga pamangkot.
1. Ano ang epekto sang imo mga abyan sa imo?
Kon pirme naton upod ang isa ka tawo, mailog naton ang iya batasan, maayo man ini ukon malain. Matuod gid ini kon kaupod naton sia sa personal ukon sa social media. Ang Biblia nagasiling nga “ang tawo nga nagaupod sa maalamon mangin maalamon man, apang ang tawo nga nagaupod sa mga buangbuang [ukon ang mga wala nagapalangga kay Jehova] mapahamak.” (Hulubaton 13:20) Ang mga abyan nga nagapalangga kag nagasimba kay Jehova makabulig sa imo nga padayon nga mangin malapit sa iya kag makahimo sing maayo nga mga desisyon. Pero ang suod nga mga abyan nga wala nagapalangga kay Jehova makapalayo sa aton sa iya. Amo kon ngaa ginasilingan kita sang Biblia nga pilion naton sing maayo ang aton mga abyan. Kon ang aton mga abyan nagapalangga sa Dios, makabenepisyo kita kag sila man. Padayon naton nga ‘mapalig-on ang isa kag isa.’—1 Tesalonica 5:11.
2. Ano ang epekto kay Jehova sang imo ginapili nga mga abyan?
Ginapili ni Jehova sing maayo ang iya mga abyan. “Nagapakig-abyan Sia sing suod sa mga matarong.” (Hulubaton 3:32) Ano ang batyagon ni Jehova kon ang pilion naton nga mga abyan wala nagapalangga sa iya? Masubuan gid sia. (Basaha ang Santiago 4:4.) Pero, malipay gid si Jehova kag pilion niya kita nga mangin abyan kon tinguhaan naton nga mangin malapit sa iya kag sa mga nagapalangga sa iya kag likawan naton ang malain nga kaupdanan.—Salmo 15:1-4.
USISAA PA GID
Usisaon naton kon ngaa importante nga pilion naton sing maayo ang aton mga abyan kag kon paano ka makakita sing matuod nga mga abyan nga maayo ang impluwensia sa imo.
3. Likawi ang malain nga kaupdanan
Ang malain nga kaupdanan amo ang mga tawo nga wala nagapalangga sa Dios kag wala nagasunod sa iya kasuguan. Tan-awa ang VIDEO, dayon binagbinaga ang masunod nga pamangkot.
-
Paano kita nagapakig-upod sa malain nga kaupdanan nga indi naton mabal-an?
Basaha ang 1 Corinto 15:33, dayon binagbinaga ini nga mga pamangkot:
-
Ano nga klase sang tawo ang masiling mo nga malain nga impluwensia sa imo? Ngaa?
Basaha ang Salmo 119:63, dayon binagbinaga ini nga pamangkot:
-
Ano ang dapat mo pangitaon sa isa ka abyan?
Ang isa ka dunot nga mansanas makaapekto sa iban. Ano ang epekto sang malain nga kaupdanan sa imo?
4. Puede naton mangin abyan ang lainlain nga tawo
Ang Biblia nagasugid parte sa duha ka lalaki sa Israel sang una nga si David kag si Jonatan. Si Jonatan mas magulang kay David kag bata sia sang hari, pero suod gid sila nga mag-abyan. Basaha ang 1 Samuel 18:1, dayon binagbinaga ini nga pamangkot:
-
Ngaa dapat ang aton mga abyan indi lang ang aton kaedad ukon pareho sang pangabuhi sa aton?
Basaha ang Roma 1:11, 12, dayon binagbinaga ini nga pamangkot:
-
Ano ang himuon sang mga mag-abyan nga nagapalangga kay Jehova para mapalig-on nila ang isa kag isa?
Sa video, tan-awa kon paano nakakita ang isa ka pamatan-on nga brother sang wala ginapaabot nga mga abyan. Tan-awa ang VIDEO, dayon binagbinaga ang masunod nga mga pamangkot.
-
Sa video, ngaa nabalaka ang mga ginikanan ni Akil sa iya mga abyan sa eskwelahan?
-
Sang primero, ngaa nanamian sia sa sini nga mga abyan?
-
Ano ang ginhimo niya para madula ang iya kasubo?
5. Kon paano makakita sing matuod nga mga abyan
Binagbinaga kon paano makakita sing matuod nga mga abyan, kag kon paano ka mangin matuod nga abyan. Tan-awa ang VIDEO.
Basaha ang Hulubaton 18:24 kag 27:17, dayon binagbinaga ini nga mga pamangkot:
-
Paano nagabuligay ang matuod nga mag-abyan?
-
May matuod ka man bala nga mga abyan? Kon wala, paano ka makakita?
Basaha ang Filipos 2:4, dayon binagbinaga ini nga pamangkot:
-
Para makakita sing matuod nga mga abyan, dapat ka mangin matuod nga abyan. Paano mo ina himuon?
Para makakita sing matuod nga mga abyan, dapat ka mangin matuod nga abyan
KON MAGSILING ANG IBAN: “OK lang nga bisan sin-o ang imo abyan sangsa wala ka sing abyan.”
-
Ano ang isabat mo?
SUMARYO
Kon pilion naton sing maayo ang aton mga abyan, mapalipay naton si Jehova kag makabenepisyo kita.
Rebyu
-
Ngaa importante kay Jehova ang aton pilion nga mga abyan?
-
Ano nga klase sang mga abyan ang dapat naton likawan?
-
Paano ka makakita sing maayo nga mga abyan?
DUGANG NGA IMPORMASYON
Basaha kon paano ang matuod nga mga abyan makabulig sa aton sa tion sang kabudlayan.
“Pabakuron Naton ang Aton Pag-abyanay Antes Mag-abot ang Katapusan” (Ang Lalantawan, Nobiembre 2019)
Binagbinaga kon ano ang puede mo himuon para makakita ka sing matuod nga mga abyan kag kon paano ka mangin matuod nga abyan.
“How Can I Make Good Friends?” (Questions Young People Ask, Volume 1, kapitulo 8)
Ano ang dapat mo mahibaluan parte sa pagpili sing mga friend mo online?
Sa eksperiensia nga “Ginhandum Ko ang Pagpalangga sang Isa ka Amay,” hibalua kon ngaa ginbag-o sang isa ka lalaki ang iya pagpili sang mga abyan.
“Ang Biblia Nagapabag-o sang Kabuhi” (Ang Lalantawan, Abril 1, 2012)
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
