EHONGWA 48
Toorora omapanga woye nongengezero
Omapanga omawa ye tu etera ondjoroka, nu wina ye tu yanḓiparisa moruveze rwouzeu. Posi ya, Ombeibela i tu rakiza kutja kavandu avehe mbe ri omapanga omawa. Ku nao, hapo ove mo yenene vi okutoorora omapanga omawa? Tara komapuriro ngu maye kongorere mba.
1. Omapanga ngu mo toorora ye ku ṱuna momuano uṋe?
Eṱe potuingi tu horera kongaro yovandu mbu tu kara pamwe. Nu ihi tji yenena okutuṱuna momuano omuwa poo omuvi. Imbwo ouatjiri nandarire kutja matu twa po oruveze okukara pu na wo poo okuhakaena morungovi. Ombeibela i tja: “Kara puna ozonongo nu mo rire onongo. Tji mo tjiti oupanga novandu omayova [imba mbe ha suvera Jehova] mo nyonoka.” (Omiano 13:20) Omapanga nga suvera Jehova nu nge rikotamena ku ye, maye yenene okukuvatera kutja u kare popezu na ye, nokukuvatera kutja u tjite ozondando ozombwa. Posi ya tji tu nomapanga nge ha suvera Jehova, owo maye yenene okutjita kutja tu humburuke kokure na ye. Mena ranao, Ombeibela opu i zokututunduuza kutja tu toorore omapanga wetu nongengezero. Indu omapanga wetu tji ye ri ovandu mba suvera Mukuru, ku eta ouwa ku eṱe na ku wo. Nu tu yenena ‘okupandiparisasana nokuvaterasana.’—1 Ovatesalonika 5:11.
2. Jehova u fula vi ohunga nomapanga ngu mo toorora?
Jehova u toorora omapanga we nongengezero. “Eye u yakura ovasemba nouṱakame.” (Omiano 3:32) Hapo Jehova ma fula vi indu tji twa toorora omapanga nge he mu suvera? Eye ma fula navi tjinene. (Lesa Jakobus 4:4.) Posi ya, Jehova ma kara nonyuṋe nu me tu toorora otjomapanga we, indu tji twa nakaura omapanga omavi natu tumbuka popezu na ye na imba mbe mu suvera.—Epsalme 15:1-4.
KONḒONONA OUKOTO
Konḓonona kutja ongwaye tje ri ounanḓengu okutoorora omapanga omawa, nu tara komuano mu mo yenene okukara nomapanga ngu maye ku etere ouwa.
3. Ritjevera komapanga omavi
Ovandu mbe ha suvera Mukuru nomirari vye, omapanga omavi. Nyanda OKAVIDIO, nu okuzambo hungirira kepuriro ndi mari kongorera mba.
-
Omomuano uṋe mu mape ya atu utu okukara pu nomapanga omavi ngunda atu hi nokutjiwa?
Lesa 1 Ovakorinte 15:33, nu okuzambo hungirira komapuriro nga:
-
Epanga evi kove omundu ngu ri vi? Omena raye?
Lesa Epsalme 119:63, nu okuzambo hungirira kepuriro ndi:
-
Ovikwaye mbi mo sokupaha mepanga?
Otjiyapela tjimwe tji tja wora matji yenene okuzunḓa vyarwe. Okukara nepanga rimwe evi maku ku ṱunu momuano uṋe?
4. Ovandu mba panguka ku eṱe mave yenene okurira omapanga wetu omawa
Ombeibela i hungira ohunga na David na Jonatan, ovarumendu vevari mba turire moIsrael otjikuru. Jonatan wa ri omunene tjinene pu David, nu wa ri omuatje wombara. Nungwari, owo va ri noupanga ouwa kumwe. Lesa 1 Samuel 18:1, nu okuzambo hungirira kepuriro ndi:
-
Ongwaye tji tu ha sokutjita omapanga ku nomakura wetu uriri, poo ku novandu mbe varwa otjovananḓengu i varwe?
Lesa Ovaroma 1:11, 12, nu okuzambo hungirira kepuriro ndi:
-
Omomuano uṋe omapanga nga suvera Jehova mu maye yenene okutunduuzasana?
Mokavidio, tara omuano omurumendu omukambure ma muna omapanga potuveze pe hi na aa undjire ko. Nyanda OKAVIDIO, nu okuzambo hungirira komapuriro ngu maye kongorere mba.
-
Mokavidio, ongwaye ovanene va Akil tjaave rikende ohunga nomapanga nga ri na wo poskole?
-
Ovikwaye mbya tjita kutja ma vange okukara noupanga mbwo?
-
Omomuano uṋe ma yenena okutuurunga ourike?
5. Omuano mu mo yenene okukara nomapanga omawa
Tara komuano mu mo yenene okumuna omapanga watjiri, nomuano mu mo yenene okurira epanga ewa wina. Nyanda OKAVIDIO.
Lesa Omiano 18:24 no 27:17, nu okuzambo hungirira komapuriro nga:
-
Omomuano uṋe omapanga watjiri mu ye vaterasana?
-
Hapo ove u nomapanga omawa otja ingo? Tji pe he ri nao, mo yenene vi okukara nomapanga ngo?
Lesa Ovafilipi 2:4, nu okuzambo hungirira kepuriro ndi:
-
Tji mo vanga okukara nomapanga omawa, ove mo hepa okurira epanga ewa. Omomuano uṋe mu mo yenene okutjita nao?
Tji mo vanga okukara nomapanga omawa, ove mo hepa okurira epanga ewa
OVANDU TJIVA VE TJA: “Okukara nepanga ngamwa arihe mape ngara, pokuhinokukara nepanga oparukaze.”
-
Ove otjo tja vi?
OKUYARUKIRA PO OUSUPI
Indu tji matu toorora omapanga wetu nongengezero, tu yorokisa Jehova nu tu rietera oveni ouwa.
Okurizemburukisa
-
Ongwaye Jehova tje nakonatja nomapanga ngu matu toorora?
-
Ovandu mbe ri vi mbu tu ha sokutoorora otjomapanga wetu?
-
Mo yenene vi okutunga oupanga oupame ku nomapanga omawa?
RIHONGA OVINGI
Tara kutja omapanga omawa maye yenene vi okutuvatera moruveze rwouzeu.
“Tunga oupanga oupame kuna varwe ngunda omaandero aye hiye ya” (Oruhungu, Novemba 2019)
Tara koviṋa mbi mo yenene okutjita kutja u tjite omapanga omawa.
Ovikwaye mbi mo sokutjiwa ohunga nomapanga ngu mo yenene okuyevaza morungovi?
Mehungi ndi “Ee zeri okukara na tate,” tara kutja ongwaye omurumendu umwe tja toorora omapanga warwe.
“Ombeibela i rundurura omiinyo vyovandu” (Oruhungu, 1 ku April, 2012)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
