UKỌCHẸ 48
D’ibe Tu Amonukwu Wẹ
Amonukwu wa ad’uyọ manyu uyọ ñwu wa iko k’ẹñwu anyọ ñwu wa, ma la ad’ugbẹdọ ñwu wa iko k’ẹñwu gbiti. Ama, Baibul d’ufeti ñwu wa kakini i ch’ọgbọdu amonẹ ch’onukwu ọmẹmẹlẹ n. Abu ẹ neke tu onukwu ọmẹmẹlẹ? Kpibe oji am’ene-i.
1. Ẹñwu chi ki nyọ k’a tu amonukwu wa nyọnyọ?
Ichẹñwu k’a dugbo amonẹ iko duu, dagba ki ch’eju kp’eju abẹki oji intanẹti, a na ch’ichi dab’ama lọna ẹnyọ abẹki ẹbiẹnẹ. Baibul kakini, “ẹnẹ ki ab’anibe kpẹrẹ an’ibe, ama ẹnẹ ki ch’ẹnumana amakẹdọn’ọla-ma [abo ku ma ma fẹdọ Jihofa n] akpabiẹ.” (Ita Ita 13:20) Abo ki afẹdọ Jihofa ku ma la ar’ọ neke ch’atẹko wẹ k’ẹ mẹru Jihofa nyọnyọ k’ẹ la tu ẹñwu ẹnyọ iko duu. Ama ichẹñwu k’a ch’onukwu kp’abo ku ma ma rẹ Jihofa n, ma neke jẹñwu wa le jiji b’Ọjọ tẹ. Todulẹ, Baibul d’ufeti ñwu wa k’a d’ibe tu onukwu wa nyọnyọ! Ichẹñwu k’amonukwu wa ch’abo ki afẹdọ Jihofa, a na n’ile ọmẹmẹlẹ kwugbo ma, ama onugo an’ile ọmẹmẹlẹ kwugbo wa. E-lẹ ajẹñwu wa k’a na ‘d’ugbẹdọ ñwu omunẹ, k’a ne omunẹ nyọgba.’—1 Abo Tẹsẹlonaika 5:11.
2. Abu ẹdọ Jihofa adẹ lugbo amonukwu k’ẹ tu?
Jihofa atu amonukwu-wñ nyọnyọ. “Alu k’of’ọla-wñ dẹ muda d’ugbo abo ku ma che ẹñwu t’eju-wñ.” (Ita Ita 3:32) Abu ẹdọ Jihofa ana dẹ ichẹñwu k’a tu amonukwu ki ma fẹdọ Jihofa n? Ẹdọ-wñ ana kpabiẹ nyọnyọ! (Gba Jemis 4:4.) Ama, ẹdọ Jihofa ana bọ ichẹñwu k’a tu amonukwu ọmẹmẹlẹ, k’a la achẹñwu duu k’a neke che k’a neke tẹmẹru owñ kpai abo ku ma afẹdọ-wñ.—Eli Ekọ D’Ọjọ 15:1-4.
N’UMA NYỌGBA
Kọchẹ ẹñwu ki chi ki chẹñwu ogbogaga k’a tu amonukwu ọmẹmẹlẹ kpai ọna ki en’amonukwu ọmẹmẹlẹ neke nyọ ñwu wa.
3. F’eju fẹranẹ k’ẹ we tu amonukwu ẹbiẹnẹ
Abo ku ma ma fẹdọ Jihofa n, ku ma ma ñọ leb’ọda-wñ n, ch’onukwu ẹbiẹnẹ. G’IFIDIO-i, ubilẹ mẹ ch’oluka oji ene-i.
-
Ọna ẹñwu a neke chanẹ ech’onukwu kp’abo ẹbiẹnẹ k’onugo wa ma ma n?
Gba 1 Abo Kọrint 15:33, ubilẹ mẹ ch’oluka oji am’ene-i:
-
Ọla ẹnẹ neke ch’onukwu ẹbiẹnẹ ñwẹ? Ẹñwu chi k’ẹ kabalẹ?
Gba Eli Ekọ D’Ọjọ 119:63, ubilẹ mẹ ch’oluka oji ene-i:
-
Ẹñwu ajẹñwu ẹ ma ichẹñwu k’ẹnẹ ka ch’onukwu ọmẹmẹlẹ ñwẹ?
Ichẹñwu ki Apu ka chẹ kpabiẹ, i neke kp’abo e-ki bọ biẹ. Abu onukwu ẹbiẹnẹ ka neke kp’ẹ biẹ le?
4. A neke ch’onukwu ọmẹmẹlẹ kp’abo ku ma ch’ojoji ñwu wa
Baibul kọla lugbo ẹnẹkẹlẹ meji ojanẹ Israẹl iko igbele k’odu ma kọ Defid kpai Jonatan. Ọdọ ma kpai uña ma ch’ojoji ñwu ọlama. Tabalẹ, ma ch’onukwu ọmẹmẹlẹ. Gba 1 Samiuẹl 18:1, ubilẹ mẹ ch’oluka oji ene-i:
-
Ẹñwu chi ki ma ch’udu i che k’amonukwu wa ki ch’eju ẹgọ wa abẹki ku ma d’uña kate kp’awa n?
Gba Abo Rom 1:11, 12, ubilẹ mẹ ch’oluka oji ene-i:
-
Abu amonukwu ki afẹdọ Jihofa neke d’ugbẹdọ ñwu ọlama?
Ef’ifidio-i, g’alu k’agbadufu ka li onukwu ugbo ki ma kpibe mama ta n. G’IFIDIO-i, ubilẹ mẹ ch’oluka oji am’ene-i.
-
Ef’ifidio-i, ẹñwu ma jẹñwu ẹdọ ata kp’iye Akil bọ lugbo onukwu ki nẹ iskul n?
-
Ẹñwu jẹñwu ki ñeju amonukwu etitọ ki nẹ ef’iskul?
-
Ẹñwu jẹñwu ki neke legwefu akanya-i du?
5. Alu k’ẹ neke li onukwu ọmẹmẹlẹ
Kọchẹ alu k’ẹ neke li onukwu ọmẹmẹlẹ kpai alu k’uwẹ onugo neke ch’onukwu ọmẹmẹlẹ. G’IFIDIO-i.
Gba Ita Ita 18:24 kpai 27:17, ubilẹ mẹ ch’oluka oji am’ene-i:
-
Abu amonukwu ọmẹmẹlẹ ach’atẹko ọlama?
-
Ẹ che n’amonukwu ọmẹmẹlẹ ki dabu e-lẹ? Ichẹñwu k’ẹ ma nẹ n, ẹñwu ẹ neke che k’ẹ nẹ?
Gba Abo Filipai 2:4, ubilẹ mẹ ch’oluka oji ene-i:
-
K’ẹ neke n’amonukwu ọmẹmẹlẹ, uwẹ onugo dukpẹ k’ẹ ch’onukwu ọmẹmẹlẹ. Abu ẹ neke ch’e-lẹ le?
K’ẹ neke n’amonukwu ọmẹmẹlẹ, uwẹ onugo dukpẹ k’ẹ du ña kakʼẹ ch’onukwu ọmẹmẹlẹ
ABO KA KAKINI: “U neke d’ẹnẹ duu ch’onukwu, e-lẹ mẹ t’ewe n’onukwu duu le.”
-
Abu ẹ dohi?
ẸY’ỌLA UKỌ-I
Ichẹñwu k’a tu onukwu ọmẹmẹlẹ, a n’ile kwefu-wñ, a la ajẹñwu ẹdọ Jihofa bọ.
Ẹñwu ẹ kọchẹ?
-
Ẹñwu chi k’amonukwu k’a tu chẹñwu ogbogaga ñwu Jihofa?
-
Ọla abo ma dukpẹ k’a du ch’onukwu wa n?
-
Abu a neke li amonukwu ọmẹmẹlẹ kwef’abo ku ma arẹ Jihofa?
KỌCHẸ MANYU
G’alu k’amonukwu ọmẹmẹlẹ neke ch’atẹko wẹ iko k’ẹñwu gbiti.
“N’amonukwu Ọmẹmẹlẹ Tak’ọjọ Otitala Ki Wa” (Ọdọgọ Ide, November 2019)
Kpibe oji amẹñwu k’ẹ neke che k’ẹ neke n’amonukwu ọmẹmẹlẹ.
Ẹñwu i dukpẹ k’ẹ ma lugbo amonukwu oji intanẹti?
Ef’ọhiala k’oji ọla ñwu che “U Ñeju Ku N’ata,” g’ẹñwu ki jẹñwu ẹnẹkẹlẹ ka tu amonukwu omunẹ.
