LEKSION 48
Piliem a Naimbag ti Pakigayyemam
Dagiti nadekket a gagayyem paragsakenda ti biagtayo. Ken no adda problematayo, papigsaendatayo. Ngem ibaga ti Biblia a saan nga amin ket nasayaat a gayyem. Kasanoka ngarud a makabirok iti nasayaat a gagayyem? Panunotem dagiti sumaruno a saludsod.
1. Ania ti epekto kadatayo dagiti gagayyemtayo?
Kaaduanna a matuladtayo dagiti tattao a pakikadkaduaantayo. Mabalin a nasayaat ti impluensiada wenno saan, personaltay man ida a makadkadua wenno iti social media. Kas kuna ti Biblia, “ti makikadkadua iti masirib agbalinto a masirib, ngem ti makilanglangen iti maag [daydiay saan a mangay-ayat ken Jehova], dakesto ti pagtungpalanna.” (Proverbio 13:20) Dagiti gagayyem a mangay-ayat ken agdaydayaw ken Jehova matulongandaka nga agtalinaed a nadekket kenkuana ken agaramid kadagiti nasayaat a desision. Ngem no dagiti nadekket a gagayyemmo ket saan a mangay-ayat ken Jehova, mabalin a mayadayoka kenkuana. Dayta ti rason nga ibagbaga ti Biblia a pilientayo a naimbag dagiti gagayyemtayo. No ay-ayaten dagiti gagayyemtayo ti Dios, nasayaat ti impluensiada kadatayo ken agbalintayo met a nasayaat nga impluensia kadakuada. ‘Maitultuloytayo ti agpipinnaregta ken agpipinnabileg.’—1 Tesalonica 5:11.
2. Kasano a maapektaran ni Jehova kadagiti pilpilientayo a pakigayyeman?
Pilpilien a naimbag ni Jehova dagiti gagayyemna. “Nasinged a gayyemna ti nalinteg.” (Proverbio 3:32) Ania ti marikna ni Jehova no ti pilientayo a pakigayyeman ket dagidiay saan a mangay-ayat kenkuana? Masaktan unay! (Basaen ti Santiago 4:4.) Ngem maragsakan ni Jehova ken piliennatayo a gayyem no liklikantayo dagiti dakes ti impluensiana, makigayyemtayo kenkuana, ken makigayyemtayo kadagiti mangay-ayat kenkuana.—Salmo 15:1-4.
AMMUEM TI AD-ADU PAY
Ammuem no apay a nakapatpateg a pilientayo ti pakigayyemantayo, ken kitaem no kasanoka a maaddaan kadagiti gagayyem a makatulong tapno agbalin a naragsak ti biagmo.
3. Agannadka kadagiti dakes a kakadua
Saan a nasayaat a kakadua dagiti saan a mangay-ayat iti Dios ken kadagiti estandartena. I-play ti VIDEO, sa pagsaritaan ti sumaruno a saludsod.
-
Kasano a ditay mapupuotan a dakes gayamen dagiti pakikadkaduaantayo?
Basaen ti 1 Corinto 15:33, sa pagsaritaan dagitoy a saludsod:
-
Para kenka, asino dagiti dakes a kakadua? Apay?
Basaen ti Salmo 119:63, sa pagsaritaan daytoy a saludsod:
-
Kasanom a maibaga no ti maysa ket nasayaat a gayyem?
Ti maysa a nalungsot a mansanas mabalin a maperdina ti dadduma pay a mansanas. Kasano a maimpluensiaannaka ti maysa a dakes a kadua?
4. Mabalintayo ti makigayyem uray kadagiti naiduma kadatayo
Iyestoria ti Biblia ti maipapan kada David ken Jonatan, dua a lallaki iti nagkauna nga Israel. Aginnaddayo ti edadda ken nagduma ti kasasaad ti biagda, ngem nakaes-espesial ti panaggayyemda. Basaen ti 1 Samuel 18:1, sa pagsaritaan daytoy a saludsod:
-
Apay a saan laeng koma a dagiti katawenantayo wenno kapadatayo iti kasasaad ti biag ti pakigayyemantayo?
Basaen ti Roma 1:11, 12, sa pagsaritaan daytoy a saludsod:
-
Kasano a makapagpipinnaregta dagiti aggagayyem a mangay-ayat ken Jehova?
Iti daytoy a video, kitaem no kasano a di ninamnama a nakabirok ti maysa nga agtutubo a lalaki kadagiti gagayyem. I-play ti VIDEO, sa pagsaritaan dagiti sumaruno a saludsod.
-
Iti video, apay a nadanagan dagiti nagannak ni Akil gapu kadagiti gagayyemna iti eskuelaan?
-
Apay nga idi damo, kayatna ti makikadua kadagita a gagayyemna?
-
Ania ti inaramidna tapno saan a malidayan?
5. No kasanotayo a maaddaan kadagiti nasayaat a gagayyem
Kitaem no kasanoka a makabirok kadagiti pudno a gagayyem ken no kasanoka met nga agbalin a pudno a gayyem. I-play ti VIDEO.
Basaen ti Proverbio 18:24 ken 27:17, sa pagsaritaan dagitoy a saludsod:
-
Kasano nga agtitinnulong dagiti pudno nga aggagayyem?
-
Adda kadi kasta a gagayyemmo? No awan, kasanoka a makabirok?
Basaen ti Filipos 2:4, sa pagsaritaan daytoy a saludsod:
-
Tapno maaddaanka iti nasayaat a gagayyem, masapul nga agbalinka met a nasayaat a gayyem. Kasano?
Tapno maaddaanka iti nasayaat a gagayyem, masapul nga agbalinka met a nasayaat a gayyem
KUNA TI DADDUMA: “Awan ti agbalin a gayyemmo no nakapilpilika.”
-
Ania ti ibagam?
SUMARIO
No pilientayo a naimbag dagiti pakigayyemantayo, pagsayaatantayo dayta ken maparagsaktayo ni Jehova.
Rebiu
-
Apay nga importante ken Jehova dagiti pilpilientayo a pakigayyeman?
-
Ania a klase dagiti tattao ti saantayo koma a pakigayyeman?
-
Ania ti aramidem tapno lumagda ti pannakigayyemmo kadagiti nasayaat a gagayyem?
AGDISKOBREKA PAY
Kitaem no kasano a makatulong kadatayo dagiti pudno a gagayyem iti tiempo ti rigat.
“Pabilgem ti Relasionmo Kadagiti Kakabsat Sakbay ti Panungpalan” (Ti Pagwanawanan, Nobiembre 2019)
Kitaem no ania ti mabalinmo nga aramiden tapno makabirokka kadagiti nasayaat a gagayyem.
Ania ti masapul a maammuam maipapan iti pannakigayyem online?
Iti artikulo nga “Il-iliwek ti Maysa nga Ama,” kitaem no apay nga insardeng ti maysa a lalaki ti makikadua kadagiti dati a gagayyemna.
“Ti Biblia Balbaliwanna ti Biag” (Ti Pagwanawanan, Abril 1, 2012)