DILONGI 48
Pona Banduku na Nge Mbote
Na bantangu ya kiese, banduku ya ngolo ke yikaka beto kiese mpi na bantangu ya mpasi, bo ke sadisaka beto. Kansi Biblia ke kebisaka beto nde bantu yonso ve kele banduku ya mbote. Ebuna nki lenda sadisa nge na kupona banduku ya mbote? Beto tala bamvutu na bangiufula ya ke landa.
1. Banduku ya nge ke ponaka lenda pusa nge na kukuma kusala mambu ya nki mutindu?
Mbala mingi beto ke kumaka kuyindula mpi kusala mambu kaka bonso bantu yina beto ke lutisaka ntangu mingi ti bo, yo vanda na kimuntu-kimuntu to na nzila ya Internet. Kansi kusala mambu bonso bo lenda vanda mbote to kigonsa sambu na beto. Yo kele mutindu yina sambu Biblia ke tubaka nde, ‘muntu yina ke tambulaka ti bantu ya mayele ta kuma mayele, kansi muntu yina ke kangama ti bazoba [bantu yina ke zolaka ve Yehowa] ta suka mbi.’ (Bingana 13:20) Banduku yina ke zolaka Yehowa mpi ke sambilaka yandi ta sadisa nge na kulanda kutanina kinduku na nge ti yandi mpi na kubaka balukanu ya mbote. Kansi kana beto ke sala kinduku ti bantu yina ke zolaka ve Yehowa, bo ta pusa beto na kuyambula kusadila yandi. Yo yina Biblia ke lombaka beto na kupona mbote mpenza banduku na beto! Kana banduku na beto ke zolaka Nzambi, yo ta natila bo ti beto mosi mambote mpi beto ta “landa kupesana kikesa mpi kutungana.”—1 Batesalonika 5:11.
2. Yehowa ke waka nki mutindu sambu na banduku ya nge ke ponaka?
Yehowa ke ponaka mbote kibeni banduku na yandi. Biblia ke tuba nde: “Yandi ke taka kinduku ya ngolo ti bantu ya mbote.” (Bingana 3:32) Inki mutindu Yehowa ke waka kana beto ke baka na kinduku bantu yina ke zolaka yandi ve? Yandi ke waka mpasi kibeni! (Tanga Yakobo 4:4.) Kansi Yehowa ke waka kiese mpi ke bakaka beto na kinduku kana beto ke buya banduku ya mbi mpi ke kangama ti yandi mpi bantu yina ke zolaka yandi.—Nkunga 15:1-4.
LONGUKA MAMBU MINGI
Beto tala sambu na nki yo kele mfunu mingi na kupona banduku ya mbote mpi mutindu nge lenda sala kinduku yina ta natila nge mambote mingi na luzingu.
3. Keba na banduku ya mbi
Banduku ya mbi kele bantu yina ke zolaka ve Nzambi mpi bansiku na yandi. Beno tala VIDEO mpi na nima beno pesa mvutu na ngiufula ya ke landa.
-
Inki mutindu beto lenda kuma kulutisa ntangu ti banduku ya mbi kukonda kubakisa yo?
Beno tanga 1 Bakorinto 15:33 mpi na nima beno pesa mvutu na bangiufula yai:
-
Banani kele banduku ya mbi sambu na nge? Sambu na nki?
Beno tanga Nkunga 119:63 mpi na nima beno pesa mvutu na ngiufula yai:
-
Inki lenda sadisa nge na kuzaba kana muntu mosi kele nduku ya mbote to ve?
Dimbuma mosi ya kupola lenda bebisa bambuma yonso ya nkaka. Ebuna kana nge me kangama ti nduku mosi ya mbi, nge ke yindula nde yandi ta pusa nge na kukuma kusala mambu ya nki mutindu?
4. Bantu yina kele ve mutindu mosi ti beto lenda kuma banduku na beto ya ngolo
Biblia ke tubilaka Davidi ti Yonatani, babakala zole yina zingaka na Izraele ya ntama. Yonatani vandaka mbuta ya Davidi mpi yandi vandaka mwana ya ntotila. Ata mpidina, bo kumaka banduku ya ngolo kibeni. Beno tanga 1 Samuele 18:1 mpi na nima beno pesa mvutu na ngiufula yai:
-
Sambu na nki yo ke lombaka kaka ve nde banduku na beto kuvanda mvula mosi ti beto to bo vanda ti luzingu ya mutindu mosi ti beto?
Beno tanga Baroma 1:11, 12 mpi na nima beno pesa mvutu na ngiufula yai:
-
Inki mutindu banduku yina ke zolaka Yehowa ke pesanaka kikesa?
Na video yai, tala mutindu mpangi mosi ya leke me zwa banduku na kisika yina yandi vandaka kuyindula ve. Beno tala video mpi na nima beno pesa mvutu na bangiufula ya ke landa.
-
Mutindu video me monisa yo, sambu na nki bibuti ya Akil vandaka kudiyangisa sambu na banduku yina yandi bakaka na nzo-nkanda na bo?
-
Sambu na nki Akil vandaka kusepela ntete ti banduku yango?
-
Inki yandi salaka sambu yandi kudiwa diaka ve yandi mosi?
5. Mutindu nge lenda zwa banduku ya mbote
Beto tala mutindu nge lenda zwa banduku ya mbote mpi mutindu nge mosi lenda vanda mpi nduku ya mbote. Beno tala VIDEO.
Beno tanga Bingana 18:24 mpi 27:17. Na nima beno pesa mvutu na bangiufula yai:
-
Inki mutindu banduku ya mbote ke sadisanaka?
-
Keti nge kele mpi ti banduku ya mbote ya mutindu yai? Kana nge kele ve ti bo, nki nge lenda sala sambu na kuzwa banduku ya mutindu yai?
Beno tanga Bafilipi 2:4 mpi na nima beno pesa mvutu na ngiufula yai:
-
Sambu na kuvanda ti banduku ya mbote, nge mosi mpi fwete vanda nduku ya mbote. Inki nge fwete sala sambu nge vanda nduku ya mbote?
Sambu na kuvanda ti banduku ya mbote, nge mosi fwete vanda mpi nduku ya mbote
BANTU YA NKAKA KE TUBAKA NDE: “Mbote kuta kinduku ti konso muntu yina nge me kutana ti yandi na kisika ya kuvanda ve ti banduku.”
-
Inki nge ta tuba?
NA BUNKUFI
Kana beto ke pona mbote banduku na beto, yo ta sepedisa Yehowa mpi yo ta natila beto mosi mambote.
Inki Nge Me Simba?
-
Sambu na nki Yehowa ke zolaka nde beto pona banduku ya mbote?
-
Banduku ya nki mutindu beto fwete buya?
-
Inki nge fwete sala sambu na kusala kinduku ya ngolo ti bantu yina ke zolaka Yehowa?
TALA MPI
Tala mutindu banduku ya mbote lenda sadisa beto na bantangu ya mpasi.
“Sala Kinduku ya Ngolo ti Bampangi na Ntwala nde Nsuka Kukwisa” (Nzozulu ya Nkengi, Novembri 2019)
Tala mambu ya mfunu ya nge fwete sala sambu na kuzwa banduku ya mbote.
Tala mambu yina nge fwete zaba na yina me tala kusala kinduku na nzila ya Internet.
Vanda Mayele Ntangu Nge Ke Solula ti Bantu na Nzila ya Internet (4:12)
Na disolo “Mono Vandaka Kibeni ti Nzala ya Kuvanda ti Tata Mosi,” tala mambu ya pusaka bakala mosi na kuyambula banduku ya mbi yina yandi vandaka ntete ti bo.
“Biblia Ke Sobaka Luzingu ya Bantu” (Disolo ya kele na Nzozulu ya Nkengi)
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
