LUFUNJISHO 48
Salainga Bulongo Balunda Nenu
Balunda ba pa muchima betulengela kwikala na lusekelo mu bimye byawama kabiji betukwasha inge tubena kupita mu makatazho. Pano bino, Baibolo witujimunako kuba’mba kechi muntu yense wafwainwa kwikala mulunda netu ne. Pano mwafwainwa kusala byepi balunda bawama? Langulukai pa ano mepuzho.
1. Balunda bo musala bafwainwa kwimulengela kwikala byepi?
Javula twikala na byubilo byonka bijipo na bantu bo tupwanañana nabo. Balunda netu bakonsha kwitulengela kwikala na byubilo byawama nangwa byatama. Abano balunda bakonsha kwikala bantu bo tukaya nabo nangwa bo twisamba nabo pa intaneti. Baibolo waamba’mba: “Awa wenda na ba maana ukekala na maana, pakuba awa ukaya na bakosama [bantu babula kutemwa Yehoba] ukamona bya malwa.” (Byambo bya Maana 13:20) Balunda netu bapopwela Yehoba kabiji bamutemwa bafwainwa kwimukwasha kufwenya kwipi ne aye ne kuyuka bya kufuukula bintu bulongo. Bino balunda netu babula kutemwa Yehoba bakonsha kwitufumya kwi aye. O ene mambo Baibolo o itutundaikila kuba’mba twafwainwa kusalanga bulongo balunda netu. Inge twaikala na balunda batemwa Lesa, baketukwasha kubanga bintu byawama, ne atweba tukebakwasha kubanga bintu byawama. Kabiji ‘tuketundaikainga ne kwikomesha atweba bene na bene.’—1 Tesalonika 5:11.
2. Yehoba umona byepi balunda bo musala?
Yehoba usala balunda baji na byubilo byawama. Baibolo waamba’mba: “Baoloka bo balunda nanji ba pa muchima.” (Byambo bya Maana 3:32) Yehoba umvwa byepi ku muchima inge twasala balunda babula kumutemwa? Kwambatu kine, kimukola bingi ku muchima. (Tangai Yakoba 4:4.) Inge twaleka kupwanañana na bantu batama, Yehoba ukatemwa bingi kabiji tukekala balunda nanji. Kabiji tukafwenya kwipi ne aye ne ku bantu bamutemwa.—Salamo 15:1-4.
FUNJILAIPO BIKWABO
Yukai ene mambo o kyawamina kusala balunda bawama. Kabiji yukai ne byo mwafwainwa kuba pa kuba’mba mwikale na balunda bakemukwashanga mu bwikalo bwenu.
3. Kupwanañananga na bantu batama ne
Bantu babula kutemwa Lesa ne mizhilo yanji ke balunda batama. Tambai VIDYO, ne kwisamba buno bwipuzho.
-
Twakonsha kutendeka byepi kupwanañana na bantu batama kwa kubula kuyuka?
Tangai 1 Kolinda 15:33, ne kwisamba ano mepuzho:
-
Bañanyi bakonsha kwikala balunda nenu batama? Mwakumbwila ka byobyo?
Tangai Salamo 119:63, ne kwisamba buno bwipuzho:
-
Ñanyi bintu byo mwafwainwa kuyuka pa muntu ye mukeba’mba ekale mulunda nenu?
Kipangwa kyabola kyakonsha kutamisha byonsetu byabula kubola. Nanchi kupwanañana na muntu umo watama kwakonsha kwimulengela kwikala byepi?
4. Bakulumpe nangwa banyike bakonsha kwikala balunda netu bawama
Baibolo waambapo pa banabalume babiji bajinga mu Isalela kala, Davida ne Yonafwanyi. Yonafwanyi wajinga mukulumpe pe Davida kabiji wajinga mwana wa mfumu. Nangwa byonkabyo, bajinga balunda na muntu. Tangai 1 Samwela 18:1, ne kwisamba buno bwipuzho:
-
Kwesakana na kino kinembelo, mambo ka o kyawamina kwikala na balunda bamafumbi apusana pusana nangwa kya kuba kechi baji na bintu byo tujipo nabyo ne?
Tangai Loma 1:11, 12, ne kwisamba buno bwipuzho:
-
Balunda batemwa Yehoba betundaika byepi bene na bene?
Mu uno vidyo, monai byaubile mulongo umo mwanyike pa kuba’mba ataane balunda bawama. Tambai VIDYO, ne kwisamba ano mepuzho.
-
Mu vidyo ye mwatamba, mambo ka bansemi ba kwa Akil o besambijilepo nanji pa balunda nanji ba pa sukulu?
-
Ñanyi bintu byalengejile Akil kutemwa balunda nanji ba pa sukulu?
-
Waubile byepi pa kuba’mba apwishe mukose?
5. Bya kutaana balunda bawama
Monai bya kutaana balunda ba kine ne byo mwafwainwa kuba pa kuba’mba mwikale mulunda wawama. Tambai VIDYO.
Tangai Byambo bya Maana 18:24 ne 27:17, ne kwisamba ano mepuzho:
-
Balunda ba kine bekwasha byepi?
-
Nanchi muji na balunda bawama baji bino nyi? Inge mufwabo, mwafwainwa kuba byepi pa kuba’mba mwikale na balunda bawama?
Tangai Filipai 2:4, ne kwisamba buno bwipuzho:
-
Pa kuba’mba mwikale na balunda bawama, mwafwainwa kwikala mulunda wawama. Mwakonsha kuba byepi bino?
Pa kuba’mba mwikale na balunda bawama, mwafwainwa kwikala mulunda wawama
BANTU BAMO BAMBA’MBA: “Muntu yense wakonsha kwikala mulunda nobe.”
-
Nga anweba musakwambapo’mba ka?
ÑANYI BISHINKA BYO MWAFUNDA?
Inge twasala bulongo balunda bawama, tutokesha Yehoba ku muchima ne kwikala bulongo.
Mepuzho a kupitulukamo
-
Mambo ka Yehoba o atelako bingi muchima ku balunda bo tusala?
-
Ñanyi bantu bafwainwa kubula kwikala balunda netu?
-
Mwafwainwa kukosesha byepi bulunda na bantu batemwa Yehoba?
KEBAI BISHINKA BIKWABO
Monai balunda bawama byo bafwainwa kwitukwasha mu kimye kya makatazho.
“Koseshai Bulunda na Bakwenu Mpelo Saka Ikyangye Kufika”(Kyamba kya Usopa, November 2019)
Monaipo mashinda amo o mwafwainwa kwingijisha pa kuba’mba mwikale na balunda bawama.
“Nakonsha Kwikala Byepi na Balunda Bawama?”(Mepuzho Epuzha Banyike, Buku 1, kitango 8)
Ñanyi bintu byo mwafwainwa kuyuka kwikala na balunda pa intaneti?
Monai kyalengejile mwanamulume umo kusala bulongo balunda nanji mu jishimikila ja kuba’mba “Natonganga Bingi Batata.”
“Baibolo Upimpula Bwikalo bwa Bantu” (Kyamba kya Usopa, April 1, 2012)
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
