SUƐI LEBOLII 48

Hɛli Chaŋyaŋ Numndoŋ a Taasi

PILEI

Mi chaaŋaa naa kɛndiaa dɔunuŋ nyaale a naa te dɛnɛ kɛndɔɔ komal naa pɛ. Nduyɛ ma dɛɛniaa naa kɔllo o teleŋnda kalalaŋ niŋ. Kɛ, Baabuiyo sila naa maa o cho waŋnda kpou le naŋ nɔ miŋ bii chaŋyɛi le. Mɛɛ vɛɛ naŋ hɛli yɛ chaŋyaŋ kɛndɔŋ? Ŋ yaasiaa wɔ nyunalaŋ ndaŋ miŋ che.

1. Vɛɛ chaŋyaŋ ŋ hɛli woŋ piiliaŋ yɛ num?

Chaaŋaa naa nɔla ma tosa miŋ simnuŋ mɛɛ nda cho yɛ. Koŋ cho ni maa, a nɔla ma siiŋguu naa wanaa kɛndɛ ɔɔ wanaa wɔɔŋ. Hei nɔla mii yɔŋnuŋ o yɔŋ bɛɛ aa naa ndaa kela ni, ɔɔ o Intanɛtiiyo choo naŋ cho chaŋyɛi a nda ni. Baabuiyo dimi aa: “Te wana balu a wana kɔl kaloo pɛ, num bɛɛ a simnuŋ wana kɔl kalu. Kɛ wana o wana balu a diɔmnda pɛ, [wanaa kaala Chɛhowa le wa] a saŋga.” (Pulɔwaa 13:20) Te a bii pɛ wanaa cho Chɛhowa piɛiyo nduyɛ ma kaala ndu wa ichaŋya, a nɔla ma mala num ma holnuŋ ndu, nduyɛ ma tosa kɛɛsiaala kɛndɛlaŋ. Kɛ te ŋ tosa pɛ chaŋyaŋ a wanaa cho Chɛhowa piɛi le wa, a nɔla ma tosa miŋ mal ndu piɛiyo. Lelaŋ pɛŋ Baabuiyo dɛɛniaa naa ni le miŋ hɛli chaŋyaŋ naŋ a taasi. Te chaŋyaŋ naŋ kaala pɛ Mɛlɛka, miŋ sɔla tɔnɔɔ nduyɛ mi nda bɛɛ sɔla tɔnɔɔ. Ŋ nɔla miŋ wa “dɛɛniaŋndo vellaa velle, a yoomuaŋ lueinaŋndo.”—1 Tɛsaloniaŋ 5:11.

2. Vɛɛ chaŋyaŋ ŋ hɛli woŋ piiliaŋ yɛ Chɛhowa?

Mi Chɛhowa hɛli chaŋyaŋ ndɔŋ a taasi. Baabuiyo dimi pɛŋ maa ‘wanaa tosa sɔɔŋ kɛndɔŋ nda o kaala ni.’ (Pulɔwaa 3:32) Vɛɛ kɔllo wa yɛ ndu te ŋ bii pɛ wanaa kaala ndu le wa ichaŋya? Mbo tambu kɔl tau! (Nuawɔ Chemisi 4:4.) O baa pilɔɔ choo, te ŋ faŋaŋ pɛ chaŋyaŋ wɔɔŋndoŋ kɔɔli nduyɛ miŋ bii wanaa kaala ndu wa ichaŋya, mbo naŋ kɔl a naa tau. Koŋ tosa mi ndu bɛɛ simnuŋ chaaŋ naa.—Sam 15:1-4.

CHƆƆLU YAASIAA

Yaasiaa wɔ ma che le sabu i cho i sɔvɛ le chaŋyaŋ hɛlioo a taasi wo. Okoŋ, ma che mɛɛ ŋ nɔla ma sɔla chaŋyaŋ tosa ma tuei yoomoo yeela woŋ yɛ.

3. Mandaŋ yɔŋii ŋ hɛli chaŋyaŋ wɔɔŋndoŋ

Wanaa kaala Mɛlɛka a sawala ndɔlaŋ te wa cho chaŋyaŋ kɛndɛ kposoŋ te. Handu VIDUEIYO, okoŋ mi la suukaŋ o nyunaa hoo choo:

VIDUEIYO: Pɛɛku le Chaŋyaŋ Wɔɔŋndoŋ Fafaŋndo (6:17)

Vɛɛ naŋ hɛli yɛ chaŋyaŋ wɔɔŋndoŋ ŋ ve bɛɛ o sina choo le?

Nuawɔ 1 Kɔliŋtiaŋ 15:33, okoŋ mi la suukaŋ o nyunalaŋ ndaŋ choo:

Nɛɛ nɔla yɛ mbo wa chaŋyɛi wɔɔŋnde le num? Le yɛɛ ŋ dimi yɛ lende?

Nuawɔ Sam 119:63, okoŋ mi la suukaŋ o nyunaa hoo choo:

Tuupa ma bii waŋndo ichaŋya, yɛɛ ŋ nɔ yɛ ma sina a ndu okɔɔ?

Mi komɔɔ siouwo opilɛ tɛɛmbuu komɔɔla kɛndɛlaŋ kpou. Vɛɛ chaŋyɛi wɔɔŋnde ipilɛ kpe nɔla yɛ mii paaliaŋ num?

4. Wanaa naŋ sulaŋ bɛɛ le wa nɔla ma wa chaaŋaa naa kɛndiaa

Mi Baabuiyo suaa a Deeve nda Chonataŋ okɔɔ. O Isɔluɛi niŋ sindɛ nda wa ni. Puaa haa ve ŋlambi le, nduyɛ ndaa fula kɔɔlima pilɛ le. Kɛ a koŋ kpou, chaŋyɛi kpɛɛluŋnde wa nda tɛɛŋ. Nuawɔ Saamiɛɛ Tasoo 18:1, okoŋ mi la suukaŋ o nyunaa hoo choo:

Le yɛɛ chaŋyaŋ naŋ nɔ ko miŋ wa lambila naalaŋ, ɔɔ wanaa naŋ fula kɔɔlima piliaŋ nda le?

Nuawɔ Luomaŋnda 1:11, 12, okoŋ mi la suukaŋ o nyunaa hoo choo:

Vɛɛ wanaa kaala Chɛhowa wa dɛɛniaŋ yɛ te a wa pɛ o chaŋyɛi niŋ?

O vidueiyo hoo niŋ, tofawɔ ma che mɛɛ puaapilɛnɔ feleŋgɔnɔɔ sɔla chaŋyaŋ, naa o ve kɔl te wa yɛ. Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Nuuviaa Chaŋyaŋ Naa Ŋ Ve Kɔl te Wa (5:06)

O vidueiyo hoo niŋ, le yɛɛ wanaa velu Akili wa wa yɛ buulaŋndo a chaŋyaŋ o bii o sukuu woŋ okɔɔ?
Yɛɛ tosa yɛ mbo hɛnaŋ a wanaa o bii chaŋyɛi o sukuu wa?
Yɛɛ mala yɛ ndu mbo sɔla chaŋyaŋ kaala Chɛhowa woŋ?