LONGI DIA 48
Toma Solanga Akundi Aku
Akundi bewokesanga e kiese kieto muna ntangw’a kiese ye bekutusadisanga muna ntangw’a mpasi. Kansi, Bibila kikutulukisanga vo ke wantu awonso ko i akundi ambote. Aweyi olenda solela akundi ambote? Tala e yuvu ilende.
1. Akundi osolanga, nkia nluta yovo mfwilu balenda kutwasila?
Tulenda bakidila fu yambote yovo fu yambi ya wantu ana tuviokesanga yau e ntangwa, kiakala awana tukalanga yau vamosi yovo awana tumokenanga yau muna internete. Bibila kikutuvovesanga vo: “Ndiona okangalanga ye nkwa ngangu okala ye ngangu, kansi o nkundi a mazowa [awana ke bezolanga Yave ko] mpasi kemona.” (Ngana 13:20) Akundi ana bezolanga Yave balenda kusadisa mu tatidila kikundi kiaku yo Yave yo baka nzengo zambote. Kansi, akundi ana ke bezolanga Yave ko balenda kuvukumuna mu yambula sadila Yave. Muna kuma kiaki, Bibila kikutulukisanga vo twatoma solanga akundi eto. Avo tuvangidi kikundi ye awana bezolanga Nzambi, tubaka e nluta muntu yo nkwandi. Tulenda “kasakesa yo kumika muntu yo nkwandi.”—1 Tesalonika 5:11.
2. Aweyi Yave kalenda mona mu kuma kia akundi osolanga?
Yave otoma solanga akundi andi. Bibila kivovanga vo: “Okalanga se nkundi akola kw’ansongi.” (Ngana 3:32) Aweyi Yave kemona avo osolele akundi ana ke bekunzolanga ko? Otoma kendalala! (Tanga Yakobo 4:4.) Kuna diak’e sambu, avo oyambwidi akundi ambi yo sola awana bezolanga Yave, oyandi oyangalala ye okusola wakala se nkundi andi.—Nkunga 15:1-4.
ZAYA DIAKA MANKAKA
Tala e kuma dinina o mfunu mu solanga akundi ambote. Tala mpe una olenda vangila kikundi kiambote kilenda kutwasila nluta.
3. Uyikeba mu kuma kia akundi ambi
Awana ke bezolanga Nzambi ko ye nkanikinu miandi, ke akundi ambote ko. Tala e VIDEO, i bosi, vana e mvutu za kiuvu kilende.
-
Aweyi tulenda vangila kikundi ye wantu ambi lembi wo zaya?
Tanga 1 Korinto 15:33, i bosi, vana e mvutu za yuvu eyi:
-
Nkia mpila wantu balenda kala se akundi ambi kwa ngeye? Ekuma?
Tanga Nkunga 119:63, i bosi, vana e mvutu za kiuvu eki:
-
Nkia diambu dilenda kusadisa mu zaya kana vo nengandi nkundi ambote?
Nze una bundu kimosi kiawola kilenda wolesela bundu yankaka, akundi ambi balenda kututwasila mfwilu
4. Tulenda vanga kikundi yo wantu baswaswana yo yeto
Bibila kivovelanga Davidi yo Yonatane kuna Isaele yankulu. Baswaswana kikilu bakala muna ntela, o Yonatane mwan’a ntinu kakala; kansi, akundi akola bakala. Tanga 1 Samuele 18:1, i bosi, vana e mvutu za kiuvu eki:
-
Ekuma akundi eto ke bafwete kadila kaka awana tuna yau ntela mosi ko yovo awana bena ye mpila zingu nze kieto?
Tanga Roma 1:11, 12, i bosi, vana e mvutu za kiuvu eki:
-
Aweyi akundi ana bezolanga Yave balenda kutukasakesela?
Muna video yayi, tala una mpangi mosi kasololwela akundi vana fulu kina kayindulanga ko. Tala e VIDEO, i bosi, vana e mvutu za yuvu ilende.
-
Nze una omwene muna video, ekuma mase ma Akil batokanena mu kuma kia akundi andi kuna sikola?
-
Kuna lubantiku, ekuma Akil kayindulwila vo wantu awaya akundi ambote?
-
Aweyi kasundila kinsona kamonanga?
5. Aweyi olenda vangila yikundi yambote?
Tala una olenda sololwela akundi ambote ye una olenda kadila nkundi ambote. Tala e VIDEO.
Tanga Ngana 18:24 ye 27:17, i bosi, vana e mvutu za yuvu eyi:
-
Aweyi akundi ambote besadisilanga muntu yo nkwandi?
-
Nga akundi aku bafwanana ye awaya bayikilu mu sono kiaki? Avo ve, adieyi olenda vanga mu kala ye akundi a mpila yayi?
Tanga Filipi 2:4, i bosi, vana e mvutu za kiuvu eki:
-
Muna kala ye akundi ambote, divavanga vo wakala nkundi ambote. Aweyi olenda wo vangila?
Muna kala ye akundi ambote, ofwete kala nkundi ambote
AVO MUNTU UVOVESE VO: “Diambote mu kala ye konso nkundi vana fulu kialembi kala yo nkundi.”
-
Nkia mvutu okumvana?
MAMBU MASINA MA LONGI DIADI
Avo tutomene sola akundi eto, nluta dikututwasila ye tuyangidika mpe Yave.
Nkia Mambu Olongokele?
-
Ekuma Yave ketokanenanga mu kuma kia akundi ana tusolanga?
-
Nkia mpila wantu ke tufwete vanga yau kikundi ko?
-
Aweyi olenda vangila kikundi yo wantu ana bezolanga Yave?
TALA MPE OMA MALENDE
Tala una akundi ambote balenda kusadisila muna ntangw’a mpasi.
“Kumika e Kikundi Kiaku ye Akaka Vitila e Mbaninu Yiza” (Eyingidilu dia Novemba, 2019)
Tala mambu mamfunu olenda vanga mu sola akundi ambote.
“Como Fazer Bons Amigos?” (Os Jovens Perguntam—Respostas Práticas, Volume 1, kapu kia 8)
Adieyi ofwete zaya muna diambu dia vangila yikundi muna internete?
Muna lusansu, “E se Yavavanga,” zaya dina diafila muntu mosi mu toma fimpa e mpila akundi kakala yau.
“Nkand’a Nzambi Zingu kia Wantu Usobanga” (Eyingidilu dia 1 dia Abidi, 2012)
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
