Bblo kʉ ná kau adi rili ko ba hwè bblo kʉ ná saa na ndirigoti kpa adi ko li kpakpa kpakpalo dhi saa na. Ro Biblia rija ko dho, ri nga kʉ krʉ kʉ ná ndrŭ i ka ndi ma é bblo kʉ ná kau ri. Nde ni ká ka ni vʉ bblo kʉ ná kau ngbaribbai? Akotilo i ngadhudha djo.

1. Ni vʉ ná kau ká ka ndi e ngba matokeo na ni djo?

Bí ina ko adi njini kodhó kau bbai. Kpa ka ndima cho ko, ko njí che kʉ ná lo inga bblo kʉ ná lo, fø lo ka ndi njini njati ko di saa ba ko di kpa na inga ko di loti kpa na eternete chulu ró. Biblia ripo: “Nyodyu dhi le na bbí ná le adi ngʉ nyodyu, ro rr chu ná le [nzá ji Yova ná le] na kau nji ná le si bani kpakpalo na.” (Mezali 13:20) Ngba ji Yova ndirigoti nì madha bbʉ ke dho ná ndrŭ ka ndima kó ni tsotso ndiro ni kana nga ngʉ chøchø ke na ndirigoti ni vʉ lo nanga bblo d’e. Njati ni di kau nji nzá ji Yova ná ndrŭ na ró, kpa ka ndima liri ni bbá Yova bbá. Føri dho Biblia ko li kpakpa ndiro ko vʉ kodhó kau nyodyu na d’e! Njati ko njí kau ngbà ji Yova ná ndrŭ na ró, føri ka ndi liri ko krʉ ba faida. Fø ro ri ka ndi kaka “ko pɨ ko iso ko kana ndirigoti ko li ko kpakpa.”​—1 Watesalonike 5:11.

2. Ko vʉ ná kau dhi lo dho ká Yova ka ndi mbu ndi ngbaribbai?

Yova adi ndidzá kau vʉ nyodyu na. Ke adi kau nji chi kʉ ná lo nji ná ndrŭ na.” (Mezali 3:32) Yova ká ka ndi mbu ndi ngbaribbai njati ko vʉ nzá ji ke ná ndrŭ kodhó kau ró. Ke thí ka ndi ba njedha bbo! (Azø Yakobo 4:4.) Ro Yova nanga ka ndi jini bbo ndirigoti ke ka ndi jiri ndi e kodhó kau njati ko pʉ che kʉ ná kau ko ró ro ndirigoti ko njí kau ke na, goti ngbà ji ke ná ndrŭ na ró.​—Zaburi 15:1-4.

 ANE LONANGA BBO

4. Nga ma na kodhó cho kʉ ddiddi ná ndrŭ ma ka ndima e ddi bblo kʉ ná kau

Biblia tilo Waizraeli bbá aro ngʉe ná kpa, Daudi ma Yonatani ma na djo. Fø kpa dhó cho nga ngʉe ddiddi ri ndirigoti Yonatani ngʉe Pi dzá ngba; ro ni mai ri ngʉe fø ro, kpa kana kau ngʉe kpakpa bbo. Azø 1 Samweli 18:1, ndirigoti anitilo i ngadhudha djo:

• Ká addudho ri nzá ngani ko di kau nji ddiddi ma na kodhó cho kʉ inga ddiddi ma na kodhó hali kʉ ná ndrŭ na dhé ri?

Azø Waroma 1:11, 12, ndirigoti anitilo i ngadhudha djo:

• Ngbà ji Yova ná kau ká adi ndima li kpakpa ndima kana ngbaribbai?

I video nǎ, anja ngbaribbai ma ddikpa jadda ke ma chɨ kau ndi djolu da ná ke na nari. Aninja VIDEO, ndirigoti anitilo i ngadhudha djo.

• I video nǎ ni njari nari bbai, Akil dhó gø dhi ndrŭ nanga ká ri ngʉ d’o addudho ke lai darasa nǎ kau djo?

• Ke ká jingʉe fø kpa ma na ndi kau nji nari addudho?

• Ke ká njingʉeri ngbǎ ndiro nzɨ ndi di ndi rr ddiro kʉ nari bbai ró?

 5. Ngbaribbai ma le ka le ba bblo kʉ ná kau nari

 LO DZÁ DɄNGA

Njati ko vʉ kau nyodyu na ró, ko ka ko bbʉ hwè Yova thí dho ndirigoti ko ka ko ba faida ri nǎ ro.

Lo djolu le ngʉ nari

• Yova ká adi riji ko vʉ bblo kʉ ná kau addudho?

• Ri ká ngani ko pʉ ngbǎ di ná kau ko ró ro?

• Ko ká ka ko li ko kana kau kpakpa ngbaribbai bblo dhó nyi kʉ ná ndrŭ na?