KIFUNDWA 48
Tonga Balunda na Tunangu
Balunda ba pa mutyima balengejanga twikale na nsangaji mu bitatyi biyampe, ebiya mu bitatyi bibi namo betukomejanga. Inoko Bible witudyumuna amba ke muntupo yense mulunda muyampe. Pene’pa, ukatonga namani balunda bayampe? Bandaula bipangujo bilonda’ko’bi.
1. Le balunda botonga bakekala na lupusa’ka podi?
Tuvudile kwifwana bantu botupityija nabo kitatyi pamo. Twibefwananga mu bibi ne mu biyampe—bekale i botupityija nabo kitatyi mpala na mpala nansha ba ku Entelenete. Bible unena’mba: “Yewa unanga na ba tunangu ukekala wa tunangu, ino yewa upwene na bivila [boba kebasenswepo Yehova] ukamona malwa.” (Nkindi 13:20) Balunda basenswe Yehova ne bamutōta babwanya kwitukwasha tushale pabwipi nandi ne kwitukwasha tukwate butyibi buyampe. Ino boba kebadipo mu kipwilo babwanya kwitupalula kudi Yehova. Nanshi ke kya kutulumukapo shi Bible witukankamika tutonge balunda na tunangu! Shi balunda i bantu basenswe Leza, nabya tukamwena’mo kadi nabo bakamwena’mo. Ketukabulwepo kwikankamika ‘ne kwitamija nyeke batwe bene na bene.’—1 Bene Tesalonika 5:11.
2. Mutongelo obe wa balunda ukalengeja Yehova eivwane namani?
Yehova utadijanga patonga balunda nandi. “Upwananga bulunda bwa pa mutyima na bantu boloke swā.” (Nkindi 3:32) Lelo Yehova ukeivwana namani shi tutonga balunda mu bantu kebamusenswepo? Bine ukafītwa pa mutyima! (Tangai Yakoba 4:4.) Inoko, Yehova ukasangela kwitutonga bu balunda nandi shi tubapele balunda babi ino tubapwana’ko nandi ne na bantu bamusenswe.—Ñimbo ya Mitōto 15:1-4.
LANGULUKA BININGE
Bandaula, umone mwanda waka muswelo otutonga balunda udi na mvubu mpata, kadi umone ne muswelo obwanya kupwana na bantu bakalengeja būmi bobe bwikale buyampe mpata.
3. Dyumuka balunda babi
Bantu bonso kebasenswepo Yehova ne kulonda misoñanya yandi i balunda babi. Talai VIDEO, ne kwisambila pa kipangujo kilonda’kya.
-
I muswelo’ka otubwanya kutwela mu bulunda bubi pampikwa kuyuka?
Tangai 1 Bene Kodinda 15:33, ne kwisambila pa bino bipangujo:
-
I bantu ba muswelo’ka babwanya kwikala bu balunda babi? Mwanda waka?
Tangai Ñimbo ya Mitōto 119:63, ne kwisambila pa kino kipangujo:
-
Pokimba mulunda, ufwaninwe kutala bika?
Kipa kimo kibole kibwanya kuboleja ne bikwabo. Le balunda babi babwanya kwikala na lupusa’ka podi?
4. Bantu beshile na batwe babwanya kwikala balunda bayampe
Bible utela bana-balume babidi ba mu Isalela wa kala, ba Davida ne Yonafane. Bādi beshile kulampe ku myaka ne mu būmi mwine; inoko, bāpwene bulunda butendelwa. Tangai 1 Samwele 18:1, ne kwisambila pa kino kipangujo:
-
Mwanda waka kebilombepo balunda bekale’nka ba myaka imo ne ba būmi bwa muswelo umo?
Tangai Bene Loma 1:11, 12, ne kwisambila pa kino kipangujo:
-
Lelo balunda basenswe Yehova babwanya kwikankamika namani?
Mu ino drame, tala muswelo watene tutu umo balunda mu bifuko mwakadipo ulangila. Talai VIDEO, ne kwisambila pa bipangujo bilonda’bya.
-
Mu ino video, mwanda waka bambutwile ba Akil badi bakamwe pa mwanda wa balunda bandi ba ku masomo?
-
I bika byalengeje balunda bandi bamweke bidi bu bayampe kwadi?
-
Le wanekenye namani milangwe ya kwimona bunka?
5. Muswelo wa kupwana bulunda buyampe
Tala mwa kusokwela balunda ba binebine—ne mwa kwikadila bidi batwe bene bu balunda ba binebine ku bakwabo. Talai VIDEO.
Tangai Nkindi 18:24 ne 27:17, ne kwisambila pa bino bipangujo:
-
Le balunda ba bine bekwashanga namani?
-
Le nobe udi na balunda bayampe uno muswelo? Shi kudipo nabo, i muswelo’ka obwanya kwikala nabo?
Tangai Bene Fidipai 2:4, ne kwisambila pa kino kipangujo:
-
Pa kutana balunda bayampe, ufwaninwe bidi nobe kwikala bu mulunda muyampe ku bakwabo. Le ukebibwanya namani?
Pa kwikala na balunda bayampe, nobe ikala mulunda muyampe
BANTU BAMO BANENANGA’MBA: “I biyampe kwikala na mulunda ye-yense kupita’ko kubulwa mulunda.”
-
Le abe unena’po namani?
MU KĪPI
Shi tutonge balunda na tunangu, tukasangaja Yehova kadi tukamwena’mo batwe bene.
Pitulukai’mo
-
Mwanda waka Yehova utanga mutyima ku muswelo otutonga balunda?
-
Le i balunda ba muswelo’ka botufwaninwe kwepuka?
-
I muswelo’ka obwanya kutamija bulunda bwa mpwaninine na bantu bayampe?
KIMBA
Tala balunda bayampe mobabwaninya kwitukwasha mu matompo.
“Tuningijei Kipwano Kyetu Kumeso kwa Mfulo Kufika” (Kiteba kya Mulami, Kweji 11, 2019)
Tala matabula a kamweno pa kusokola balunda bayampe.
I bika byofwaninwe kuyuka pa mwanda utala balunda ba pa Entelenete?
Mu nsekununi inena’mba “Nadi Nkimba Tata,” tala bintu byalengeje muntu umo ashinte mutongelo wandi wa balunda.
“Bible Ushintanga Būmi” (Kiteba kya Mulami, 1 Kweji 4, 2012)
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
