MPANTTA 48
Mwaathanle saana apatthaniinyu
Apatthani anawuncerera utteeliya wihu ukati unkhaleehu saana ni anaanilipiha ukati unaananeehu marikariko. Masi Ibiiblya inaanihimerya wiira kahi atthu otheene ankhala apatthani omaana. Vano manannani cinlamuliyeenyu waathanla apatthani omaana? Muupuwele ala makohwaala.
1. Apatthani anaathanleenyu anhala wuukaviherani cani awula wuuphwanyihani masakha?
Navirihaka ukati mwinci nintthu, pooti ukhala mwinternetini awula co ni co, hiiva ninaapanka citthu uyova cimpankaawe. Nnyo citthunnyo pooti ukhala comaana awula coohinamaana, khampa Ibiiblya cineeraaya: “Ntthu neetta naatthu ankhili omaana, nuuyo nohala ukhala ntthu ankhili omaana. Masi ule neetta naatthu oohankhili omaana [ale ahinonfenta Yehova] naahala uttharuwa.” (Miruku 13:20) Apatthani anonfenta ni anonswalela Yehova pooti wuukaviherani uhihiyerera umpatthanana uyova ni ulakela upanka citthu comaana. Masi ukhalana apatthani ahinonfenta Yehova pooti uniiriha uhiya umpatthanana uyova. Phimaana, Ibiiblya inaanikurumica waathanla saana apatthani. Wakhalaka wiira asipatthaniihu ananfenta Nluku, iyo inaanikavihera hiiva ni ayova ciicammo. Coo, ninaakhitiri ‘ukurumicana ni ulipihana.’—1 Atesalonika 5:11.
2. Yehova noonela cani inanna cinaathanleenyu asipatthaniinyu?
Yehova nawaathanla saana asipatthannyaawe. Uyo “naapatthanana cinene atthu ookhuluvelya.” (Miruku 3:32) Yehova aahala ukhala cani ninaathanlile apatthani ahinonfenta uyova? Uyova anhala unyoonyiya cinene! (Nsome Tiyaku 4:4.) Masi naanyemaka atthu ampanka citthu coohinamaana ni naathanlaka apatthani anonfenta Yehova, uyo naahala ukhala ootteeliya ni naahala unipatthanana.—Isaalimu 15:1-4.
MUNCERERE WIITTHUCA WINYU
Moone kontha isiyani unaareera waathanla apatthani omaana ni mananna ookhitiri ukhalana apatthani anhala wuukaviherani umwiiwelela Yehova.
3. Nnyeme waathukana ale ampanka citthu coohinamaana
Atthu ahinonfenta Nluku ni ahineewelela malamulwaawe khunreera waathukana. Moone IVIDIYU, ni mwamalihaka woona, moopele mwaha nna nikohonna:
-
Manannani caahaleehu ukhalana apatthani oohinamaana hiiva woohicuwelela?
Nsome 1 Akorintu 15:33, ni mwamalihaka usoma, moopele mwaha ala makohwaala:
-
Ntthuni ahaahala ureera unthukana? Kontha isiyani?
Nsome Isaalimu 119:63, ni mwamalihaka usoma, moopele mwaha nna nikohonna:
-
Isiyani inonhimya ntthu ukhala mpatthani omaana awula mena?
Maçã mamoca owuntta pooti wunttiha maçã makiinaayo. Mpatthani oohiloka manannani caahalaawe uhonona makhalelweenyu?
4. Asipatthaniihu pooti ukhala o myaakha coovirikana ni nnye cirineehu
Ibiiblya inaawuuluma alopwana eeli yaapanka mphantte wa apoovu o Isarayeli yeehaniya Jonataa ni Davidi. Jonataa aari mwaana aamwene ni aari muulupale umpwaha Davidi. Hataa ukhalaka commo, ayo yahaana upatthani woolipa. Nsome 1 Samuweli 18:1, ni mwamalihaka usoma, moopele mwaha nna nikohonna:
-
Kontha isiyani khaninlamuliya waapatthanana paasi atthu arina myaakha ni makhalelo toko hiiva?
Nsome Arooma 1:11, 12, ni mwamalihaka usoma, moopele mwaha nna nikohonna:
-
Apatthani anonfenta Yehova manannani cinhalaaya ulipihana?
Moone IVIDIYU wiira moone mananna mmirawo mmoca cimphwanyilyaawe mpatthannyaawe nipuro nahaawehereraawe, ni mwamalihaka woona, moopele mwaha nna nikohonna:
IVIDIYU: Mwaaphwanye apatthani nipuro nahaaweherereenyu (5:06)
-
Nhina ividiyu yonneehu, kontha isiyani athumwaane ni anumwaane Akil yaari niiwasiwaasi nlattu wo atthu yaathukanaawe ucikolani?
-
Kontha isiyani Akil wancenryaawe waathukana ayo amirawaayo?
-
Manannani caamalihacilyaawe wiicoona ukhala veekha?
5. Mananna ookhitiri waaphwanya apatthani omaana
Moone mananna ookhitiri waaphwanya apatthani eekhweeli. Ciicammo, moone mananna ookhala mpatthani omaana. Moone IVIDIYU.
Nsome Miruku 18:24 ni 27:17. Mwamalihaka usoma, moopele mwaha ala makohwaala:
-
Manannani apatthani eekhweeli cinkaviheranaaya?
-
Nyuuva nhaana apatthani commo? Wakhala wiira nyuuva khanrina, isiyani inlamuliyeenyu upanka wiira mwaakhalane apatthani eekhweeli?
Nsome Afilipo 2:4, ni mwamalihaka usoma, moopele mwaha nna nikohonna:
-
Wiira nkhalane apatthani eekhweeli, nyuuva nhaana nkhalaka mpatthani omaana. Manannani cinlamuliyeenyu upanka iyo itthwiiyo?
Wiira mwaaphanye apatthani eekhweeli, nyuuva nhaana nkhalaka mpatthani omaana
ATTHU AKIINA ANEERA: “Itthu yuulupale ukhanle ukhalana apatthani, hataa akhalaka ntthu phi ntthu.”
-
Nyuuva mwaahala waakhula cani?
UTHIKILELA
Waathanla saana asipatthaniihu unaaniphwanyiha ifayita hiiva ni ninantteeliha nrima Yehova.
Wuupuwela
-
Kontha isiyani Yehova naavaha ifayita mananna cinaathanleehu asipatthaniihu?
-
Inannani yaapatthani anlamuliyeehu waanyema?
-
Nnohala ukhitiri cani waaphwanya apatthani omaana?
MWAPHEELAKA UCUWELA CITTHU CIKIINA
Moone mananna apatthani omaana anhalaaya unikavihera ukati wo masankiho.
“Ulipihace upatthannya uhinaphiya ukati woomala ila ituninyeela” (Ukhalenla, yo Novembro yo 2019)
Moone miruku comaana cinhala wuukaviherani waaphwanya apatthani omaana.
Isiyani inlamuliyeenyu ucuwela nhina ukhalana apatthani mwinternetini?
Wiira moonelele itthu yaamwiirihile nlopwana mmoca uwehacera mananna caathanlaawe asipatthannyaawe, nsome mwaha uneera: “Mi kampheela cinene waaphwanya apaapa.”
“Ibiiblya inaarukunusa makhalelo aatthu” (Ukhalenla, 1 yo Abril yo 2012)
