ISIFUNDO 48
Khetha Kuhle Abangane
Abangane abasithandayo bayasinceda ngezikhathi ezinzima baphinde bathokoze lathi ngezikhathi ezimnandi. Kodwa iBhayibhili lithi kumele sinanzelele ekukhetheni abangane. Manje kuyini okungakunceda ukuthi ukhethe kuhle abangane? Ake sixoxe ngayo indaba le.
1. Abangane obakhethayo bangayitshintsha njani impilo yakho?
Abangane bangayitshintsha indlela owenza ngayo locabanga ngayo kungelani lokuthi ubonana labo mathupha kumbe lixoxa kwezokuxhumana. Bangakunceda ukuthi wenze izinto ezinhle kumbe bakutshelele eceleni. IBhayibhili lithi: “Ohamba “labahlakaniphileyo uzahlakanipha, kodwa ozwanana lezithutha [kumbe labo abangamthandiyo uJehova] uzangena emanyaleni.” (IZaga 13:20) Abangane abathanda uJehova bazakunceda ukuthi uhlale useduze laye lokuthi wenze izinqumo ezinhle. Kodwa labo abangamthandiyo uJehova bazakuphambanisa ekukhonzeni. Yikho iBhayibhili lisikhuthaza ukuthi sikhethe kuhle abangane! Nxa silabangane abathanda uNkulunkulu njengathi, siyancedakala kakhulu ngoba ‘sizaqhubeka sikhuthazana futhi sisakhana.’—1 KwabaseThesalonika 5:11.
2. UJehova ulendaba labangane obakhethayo yini?
UJehova ukhetha kuhle abangane bakhe. IBhayibhili lithi: “Ungumngane omkhulu wabathembekileyo.” (IZaga 3:32) Ucabanga ukuthi uJehova uzwa njani nxa sisiba labangane abangamkhonziyo? Kumzwisa ubuhlungu kakhulu! (Bala uJakhobe 4:4.) Kodwa uyathokoza futhi abeseduze lathi nxa sikhetha abangane abamthandayo labamkhonzayo.—IHubo 15:1-4.
GEBHA UJULE
Engxenyeni le uzabona ukuthi kungani kuqakathekile ukukhetha kuhle abangane lokuthi ungabathola njani abangane abathembekileyo.
3. Xwaya abangane ababi
Abantu abangamthandiyo uNkulunkulu labangenzi lokho akufunayo bangabangane ababi. Bukelani IVIDIYO beselixoxa ngombuzo olandelayo.
-
Kungenzakala njani ukuthi sibe labangane ababi singananzeleli?
Bala u-1 Khorinte 15:33 beselixoxa ngemibuzo le:
-
Ngonjani umngane omubi? Kungani usitsho njalo?
Bala iHubo 119:63 beselixoxa ngombuzo olandelayo:
-
Kumele udinge umngane onjani?
Isithelo esisodwa esibolileyo singabolisa lezinye. Lokuba lomngane omubi kuzaphambanisa imikhuba yakho emihle
4. Kunceda ngani ukuba labangane abatshiyene lawe?
IBhayibhili lisitshela ngobungane bukaDavida loJonathani. Amadoda la ayengamathe lolimi lanxa ayetshiyene ngeminyaka njalo ekhuliswe ngendlela ezitshiyeneyo. Bala u-1 Samuyeli 18:1 beselixoxa ngombuzo lo:
-
Abangane obakhethayo kumele kube ngabantu abalingana lawe kuphela yini?
Bala uRoma 1:11, 12 beselixoxa ngombuzo olandelayo:
-
Abangane abathanda uJehova bancedisana njani?
Bukelani ividiyo le ukuze ubone ukuthi umfowethu osakhulayo wamthola njani umuntu ayengacabangeli ukuthi angacina esengumngane wakhe. Bukelani IVIDIYO beselixoxa ngemibuzo elandelayo.
-
Kungani abazali bakaJabu babekhathazekile ngabangane ayelabo esikolo?
-
Kuyini okwenza uJabu wacabanga ukuthi abangane laba babelungile?
-
UJabu wenzani ukuze abe lomngane othanda uJehova?
5. Ungabathola njani abangane abahle?
Ake sibone ukuthi ungabathola njani abangane abahle lokuthi ungenzani ukuze ube ngumngane omuhle. Bukelani IVIDIYO.
Bala iZaga 18:24 lo–27:17 beselixoxa ngemibuzo le:
-
Abangane beqiniso bancedisana njani?
-
Ulabo yini abangane abalendaba lawe? Nxa ungelabo, ungenzani ukuze ubathole?
Bala uFiliphi 2:4 beselixoxa ngombuzo olandelayo:
-
Ukuze ube labangane abahle, lawe kumele ube ngumngane omuhle. Kuyini okungakunceda?
Nxa ufuna ukuba labangane abahle, kumele lawe ube ngumngane omuhle
ABANYE BATHI: “Kumele wamukele loba ngubani ofuna ukuba ngumngane wakho, ngoba uyacina ungelamngane.”
-
Ungamphendula usithini umuntu otshonjalo?
ISIFINQO
Ukukhetha kuhle abangane kuyasinceda kakhulu njalo kuthokozisa uJehova.
Ufundeni?
-
Kungani uJehova efuna sikhethe kuhle abangane?
-
Ngabangane abanjani okumele ubaxwaye?
-
Ungabathola njani abangane beqiniso?
THOLA OKUNENGI
Bala isihloko lesi uzwe ukuthi abangane abahle bangakunceda njani ngezikhathi ezinzima.
“Qinisa Ubungane Bakho Labanye Ukuphela Kungakafiki” (INqabayokulinda, November 2019)
Bala uzwe ukuthi ungabathola njani abangane abahle.
Bukela ividiyo le ubone izingozi okumele uzinanzelele ngokuba labangane kwezempucuko.
Bala isihloko esithi “Ngangifisa Ukuba Lobaba” ukuze ubone ukuthi kuyini okwenza eyinye indoda yatshiya abangane eyayilabo.
“IBhayibhili Liyamntshintsha Umuntu” (INqabayokulinda, April 1, 2012)
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
