OSHILESHWA 48
Hogolola ookuume koye pandunge
Ohatu kala twa nyanyukwa noonkondo ngele tu li nookuume ketu kopothingo, nohaye tu tsu omukumo uuna tu li muudhigu. Ihe Ombiimbeli otayi tu londodha kutya hakehe gumwe e li kuume omwaanawa. Ongiini ano to vulu okuhogolola ookuume aawanawa? Natu ka kundathane omapulo taga landula.
1. Ongiini ookuume mboka wa hogolola taya vulu oku ku nwetha mo?
Olundji aantu mboka hatu endathana nayo nenge hatu kwatathana nayo okupitila komapandja gokointaneta, ohaya vulu oku tu nwetha mo nawa nenge nayi. Ombiimbeli otayi ti: “Enda pamwe naanawino, u likole owino, ihe ngoka ta kala paagoya [mboka kaaye hole Jehova], ota likola uuwinayi.” (Omayeletumbulo 13:20) Ookuume mboka ye hole Jehova nohaye mu longele, otaya vulu oku ku kwathela wu hedhe popepi naye nowu ninge omatokolo gopandunge. Ihe mboka ihaaya longele Jehova otaya vulu oku ku hedhitha kokule naye. Nomolwaashono Ombiimbeli tayi tu ladhipike tu hogolole ookuume ketu pandunge. Ngele ookuume ketu oye hole Kalunga, otashi ke tu etela uuwanawa notashi ke ya etela wo uuwanawa. Kungawo, otatu ka vula ‘okukumagidhathana nokukwathathana.’ — 1 Aatessalonika 5:11.
2. Jehova oha kala e uvitile ngiini ookuume mboka wa hogolola?
Jehova oha hogolola ookuume ke nuukeka. Ombiimbeli otayi ti: “Omuwa okwi inekela aayuuki.” (Omayeletumbulo 3:32) Jehova ota ka kala e uvite ngiini ngele otwa hogolola ookuume mboka kaaye mu hole? Ota ka kala a yemata noonkondo. (Lesha Jakob 4:4.) Ota ka kala a nyanyukwa notatu ka kala ookuume ke ngele otwa yanda ookuume aawinayi, e tatu hedha popepi naye nosho wo naamboka ye mu hole. — Episalomi 15:1-4.
ILONGA OSHINDJI
Tala kutya omolwashike sha simana okuhogolola ookuume aawanawa nankene taya vulu oku ku etela uuwanawa monkalamwenyo yoye.
3. Yanda okweendathana nookuume aawinayi
Aantu mboka kaaye hole Jehova nosho wo omithikampango dhe, oye li ookuume aawinayi. Dhana OKAVIDIO, e tamu kundathana epulo tali landula.
-
Ongiini tashi vulika tu endathane naantu aawinayi inaatu shi nongela?
Lesha 1 Aakorinto 15:33, e tamu kundathana omapulo taga landula:
-
Aantu yeni taya vulu okukala ookuume aawinayi? Omolwashike to tile ngawo?
Lesha Episalomi 119:63, e tamu kundathana epulo tali landula:
-
Uuna to hogolola ookuume owu na okutala kushike?
Eyapula limwe lyo ola otali vulu okwooleka omakwawo. Ongiini okweendathana nomuntu ngoka e na eihumbato ewinayi taku vulu oku ku nwetha mo?
4. Otatu vulu okupanga uukuume wopothingo naantu yi ili noyi ili
Ombiimbeli oya popya kombinga yaalumentu yaali yomuIsraeli shonale, David naJonatan. Jonatan okwa li omukuluntu kuDavid nokwa li omwanamati gwomukwaniilwa, ihe nando ongawo, oya li ookuume kopothingo. Lesha 1 Samuel 18:1, e tamu kundathana epulo tali landula:
-
Omolwashike kaatu na owala okupanga uukuume naantu mboka ye thike putse nenge ye na ondondo yi thike puyetu?
Lesha Aaroma 1:11, 12, e tamu kundathana epulo tali landula:
-
Ookuume mboka ye hole Jehova otaya vulu ngiini okutsaathana omukumo?
Mokavidio taka landula, tala nkene omumwatate gumwe omugundjuka a li a panga uukuume nayalwe. Dhana OKAVIDIO, e tamu kundathana omapulo taga landula.
-
Ngaashi twa mono mokavidio, omolwashike aavali yaAkil ya li tayi ipula kombinga yookuume ke yokosikola?
-
Omolwashike Akil a li a hala okupanga uukuume naantu mbono?
-
Oshike a li a ningi, opo kaa kale e uvite ezaza?
5. Nkene to vulu okukaleka po uukuume weni
Natu tale nkene to vulu okumona ookuume aawanawa nankene to vulu wo okukala kuume omwaanawa. Dhana OKAVIDIO.
Lesha Omayeletumbulo 18:24; 27:17, e tamu kundathana omapulo taga landula:
-
Ookuume kashili ohaya kwathelathana ngiini?
-
Mbela owu na ookuume ya tya ngawo? Ngele ku ya na, ongiini to vulu oku ya mona?
Lesha Aafilippi 2:4, e tamu kundathana epulo tali landula:
-
Opo wu kale wu na ookuume aawanawa, nangoye owa pumbwa okukala kuume omwaanawa. Ongiini to vulu oku shi ninga?
Opo wu kale wu na ookuume aawanawa, nangoye owa pumbwa okukala kuume omwaanawa
AANTU YAMWE OHAYA TI: “Okukala wu na ookuume oshi li hwepo shi vulithe okukala waa ya na.”
-
Ngoye oto ti ngiini?
OWI ILONGO SHIKE?
Ngele otwa hogolola ookuume ketu pandunge, otatu kala twa hokiwa kuJehova notashi tu etele wo uuwanawa.
Omapulo geendululo
-
Okuhogolola ookuume ketu ohaku uvitha ngiini Jehova?
-
Aantu ya tya ngiini kaatu na okupanga uukuume nayo?
-
Ongiini to vulu okupanga uukuume wopothingo naantu mboka ye li nawa?
UUYELELE WA GWEDHWA PO
Tala nkene ookuume aawanawa taya vulu oku tu kwathela momathimbo omadhigu.
“Panga uukuume wa kola nayalwe, manga ehulilo inaali ya” (Oshungolangelo, Novomba 2019)
Tala shoka to vulu okuninga, opo wu hogolole ookuume aawanawa.
Oshike wu na okukala wu shi kombinga yokupanga uukuume nayalwe okupitila mointaneta?
Lesha ehokololo, “Onda li ndi na ondjuulukwe yokukala ndi na ngoka te vulu okutya oye tate,” wu mone kutya omolwashike omulumentu gumwe a hogolola okupanga uukuume naantu yalwe.
“Ombiimbeli ohayi lundulula onkalamwenyo yaantu” (Oshungolangelo, 1 Apilili 2012)
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
