ƐZUKOALƐDEƐ 48
Kpondɛ Ɛ Gɔnwo Mɔ Nrɛlɛbɛ Nu
Agɔnwolɛma kpalɛ maa yɛ nye die wɔ mekɛ kpalɛ nu yɛɛ bɛmaa yɛ anwosesebɛ wɔ mekɛ mɔɔ ninyɛne ɛngɔ ye boɛ la. Noko Baebolo ne bɔ yɛ kɔkɔ kɛ tɛ awie biala a le agɔnwolɛ kpalɛ a. Ɔti kɛ ɔkɛyɛ na wɔakpondɛ agɔnwolɛma kpalɛ ɛ? Suzu kpuya ɛhye mɔ anwo.
1. Kɛzi menli mɔɔ ɛfa bɛ agɔnwolɛ la baha wɔ ɛ?
Yɛta yɛsukoa menli mɔɔ yɛ nee bɛ tu la subane. Ɛhye bahola ayɛ kpalɛ anzɛɛ ɛtane. Ɛhye le zɔ saa bɛle menli mɔɔ yɛ nee bɛ dua anzɛɛ yɛ nee bɛ tu wɔ yintanɛte zo a. Kɛ mɔɔ Baebolo ne ka la, “sonla mɔɔ nee nrɛlɛbɛvolɛ dua la banwu nrɛlɛbɛ, noko mɔɔ nee koasea [awie mɔɔ ɛngulo Gyihova] tu la, edwɛkɛ bado ye.” (Mrɛlɛbulɛ 13:20) Agɔnwolɛma mɔɔ kulo Gyihova na bɛsonle ye la bahola aboa wɔ bɛamaa wɔabikye ye na wɔazi kpɔkɛ kpalɛ. Noko saa yɛfa menli mɔɔ bɛnle asafo ne anu la agɔnwolɛ kyengye a bɛbahola bɛahwe yɛ bɛavi Gyihova anwo. Ɛhye ati a Baebolo ne se yɛkpondɛ yɛ gɔnwo mɔ nrɛlɛbɛ nu la! Saa yɛ gɔnwo mɔ kulo Nyamenle a, ɔboa yɛ nee bɛdabɛ. Yɛkola ‘yɛkɔ zo yɛmaa yɛ nwo anwosesebɛ na yɛboa yɛ nwo ngoko.’—1 Tɛsalonaekama 5:11.
2. Kɛzi menli mɔɔ ɛfa bɛ agɔnwolɛ la ka Gyihova ɛ?
Gyihova nea ye agɔnwolɛvalɛ boɛ. “Ɔ nee tenlenema nyia agɔnwolɛvalɛ kyengye.” (Mrɛlɛbulɛ 3:32) Saa yɛfa menli mɔɔ ɛngulo Gyihova la agɔnwolɛ a kɛzi ɔbade nganeɛ ɛ? Ɔbali nyane kpole! (Kenga Gyemise 4:4.) Noko saa yɛkpo agɔnwolɛ ɛtane na yɛbikye Gyihova nee menli mɔɔ kulo ye la a, ɔ nye balie na yeava yɛ yeayɛ ɔ gɔnwo mɔ.—Edwɛne 15:1-4.
SUKOA DƆƆNWO
Sukoa deɛmɔti ɔhyia kɛ yɛkpondɛ agɔnwolɛma kpalɛ la, na nea kɛzi ɛbahola wɔanyia agɔnwolɛma mɔɔ baboa wɔ kpalɛ la.
3. Nea boɛ wɔ agɔnwolɛ ɛtane nwo
Menli mɔɔ ɛngulo Nyamenle nee ye ngyinlazo ne mɔ la ɛnle agɔnwolɛma kpalɛ. Ye VIDIO ne, na akee bɛzuzu kpuya ɛhye anwo.
-
Kɛzi yɛbahola yɛ nee agɔnwolɛ ɛtane adu mɔɔ yɛ adwenle ɛnrɛra zo ɛ?
Kenga 1 Kɔlentema 15:33, na akee bɛzuzu kpuya ɛhye mɔ anwo:
-
Nwane sonla a bahola ayɛ agɔnwolɛ ɛtane amaa wɔ a? Duzu ati ɔ?
Kenga Edwɛne 119:63, na akee bɛzuzu kpuya ɛhye anwo:
-
Duzu a bamaa wɔanwu kɛ awie le agɔnwolɛ kpalɛ a?
Bakama ko kpɔlɔ a ɔkola ɔsɛkye mɔɔ ɛha la. Kɛzi agɔnwolɛ ɛtane ko bahola azɛkye wɔ ɛ?
4. Yɛbahola yɛava menli mɔɔ asolo bɛ la agɔnwolɛ kyengye
Baebolo ne ka Devidi nee Dwɔnatan mɔɔ ɛnee bɛ mu nwiɔ bɛwɔ tete Yizilayɛ la anwo edwɛkɛ. Ɛnee asolo bɛ ɛvolɛ nee bɛ gyinlabelɛ; noko ɛnee bɛle agɔnwolɛma kpalɛ. Kenga 1 Samoɛle 18:1, na akee bɛzuzu kpuya ɛhye anwo:
-
Duzu ati a tɛ menli mɔɔ le yɛ tipɛnema anzɛɛ yɛ nee bɛ gyinlabelɛ le ko la a dahuu ɔwɔ kɛ yɛfa bɛ agɔnwolɛ a?
Kenga Wulomuma 1:11, 12, na akee bɛzuzu kpuya ɛhye anwo:
-
Kɛzi agɔnwolɛma mɔɔ kulo Gyihova la kola maa bɛ nwo anwosesebɛ ɛ?
Wɔ vidio ɛhye anu, nea kɛzi adiema kpavolɛ bie nyianle agɔnwolɛma wɔ ɛleka mɔɔ ɔ nye ɛnla la. Ye VIDIO ne, na akee bɛzuzu kpuya ɛhye mɔ anwo.
-
Wɔ vidio ne anu, duzu ati a ɛnee menli mɔɔ Akil fa bɛ agɔnwolɛ wɔ sukulu la gyegye ye awovolɛ a?
-
Mɔlebɛbo ne, ninyɛne boni mɔ a maanle ɔ nye liele menli zɔhane mɔ agɔnwolɛvalɛ nwo a?
-
Kɛzi ɔholale ɔlile ɔ nwo mɔɔ yɛ ye koonwu la anwo gyima ɛ?
5. Kɛzi ɛbanyia agɔnwolɛma kpalɛ la
Nea kɛzi ɛbanyia agɔnwolɛma kpalɛ nee kɛzi ɛbahola wɔayɛ agɔnwolɛ kpalɛ la. Ye VIDIO ne.
Kenga Mrɛlɛbulɛ 18:24 yɛɛ 27:17, na akee bɛzuzu kpuya ɛhye mɔ anwo:
-
Kɛzi agɔnwolɛma kpalɛ boa bɛ nwo ɛ?
-
Ɛlɛ agɔnwolɛma kpalɛ zɛhae bie ɔ? Saa ɛnlɛ bie a, kɛ ɔkɛyɛ na wɔanyia bie ɛ?
Kenga Felepaema 2:4, na akee bɛzuzu kpuya ɛhye anwo:
-
Ɔwɔ kɛ ɛyɛ agɔnwolɛ kpalɛ, amaa wɔanyia agɔnwolɛma kpalɛ. Kɛ ɔkɛyɛ na wɔayɛ zɔ ɛ?
Ɔwɔ kɛ ɛyɛ agɔnwolɛ kpalɛ, amaa wɔanyia agɔnwolɛma kpalɛ
BIE MƆ KA KƐ: “Ɛfa awie biala agɔnwolɛ a ɔle kpalɛ ɔtɛla kɛ ɛnlɛ agɔnwolɛ fee.”
-
Duzu a ɛbaha a?
EDWƐKƐ TITILI
Saa yɛkpondɛ yɛ gɔnwo mɔ nrɛlɛbɛ nu a, ɔmaa Gyihova anye die na ɔboa yɛdayɛ mumua ne.
Ndinu
-
Duzu ati a menli mɔɔ yɛfa bɛ agɔnwolɛ la hyia Gyihova a?
-
Nwane mɔ a ɔnle kɛ yɛfa bɛ agɔnwolɛ a?
-
Kɛ ɔkɛyɛ na ɛ nee menli mɔɔ kulo Gyihova la ava agɔnwolɛ kyengye ɛ?
KPONDƐ DƆƆNWO
Nea kɛzi agɔnwolɛma kpalɛ kola boa yɛ wɔ sɔnea mekɛ nu la.
“Kpondɛ Agɔnwolɛma Kpalɛ Kolaa Na Awieleɛ Ne Ara” (Ɛzinzalɛ Arane, November 2019)
Nea mɔɔ ɛbahola wɔayɛ amaa wɔanyia agɔnwolɛma kpalɛ la.
Duzu a ɔwɔ kɛ ɛnwu ye wɔ yintanɛte zo agɔnwolɛvalɛ nwo a?
Wɔ anwubielɛ ne mɔɔ se “Ɛnee Melɛkpondɛ Me Papa” la anu, nea debie mɔɔ maanle nrenyia bie ziale zuzule menli mɔɔ ɔfa bɛ agɔnwolɛ la anwo bieko la.