YACHAI 48
Alli amigocunata agllai
Alli amigocunaca ñucanchij llaquicunata charijpipish ayudanmi. Ashtahuan cushilla causachunpish ayudanmi. Shinapish Bibliapica mana tucuicunachu alli amigocuna can ninmi. Chaimanta ¿ima shinataj alli amigocunata agllai tucungui? Huaquin yuyaicunata yachashun.
1. ¿Amigocunaca ima shinataj canta ayudai tucun?
Shujtajcunahuan ashtahuan tiempota pasashpami paicuna laya yuyashpa imatapish rurai callarinchij. Paicunahuan ñahui ñahui parlashpa o redes socialespi parlashpapish paicuna layami cashun. Proverbios 13:20-pica: ‘Yachaisapacunahuan tandanacujca, yachaisapami tucun. Ashtahuanpish rumi shungucunahuan o Jehovata mana cꞌuyajcunahuan tandanacujca, jatun llaquipimi urman’ ninmi. Jehová Diosta cꞌuyaj amigocunaca Jehová Diosta cꞌuyachun, paita sirvichun, alli decisioncunatapish agllachunmi ayudanga. Pero Jehová Diosta mana sirvij amigocunata charishpaca Diosmantami caruyangui. Chaimantami Bibliapica ima shina alli amigocunata agllana cashcata yachachin. Ñucanchij amigocuna Jehová Diosta cꞌuyajpica tandallami Diosta sirvishun. Chaimantami Bibliapi nishca consejota cazuna canchij. Bibliapica: “Ima shina cunan ruracushca shinallataj, caishuj chaishujta animachichij caishuj chaishujta sinchiyachichij” ninmi (1 Tesalonicenses 5:11).
2. ¿Mana allicunahuan tandanacujpica Jehová Diosca ima shinataj sintirin?
Jehová Diosca paipaj amigocunataca alli ricushpami agllan. Paica “cashcata rurajcunahuanca, tandallami causan” (Proverbios 3:32). ¿Paita mana cꞌuyaj amigocunata charijpica Jehová Diosca ima layashi sintiringa? Paica llaquillami sintiringa (Santiago 4:4-ta liyipai). Shinapish mana alli amigocunata saquishpa, Yaya Diospajman cꞌuchuyashpa, paita cꞌuyajcunahuan tandanacushpaca Jehová Diospaj shungutami cushichishun. Paipish ñucanchij amigomi canga (Salmo 15:1-4).
ASHTAHUAN YACHAI
Alli amigocunata agllana imamanta valishca cashcatami ricushun. Shinallataj alli amigocuna ima shina canta ayudai tucushcatami yachashun.
3. Mana alli amigocunahuanca ama tandanacuichu
Diosta mana cꞌuyajcuna, pai mandashcacunatapish mana cazujcunaca mana alli amigocunachu can. VIDEOTA ricui. Qꞌuipaca cai catij tapuitami yachashun:
-
¿Mana alli amigocunahuanca ima shinataj tandanacui callari tucunchij?
1 Corintios 15:33-ta liyipai, NWT. Qꞌuipaca cai catij tapuicunatami yachashun:
-
¿Picunataj mana alli amigocuna cai tucun? ¿Imamantataj paicunaca mana alli amigocuna can?
Salmo 119:63-ta liyipai. Qꞌuipaca cai catij tapuitami yachashun:
-
¿Shuj alli amigoca ima shinataj cana can?
Shuj manzana ashalla ismushca cashpapish tucui manzanacunatami ismuchi tucun. Shinallataj ¿mana alli amigocunata charishpaca imataj tucungui?
4. Shujtajcunahuanpishmi alli amigocuna cai tucunchij
Bibliapica Israelpi causashca Davidmanta, Jonatanmantami parlan. Paicunaca mana igual edadta charishpapish, chꞌican laya causaita charishpapish alli amigocunami carca. 1 Samuel 18:1-ta liyipai. Qꞌuipaca cai catij tapuitami yachashun:
-
¿Imamantataj ñucanchij amigocunaca mana ñucanchij layallataj cana can?
Romanos 1:11, 12-ta liyipai. Qꞌuipaca cai catij tapuicunatami yachashun:
-
¿Jehová Diosta cꞌuyaj amigocunaca ima shinataj paicunapura animarincuna?
¿Shuj jovenca maipitaj alli amigocunata rijsirca? VIDEOTA ricui. Qꞌuipaca cai catij tapuicunatami yachashun:
-
Akilpaj yaya mamaca paipaj huahua escuelapi charishca amigocunamantaca, ¿imamantataj preocuparishca carcacuna?
-
¿Akilca imamantataj chai amigocunahuan apanacunata munarca?
-
¿Sololla ama sintiringapajca imatataj rurarca?
5. ¿Ima shinataj alli amigocunata chari tucungui?
Alli amigocunata ima shina charinata, canpish ima shina alli amigo cai tucushcata ricui. VIDEOTA ricui.
Proverbios 18:24 y 27:17-ta liyipai. Qꞌuipaca cai catij tapuicunatami yachashun:
-
¿Alli amigocunaca ima shinataj ayudan?
-
¿Proverbios libropi parlashca amigocuna layatachu charingui? ¿Chashna laya amigocunata mana charishpaca imatataj rurai tucungui?
Filipenses 2:4-ta liyipai. Qꞌuipaca cai catij tapuitami yachashun:
-
Alli amigocunata charingapajca canpishmi alli amigo cana cangui. ¿Ima shinataj alli amigo cai tucungui?
Alli amigocunata charingapajca canpishmi alli amigo cana cangui.
HUAQUINCUNACA: “Mana ñucalla sintiringapajmi ñuca charishca amigocunamanta mana caruyasha nini” nincunami.
-
¿Canca imatataj yuyangui?
YUYARISHUNCHIJ
Alli amigocunata agllashpaca Diostami cushilla sirvishun. Paipaj shungutapishmi cushichishun.
Yuyaringapaj tapuicuna
-
¿Jehová Diosca imamantataj alli amigocunata charichun munan?
-
¿Ima laya amigocunatataj mana charina canchij?
-
¿Diosta sirvijcunahuan alli amigocuna tucungapajca imatataj rurana cangui?
CAICUNATAPISH RICUI
Llaquicunahuan cajpi alli amigocuna ima shina ayudai tucushcata ricui.
“Cunanmanta alli apanacushunchij” (Huillaj, noviembre de 2019)
Alli amigocunata charingapaj imata rurai tucushcata ricui.
¿Internetpi amigocunata charinamantaca imatataj yachana cangui?
“Shuj yayata charinatami munarcani” nishcata yachai. Chaipica shuj runa pai charishca amigocunata imamanta saquishcatami yachachin.
“Bibliata yachashpami cambiashcacuna” (Huillaj, 1 de abril de 2012)
Caitapish yachai
GENTECUNA RURASHCA TAPUICUNA
¿Testigo de Jehovacunaca ima shinataj Bibliamanta yachachincuna?
Testigo de Jehovacunahuan Bibliamanta gratis estudiacushpaca can charishca Bibliatami utilizai tucungui. Cambaj familiata o cambaj amigocunatapish canta compañachun invitai tucungui.
