LESONA 48
Ia Filifili ma le Atamai Au Uō
E tatou te maua le fiafia mai i a tatou uō vavalalata i taimi e sologa lelei ai mea, ma e latou te faamalosiau iā i tatou i taimi faigatā. Ae ua lapataʻia i tatou e le Tusi Paia, e lē o tagata uma o ni uō lelei. E faapefea la ona e filifilia ni uō lelei? Seʻi o tatou iloiloina fesili nei.
1. E faapefea ona e aafia i uō e te filifilia?
E tatou te ono aafia i tagata e tatou te faifaimea faatasi. E tusa pe e tatou te faifaimea faatasi pe fesootaʻi i luga o le initaneti, e mafai lava ona iai aafiaga lelei po o aafiaga leaga. Ua faapea mai le Tusi Paia, “o lē e savali ma tagata atamamai, e atamai ai o ia, a o lē e faifaimea faatasi ma tagata vālea [tagata e lē alolofa iā Ieova], e leaga ai lava o ia.” (Faataoto 13:20) O uō e alolofa ma tapuaʻi iā Ieova, e mafai ona fesoasoani iā te oe ia vavalalata atu iā Ieova ma faia filifiliga lelei. Ae o uō vavalalata e lē alolofa iā Ieova, e mafai ona latou tosina ese i tatou mai iā te ia. E lētioa a faalaeiau mai le Tusi Paia e filifili ma le atamai a tatou uō! Pe afai tatou te faauō i tagata e alolofa i le Atua, o le a tatou maua faatasi ai ma i latou aogā. O le a tatou “fefaalaeiauaʻi pea ma atiaʻe e le tasi le isi.”—1 Tesalonia 5:11.
2. O ā faalogona o Ieova i uō e tatou te filifilia?
E filifili ma le faaeteete e Ieova ana uō. “E mafuta vavalalata atu o Ia i ē ua amio saʻo.” (Faataoto 3:32) O ā faalogona o Ieova pe a tatou filifilia ni uō e lē alolofa iā te ia? E mautinoa o le a matuā lē fiafia lona finagalo! (Faitau le Iakopo 4:4.) Ae o le a faafiafiaina lona finagalo ma filifilia i tatou e avea ma ana uō, pe a tatou teena aumea leaga ae mafuta atu iā te ia ma i latou e alolofa iā te ia.—Salamo 15:1-4.
SAʻILIʻILI ATILI
Iloilo pe aiseā e tāua ai le filifili lelei o a tatou uō, ma pe faapefea ona atiaʻe ni faauōga e aogā moni iā te oe.
3. Ia faaeteete i aumea leaga
O aumea leaga, o tagata ia e lē alolofa i le Atua ma lē tausia ana tapulaa. Faaali le VITIŌ, ona talanoa lea i le fesili o loo mulimuli mai.
-
E faapefea ona tatou aafia i aumea leaga e aunoa ma le iloaina?
Faitau le 1 Korinito 15:33, ona talanoa lea i fesili nei:
-
O le ā le ituaiga tagata e ono avea ma aumea leaga? Aiseā?
Faitau le Salamo 119:63, ona talanoa lea i le fesili lenei:
-
E faapefea ona e iloa se uō lelei?
E mafai e se apu pala e tasi ona faaleagaina ai isi apu. E faapefea la ona e aafia i se aumea leaga?
4. E mafai ona avea isi e tatou te lē tupulaga ma a tatou uō lelei
O loo taʻua i le Tusi Paia Tavita ma Ionatana, o ni tane i Isaraelu anamua. Na eseese o la matutua ma tulaga, ae na la atiaʻe se faauōga māfana. Faitau le 1 Samuelu 18:1, ona talanoa lea i le fesili lenei:
-
Aiseā o se mea lelei ai le faauō i tagata e eseese lo tatou matutua po o tulaga?
Faitau le Roma 1:11, 12, ona talanoa lea i le fesili lenei:
-
E faapefea i uō e alolofa iā Ieova ona faalaeiau e le tasi le isi?
Mātau mai i le vitiō lenei, pe na faapefea ona maua e se uso talavou ni uō i ni auala e na te leʻi faatalitalia. Faaali le VITIŌ, ona talanoa lea i fesili o loo mulimuli mai.
-
I le vitiō, aiseā na popole ai mātua o Akil i ana uō i le aʻoga?
-
O ā māfuaaga na uunaʻia ai Akil e faauō atu iā i latou na?
-
Na faapefea ona ia manumalo i faalogona o le tuua toʻatasi?
5. Le auala e atiaʻe ai ni faauōga lelei
Iloilo pe faapefea ona maua ni uō moni, ma pe faapefea foʻi ona avea oe o se uō lelei. Faaali le VITIŌ.
Faitau le Faataoto 18:24 ma le 27:17, ona talanoa lea i fesili nei:
-
E faapefea i uō moni ona fesoasoani le tasi i le isi?
-
Po o iai ni au uō faapena? Pe afai e leai, e faapefea ona maua?
Faitau le Filipi 2:4, ona talanoa lea i le fesili lenei:
-
Ina ia maua ni uō lelei, e tatau ona avea oe o se uō lelei. E faapefea ona e faia lenā mea?
Ina ia maua ni uō lelei, e tatau ona avea oe o se uō lelei
UA FAAPEA MAI NISI: “E sili atu le iai o so o se uō nai lo o le leai o se uō.”
-
Ae o le ā sou manatu?
AOTELEGA
Pe a filifili ma le atamai a tatou uō, e tatou te faafiafiaina ai Ieova ma maua ai le tele o aogā.
Fesili Autalu
-
Aiseā e tāua ai iā Ieova le auala e filifilia ai a tatou uō?
-
O ā ituaiga uō e tatau ona tatou ʻalofia?
-
E faapefea ona e atiaʻe ni faauōga māfana ma ē e tatau ona faauō i ai?
MANATU FAAOPOOPO
Iloilo le auala e fesoasoani ai uō moni iā i tatou i taimi faigatā.
“Ia Atiaʻe Faauōga Māfana a o Leʻi Oo Mai le Iʻuga” (Le Olomatamata, Novema 2019)
O mea e tatau ona e faia ina ia maua ai ni uō lelei.
O le ā e tatau ona e iloa e faatatau i faauōga i le initaneti?
I le tala “Sa Ou Moomoo Ina ia Iai Soʻu Tamā,” mātau pe aiseā na toe iloilo ai e se tane i latou na faauō i ai.
“E Mafai e le Tusi Paia Ona Suia Olaga” (Le Olomatamata, Aperila 1, 2012)