SIFUNDVO 48
Khetsa Bangani Bakho Ngekuhlakanipha
Bangani lesisondzelene nabo bayasijabulisa ngetikhatsi letimnandzi, baphindze basicinise ngetikhatsi letimatima. Nobe kunjalo, liBhayibheli liyasecwayisa kutsi akusiwo wonkhe umuntfu longumngani lokahle. Ngako ungabakhetsa njani bangani labakahle? Cabanga nganayi imibuto lelandzelako.
1. Bangani lobakhetsako bangakutsintsa njani?
Esikhatsini lesinyenti senta tintfo letentiwa bantfu lesicitsa sikhatsi nabo. Loku kungaba nemiphumela lemihle nobe lemibi, ngisho nobe labantfu sicoca nabo sibabona nobe etintfweni tebuchwephesha. Njengobe liBhayibheli lisho, “loyo lohamba nalabahlakaniphile naye utawuhlakanipha, kodvwa tintfo titamhambela kabi loyo lotihlanganisa netilima [labo labangamtsandzi Jehova].” (Taga 13:20) Bangani labatsandza Jehova bangakusita kutsi uhlale usondzelene naye futsi wente tincumo letikahle. Kantsi bangani labangamtsandzi Jehova bangasenta sikhweshe kuye. Kungako liBhayibheli lisikhutsata kutsi sikhetse bangani betfu ngekuhlakanipha! Nangabe bangani betfu kubantfu labatsandza Nkulunkulu, loko kutawuzuzisa tsine kanye nabo. Sitawukhona ‘kuchubeka sikhutsatana futsi sakhana.’—1 KubaseThesalonika 5:11.
2. Indlela lokhetsa ngayo bangani ingamenta ative njani Jehova?
Jehova uyacaphelisisa nakakhetsa bangani bakhe. “Ungumngani lomkhulu webantfu labalungile.” (Taga 3:32) Jehova angativa njani nasingakhetsa bangani labangamtsandzi? Angadvumateka kakhulu! (Fundza Jakobe 4:4.) Ngakulokunye, utawujabula futsi asente bangani bakhe nasilahla bangani lababi futsi sisondzela kuye nakulabo labamtsandzako.—Tihlabelelo 15:1-4.
CHUBEKA UFUNISISA
Hlola kutsi kubaluleke ngani kukhetsa bangani labakahle, uphindze utfole nekutsi ungabakha njani bangani labatakusita.
3. Caphela ungakhetsi bangani lababi
Bangani lababi bantfu labangamtsandzi Nkulunkulu kanye netimiso takhe. Dlala le-VIDEO, bese nicoca ngalombuto lolandzelako.
-
Ungaba njani ngumngani webantfu lababi ungakanaki?
Fundza 1 KubaseKhorinte 15:33, bese nicoca ngalemibuto:
-
Ngumuntfu lonjani longaba ngumngani lomubi kuwe? Usho ngani?
Fundza Tihlabelelo 119:63, bese nicoca ngalombuto:
-
Utawubona ngani kutsi umuntfu ungumngani lokahle?
Lihhabula linye lelibolile lingabolisa nalamanye. Kuba nemngani munye lomubi kungakutsintsa njani wena?
4. Bantfu labangafani natsi bangaba bangani labakahle
LiBhayibheli likhuluma ngaDavide naJonathani, lokungemadvodza lamabili aka-Israyeli wasendvulo. Jonathani bekamdzala kakhulu kunaDavide futsi ayindvodzana yenkhosi. Nobe kunjalo, bebabangani labakhulu. Fundza 1 Samuweli 18:1, bese nicoca ngalombuto:
-
Kungani kungakadzingeki kutsi bangani betfu ngaso sonkhe sikhatsi balingane natsi nobe babe sezingeni lekuphila lelifana neletfu?
Fundza KubaseRoma 1:11, 12, bese nicoca ngalombuto:
-
Bangani labatsandza Jehova bangakhutsatana njani?
Kule-video lelandzelako, bona kutsi lomzalwane losemusha wabatfola njani bangani etindzaweni letingakalindzeleki. Dlala le-VIDEO, bese nicoca ngalemibuto lelandzelako.
-
Kule-video, yini leyenta batali ba-Akil bakhatsateka ngebangani bakhe basesikolweni?
-
Ekucaleni, yini leyamenta wabatsandza labangani bakhe basesikolweni?
-
Wakhona njani kuncoba situnge lebekanaso?
5. Ungabakha kanjani bangani labakahle
Fundza kutsi ungabatfola njani bangani labakahle nekutsi nawe ungaba njani ngumngani lokahle. Dlala le-VIDEO.
Fundza Taga 18:24 na-27:17, bese nicoca ngalemibuto:
-
Bangani sibili basitana njani?
-
Wena unabo yini bangani labanjalo? Nangabe ute, ungabatfola njani?
Fundza KubaseFiliphi 2:4, bese nicoca ngalombuto:
-
Kuze ube nebangani labakahle, nawe kudzingeka ube ngumngani lokahle. Ungakwenta kanjani loko?
Kuze ube nebangani labakahle, nawe kufanele ube ngumngani lokahle
LABANYE BANTFU BATSI: “Kuncono kuba ngumngani wanobe ngabe ngubani kunekungabi nemngani sanhlobo.”
-
Wena ungatsini?
LOKO LESICOCE NGAKO
Nasikhetsa bangani betfu ngekuhlakanipha, sijabulisa Jehova futsi sitizuzisa tsine.
Yini Loyifundzile?
-
Indlela lesikhetsa ngayo bangani ibaluleke ngani kuJehova?
-
Bantfu labanjani lokungakafaneli sibente bangani betfu?
-
Singabakha njani bungani lobucinile nebantfu labakahle?
LOKUNYE LONGAKUHLOLA
Fundza kutsi bangani labakahle bangakusita njani ngetikhatsi letimatima.
“Yakha Bungani Lobucinile Kusengakefiki Kuphela” (Sicongosekulindza, saNovember 2019)
Cabanga ngetinyatselo longatitsatsa kuze wakhe bangani labakahle.
Yini lokufanele uyati ngekuba nebangani etintfweni tekuchumana?
Endzabeni letsi “Bengifisa Kuba Nababe,” tfola kutsi kungani lenye indvodza yashintja bangani.
“LiBhayibheli Liyakugucula Kuphila” (Sicongosekulindza, sa-April 1, 2012)
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
