Echi we aʼlá amigos tamujé iʼwiri jiti ta we kaníliami nipo. Ayénachó tamó iʼwiri jiti ta ke me omona nílipo. Nalí, ami we aʼlá natásaré jépuká nima mujé amígowala, jiti echi Biblia aní japi ke sinéami aʼlá amigos ju. Jiti la, ¿chúriká mi aʼlá machimea jépuká we aʼlá amigos ju? Ma binepo echi jitra.

1. ¿Chúsiá mi we aʼlá natásaré jépuká nima mujé amígowala?

Japalí bilé pagótami we napawí bilecho yúa japi aʼlá isimí o chati isimí, pe aminana echi ayénachó echi riká cho isima. Tákoré ti echi yúa napawí néeka echi internet o echi redes sociales, ayénachó echi riká ikimea. Jiti la, echi Biblia aní: “Echi japi iyena pagótami yúa we aʼlá nátami, ayénachó we aʼlá natama, nalí japi iyena pagótami yúa ke aʼlá nátami [o echi japi ke nijewi Jeobá], risoa nílima” (Proverbios 13:20). Echi amigos japi we galé alí nijewi Jeobá, mi iʼwírima jiti mi ke siné riwema Jeobá alí japi mi we aʼlá isima. Nalí, ami amigo nísaká echi pagótami yúa japi ke simía echoná congregación, mujé ko riwema Jeobá. Jiti la, echi Biblia tamó ané japi ta we aʼlá amigos olásaré. Japalí tamujé amígowala nijewi Jeobá sinéami ta we kanili, jiti echi riká ti noká japi riká aní na versículo: “Aʼnagupi waminabi wabé kanílatasi, ayénachó aʼnagupi waminabi galá bichíilatasi” (1 Tesalonicenses 5:11).

2. ¿Chu nílitima Jeobá echi amigos japi mi olá?

Jeobá ko we aʼlá machí aa jépuká nima echi amígowala. Alí echi ko “amígowala ju echi japi aʼlá nokáami ju” (Proverbios 3:32). ¿Chu nílima Jeobá ati yúa napawísaká echi pagótami japi ke nijewi echi? ¡Echi ko we omonama! (Leeri Santiago 4:4). Ke ti yúa napawísaká echi pagótami japi chati namuti noká, nalí ti mulíwisaká Jeobá alí japi echi we galé, Jeobá ko we kanílima alí tamujé amígowala nima (Salmo 15:1-4).

 AMINABI NATABO JAPI TA BINÉ

4. Ati omero olayá aʼláala amigos japi sinúrika ju tamujé yúa

Echi Biblia ko raʼicha okuá rijoi jitra, David alí Jonatán, japi pireili echomí Israel. Tákoré ke chopi ikí bamíbami nili alí sinúrika pireili, okuánika we aʼlá amigos nili. Leérisi 1 Samuel 18:1 alí raʼichasi jepuná jitra:

• Echi amigos japi ta olánali, ¿achi winomíwami bi nísaré, risóati o chopi ikí bamíbami?

Leérisi Romanos 1:11, 12 alí raʼichasi jepuná jitra:

• Echi amigos japi we galé Jeobá, ¿chúriká iʼwérili nijí anakupi niraa?

¿Chúriká bilé remalí riwali bilé amigo japi binoy mayeli japi ke echi amígowala nima? Inesi echi VIDEO alí raʼichasi jepuná jitra:

• ¿Chúsiá Akil wénwala we nátili echi amigos jitra japi Akil olali echoná escuela?

• ¿Chúsiá Akil ne kulí ko we kanilie echi amigos yúa napawía?

• ¿Chu isili Akil jiti ke bineli ka nílima?

 5. Chúriká mi olama we aʼlá amigos

 JAPI MI BINELI

Japalí ti olá we aʼlá amigos, we ti kaníliami ju alí ti kaníliti Jeobá.

Piri mi animea

• ¿Chúsiá Jeobá we natéami niraa iné chu iyiri amigos ti olá?

• ¿Chu iyiri pagótami yúa ata ke napawísaré?

• ¿Chúriká mi omeri we aʼlá amigo niya echi pagótami yúa japi aʼlá noká?