CHIIYO 48
Sala Beenzinyokwe Chabusongo
Beenzuma bapa kuti tubotelwe alubo chiindi nituli mumapenzi balatusimya. Pesi Bbayibbele lituchenjezya kuti teeboonse pe bakonzya kuba beenzuma balikabotu. Kujana twabasala biyeni beenzuma balikabotu? Bona mibuzyo iitobela.
1. Beenzuma balakonzya kupa kuti tuchiteenzi?
Tuchita zintu zichitwa aabantu mbituvuzya kukkalaabo. Zintu eezi zilakonzya kuba zibotu naakuti zibi kakutakwe ndaba kuti tubonana chantongola meso naakuti kakubelesegwa nzila zyakwaambuuzyania ziliwo mazubaano. Bbayibbele lyaamba kuti: “Ooyo weenda abasongo ulaba musongo, pele ooyo uuyanzana abafwubafwuba [chaamba bantu batayandi Jehova] ulajana mapenzi.” (Tusimpi 13:20) Beenzuma bayanda Jehova akumukomba balatugwasya kuti tukkale aafwiifwi anguwe akuti tusale zintu zimubotezya. Pesi kumvwanana aabantu batayandi Jehova kulakonzya kupa kuti tube kule anguwe. Nzizyo zipa kuti Bbayibbele litusungwaazye kuti tusale beenzuma munzila yabusongo. Kuti twamvwanana aabantu bayanda Leza ziyoogwasya ndiswe kuswaanizya ambabo. Alubo tuyoozumanana “kukulwaizyanya akuyakana umwi amweenzinyina.”—1 Batesalonika 5:11.
2. Beenzuma mbitusala bapa kuti Jehova amvwe biyeni?
Jehova usala beenzinyina balikabotu. “Balulami mbabajisi cilongwe ciyumu anguwe.” (Tusimpi 3:32) Jehova umvwa biyeni kuti twamvwanana aabantu batamuyandi? Ulabijilwa. (Bala Jakobo 4:4.) Pesi Jehova ulabotelwa kuti twasala kumvwanana aabantu bamuyanda akutantamuka bantu batali kabotu alubo tuyooswena aafwiifwi anguwe.—Intembauzyo 15:1-4.
YIYA ZYIINGI
Bona kuti nkamboonzi nikuyandikana kubikkila maanu kunzila njitusalaayo beenzuma ambukonzya kusala beenzinyokwe bakonzya kukugwasya mubuumi.
3. Tantamuka bantu batali kabotu
Bantu batayandi Leza alubo bataponi kweendelana azyeelelo zyakwe tabali kabotu pe. Mweebele VIDIYO, mpawo musandule mubuzyo uutobela.
-
Kujana zyachitika biyeni kuti tumvwanane aabantu batali kabotu katutakubwene pe?
Bala 1 Bakorinto 15:33, mpawo musandule mibuzyo iitobela:
-
Ubonaanga mweenzuma uutali kabotu muntu uulibiyeni? Nkamboonzi?
Bala Intembauzyo 119:63, mpawo musandule mubuzyo uutobela:
-
Niinzi nzweelede kulanga chiindi nusala muntu wakumvwananaawe?
Epulu limwi libolede lilakonzya kubozeka meenzinyina. Kumvwanana aamuntu uutali kabotu kujana kwakupambanisya biyeni?
4. Tulakonzya kumvwanana aabantu basiyene-siyene
Bbayibbele lyaambuula atala aDavida aJonatani. Teebakali basela limwi pe alubo bakakomezegwa munzila iisiyene pesi bakali kumvwanana loko. Bala 1 Samuele 18:1, mpawo musandule mubuzyo uutobela:
-
Nkamboonzi nituteelede kumvwanana aabantu basela lyesu luzutu naakuti balaamaponeno aali mbuli eesu?
Bala Baroma 1:11, 12, mpawo musandule mubuzyo uutobela:
-
Kumvwanana aabantu bayanda Jehova kugwasya biyeni?
Muvidiyo iitobela, bona umwi mulombe mbaakajana beenzinyina. Mweebele VIDIYO, mpawo musandule mibuzyo iitobela.
-
Nkamboonzi bazyali baAkil nibakali kukataazikana atala abantu mbaakali kumvwananaabo kuchikolo?
-
Niinzi zyakali kupa kuti Akil abonaanga mbeenzinyina balikabotu?
-
Niinzi chakamugwasya kuti azunde penzi lyakulendelelwa?
5. Mbukonzya kuba aabeenzinyokwe balikabotu
Bona mbukonzya kujana beenzinyokwe bachoonzyo ambukonzya kuba mweenzinyina uulikabotu. Mweebele KAVIDIYO.
Bala Tusimpi 18:24 a 27:17, mpawo musandule mibuzyo iitobela:
-
Bantu bamvwanana chachoonzyo bagwasyania biyeni?
-
Beenzinyokwe mbubabede na oobo? Kuti teembubabede, niinzi nzweelede kuchita kuti ujane bali boobo?
Bala Bafilipi 2:4, mpawo musandule mubuzyo uutobela:
-
Kuti tukonzye kujana beenzuma balikabotu, tweelede kusaanguna kuba mweenzinyina uulikabotu. Kujana wazichita biyeni?
Kuti ukonzye kujana beenzinyokwe balikabotu, weelede kusaanguna kuba mweenzinyina uulikabotu
BAMWI BAAMBA KUTI: “Ulakonzya kumvwanana aakufumbwa muntu kwiinda kukkala kutakwe.”
-
Kujana watyeni?
CHIFWIINSYO
Kusala beenzuma balikabotu kupa kuti Jehova abotelwe alubo kugwasya ndiswe.
Mibuzyo Yakwiindulula
-
Nkamboonzi Jehova nalaandaba abantu mbitusala kumvwananaabo?
-
Weelede kutantamuka bantu balibiyeni?
-
Niinzi nzweelede kuchita kuti umvwanane aabantu balikabotu?
YANDUULISISYA
Bona beenzuma bachoonzyo mbubatugwasya muziindi zyamapenzi.
“Atusimye Bweenzuma Mbutulaabo Abakombima Mamanino Kaatanasika” (Ngaziyakulinda, November 2019)
Bona zintu nzweelede kuchita kuti ujane beenzinyokwe balikabotu.
“Kujana Ndabajana Biyeni Beenzuma Balikabotu?” (Mibuzyo Iibuzigwa Aabachikula—Nsandulo Zigwasya, Voliyumu 1, chaandaano 8)
Niinzi nzweelede kuziba atala akumvwanana aabantu aaIntaneti?
Muchiiyo chitii, “Ndakali Kulombozya Kuba aaNdeende,” bona zyakagwasya umwi mwaalumi kuti asiye beenzinyina batali kabotu.
“Bbayibbele Lilakonzya Kubachincha Bantu” (Ngaziyakulinda, April 1, 2012)
