DYONDZO 48
Hlawula Vanghana Va Wena Hi Vutlhari
Vanghana va endla hi tsaka loko swilo swi famba kahle naswona va hi tiyisa loko swi tika. Kambe Bibele ya hi tsundzuxa leswaku a hi vanhu hinkwavo lava nga vanghana lavanene. U nga va hlawula njhani vanghana lavanene? Xiya swivutiso leswi landzelaka.
1. Vanghana lava u va hlawulaka va ta ku kucetela ku endla yini?
Hi tala ku fana ni vanhu lava hi tshamaka hi ri na vona. Sweswo swi nga va swinene kumbe swi nga ri swinene, swi tano hambi hi va na vona hi nyama kumbe hi ku tirhisa tindlela tin’wana ta ku vulavurisana. Bibele yi tiyisile loko yi ku, “loyi a fambaka ni lavo tlhariha u ta tlhariha, kambe loyi a tirhisanaka ni swiphukuphuku [lava nga rhandziki Yehovha] swilo a swi nge n’wi fambeli kahle.” (Swivuriso 13:20) Vanghana lava rhandzaka Yehovha va tlhela va n’wi gandzela va nga ku pfuna leswaku u tshama u ri munghana wa yena ni ku endla swiboho leswinene. Kambe loko hi ri ni vanghana lava nga rhandziki Yehovha va nga endla leswaku hi n’wi fularhela. Hi yona mhaka Bibele yi hi khutazaka ku hlawula vanghana hi vutlhari! Loko vanghana va hina va rhandza Xikwembu, ha vuyeriwa na vona va vuyeriwa. Hi kota ‘ku ya emahlweni hi khutazana ni ku akana.’—1 Vatesalonika 5:11.
2. Yehovha u titwa njhani hi vanghana lava u va hlawulaka?
Yehovha u hlawula vanghana vakwe hi vukheta. “I munghana lonkulu wa lavo lulama.” (Swivuriso 3:32) Yehovha u titwa njhani loko hi hlawula vanghana lava nga n’wi rhandziki? U twa ku vava swinene! (Hlaya Yakobo 4:4.) Kambe Yehovha u ta tsaka loko hi papalata vanghana vo biha ivi hi va vanghana vakwe ni va lava n’wi rhandzaka naswona u ta hi hlawula leswaku hi va vanghana vakwe.—Pisalema 15:1-4.
ANAKANYISISA
Kambisisa lexi endlaka swi va swa nkoka swinene ku hlawula vanghana lavanene ni leswaku u nga va kuma njhani vanghana lava nga ta ku pfuna.
3. Tivonele leswaku u nga hlawuli vanghana vo biha
Vanhu lava nga rhandziki Xikwembu ni milawu ya xona i vanghana vo biha. Tlanga VHIDIYO, ivi mi bula hi xivutiso lexi landzelaka.
-
Hi nga sungula ku endla xinghana ni vanhu lava nga riki vanene hi nga swi xiyi hi ndlela yihi?
Hlaya 1 Vakorinto 15:33, ivi mi bula hi swivutiso leswi:
-
I munhu wa njhani loyi a nga vaka munghana wo biha eka wena? Hikwalaho ka yini u vula tano?
Hlaya Pisalema 119:63, ivi mi bula hi xivutiso lexi:
-
I yini leswi u faneleke u swi languta loko u hlawula munghana?
Apula rin’we ro bola ri nga borisa ni laman’wana. Munghana un’we wo biha a nga ku onha njhani?
4. Vanhu lava hambaneke na hina va nga va vanghana lavanene
Bibele yi vulavula hi vavanuna vambirhi va le Israyele wa khale, ku nga Davhida na Yonathani. A va nga ringani hi malembe ni swiyimo swa vona a swi nga fani; kambe a va ri vanghana lavakulu. Hlaya 1 Samuwele 18:1, ivi mi bula hi xivutiso lexi:
-
Hikwalaho ka yini swi nga bohi leswaku mikarhi hinkwayo vanghana va hina va ringana na hina hi malembe kumbe hi xiyimo?
Hlaya Varhoma 1:11, 12, ivi mi bula hi xivutiso lexi:
-
Vanghana lava rhandzaka Yehovha va nga khutazana njhani?
Eka vhidiyo leyi, vona ndlela leyi muntshwa un’wana a kumeke vanghana ha yona eka swiyimo leswi a a nga swi ehleketi. Tlanga VHIDIYO, ivi mi bula hi swivutiso leswi landzelaka.
-
Eka vhidiyo leyi, hikwalaho ka yini vatswari va Akil a va karhateka hi vanghana lava a a ri na vona exikolweni?
-
Hikwalaho ka yini eku sunguleni Akil a a lava ku va munghana wa vona?
-
U swi kote njhani ku hlula xivundza xakwe?
5. Ndlela yo kuma vanghana lavanene
Xiya ndlela yo kuma vanghana va ntiyiso ni ndlela leyi na wena u nga vaka munghana lonene ha yona. Tlanga VHIDIYO.
Hlaya Swivuriso 18:24 na 27:17, ivi mi bula hi swivutiso leswi:
-
Vanghana va ntiyiso va pfunana njhani?
-
Xana u na vona vanghana vo tano? Loko u nga ri na vona, u nga va kuma njhani?
Hlaya Vafilipiya 2:4, ivi mi bula hi xivutiso lexi:
-
Leswaku u va ni vanghana lavanene, u fanele u va munghana lonene. U nga swi endlisa ku yini sweswo?
Leswaku u va ni vanghana lavanene, u fanele u va munghana lonene
VAN’WANA VA RI: “A swi na mhaka leswaku u na vanghana va njhani ntsena u ri na vanghana.”
-
A wu ta ku yini?
NKATSAKANYO
Loko hi hlawula vanghana hi vutlhari, hi tsakisa Yehovha naswona swi ta hi pfuna.
Mpfuxeto
-
Hikwalaho ka yini Yehovha a khathala hi vanghana lava hi va hlawulaka?
-
I vanhu va njhani lava hi nga fanelangiki hi va vanghana va vona?
-
U nga swi kotisa ku yini ku endla vunghana ni vanhu lavanene?
KUMA LESWI ENGETELEKEKE
Vona ndlela leyi vanghana lavanene va nga hi pfunaka ha yona emikarhini yo tika.
“Tiyisani Vunghana Bya N’wina Makumu Ma Nga Si Fika” (Xihondzo xo Rindza, November 2019)
Twana leswi u nga swi endlaka leswaku u va ni vanghana lavanene.
“Ndzi Nga Endla Yini Leswaku Ndzi Va Ni Vanghana Lavanene?” (Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 1, ndzima 8)
I yini leswi u faneleke u swi tiva hi vanghana va le ka swiyenge swa mabulo eka Internet?
Ti Tirhise Hi Vutlhari Tiwebsite To Endla Vanghana Eka Tona (4:12)
Eka mhaka ya vutomi leyi nge “A Ndzi Lava Tatana,” twana leswi endleke wanuna un’wana a tlhela a hlawula vanghana van’wana.
“Bibele Yi Hundzula Vutomi Bya Vanhu” (Xihondzo xo Rindza, April 1, 2012)
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
