ISOMO 48
Koma Abanywani n’Obwegendereza
Abanywani nfe na nfe bongera ha kusemererwa kwaitu obutuba tuli nabo omu bwire oburungi n’omu bwire obugumire muno. Baitu Baibuli n’etutererra ngu tali buli muntu wena asobora kuba munywani omurungi. Nahabweki n’osobora ota kukoma abanywani abarungi? Tekerezaaho ebikaguzo binu.
1. Abanywani ab’orakoma nibaija kukwataho bata obwomeezi bwawe?
Tukira kwega engeso ez’abantu abatumara nabo obwire bwingi. Kinu nikisobora kuba kirungi rundi kibi—katube tuli nabo maiso h’amaiso rundi ha mikura ey’okubalizaaho. Baibuli n’egamba ngu, “gendaga nabantu abamagezi, kandi olifoka owamagezi: baitu mutahi wabadomadoma [abo abatarukugonza Yahwe] alisasa.” (Enfumo 13:20) Abanywani abarukugonza Yahwe kandi abarukumuramya nibasobora kukukonyera kwikara haihi nauwe n’okukora encwamu enungi. Baitu abanywani nfe na nfe abatarukugonza Yahwe nibasobora kutuleetera kumwecwaho. Egi niyo ensonga habwaki Baibuli nitwekambisa kukoma abanywani n’obwegendereza! Banywani baitu obubarukuba bali bantu abarukugonza Ruhanga, kitugasira kandi n’abo bagasirwa. Ekindi, tusobora ‘kuhuumuzangana itwenka n’okwombekangana.’—1 Abasesalonika 5:11.
2. Abanywani aborakomamu nibaija kuleetera Yahwe kwehurra ata?
Yahwe akoma banywani be n’obwegendereza. “Abahikiriire nubo afoora banywani be nfe na nfe.” (Enfumo 3:32, “NWT”) N’otekereza Yahwe n’asobora kwehurra ata kakuba tukoma abanywani abatarukumugonza? N’asobora kwehurra kubi muno! (Soma Yakobo 4:4.) Ekindi, Yahwe naija kusemererwa kandi atufoole banywani be kakuba twecwaho abanywani ababi kandi tukanywana abo abamugonza.—Zabuli 15:1-4.
YEGA EBIRUKUKIRAHO
Manya ensonga habwaki kikuru muno kukoma abanywani abarungi, kandi orole omulingo osobora kutunga abanywani abarakugasira.
3. Wegendereze abanywani ababi
Abantu abatarukugonza Ruhanga n’endengo ze bali banywani babi. Mutekeho VIDIYO, hanyuma mugarukemu ekikaguzo kinu.
-
Nitusobora tuta kunywana abanywani ababi tutakimanyire?
Musome 1 Abakolinso 15:33, hanyuma mubazeeho ebikaguzo binu:
-
Muntu wa mulingo ki asobora kuba omunywani mubi? Habwaki?
Musome Zabuli 119:63, hanyuma mubazeeho ekikaguzo kinu:
-
Kiki ekirakukonyera kumanya omuntu obwaraaba ali munywani murungi?
Apo emu enyakujunzire n’esobora kusiisa ezindi zoona. Omunywani omu omubi n’asobora kukukwataho ata?
4. Abantu abatali nka itwe, nibasobora kuba banywani baitu abarungi
Baibuli ebazaaho Daudi hamu na Yonasani, abasaija ababiri ab’omu Isaleri eya kara. Baali nibahukana muno omu myaka kandi n’enyikara zaabo zaali zitarukusisana; baitu baali baine obunywani obw’amaani muno. Musome 1 Samuiri 18:1, hanyuma mubazeeho ekikaguzo kinu:
-
Habwaki banywani baitu tibasemeriire kuba ab’emyaka yaitu bonka rundi ab’enyikara ezirukusisana n’ezaitu?
Musome Abarumi 1:11, 12, hanyuma mubazeeho ekikaguzo kinu:
-
Abanywani abarukugonza Yahwe nibasobora kugarranganamu bata amaani?
Omu vidiyo enu, rora omulingo ow’oruganda omuto yatungire abanywani omu biikaro nambere akaba atarukunihira kubatunga. Mutekeho VIDIYO, hanyuma mubazeeho ebikaguzo binu.
-
Kusigikirra ha vidiyo, habwaki bazaire ba Akil baali beralikiriire habw’abanywani abaakaba aine ha isomero?
-
Kiki ekyamuletiire kubanywana ha kubanza?
-
Akasobora ata kuleka kwikara aine amasu?
5. Omulingo osobora kutunga abanywani abarungi
Manya omulingo osobora kutungamu abanywani bonyini hamu n’omulingo osobora kuba omunywani omurungi. Mutekeho VIDIYO.
Musome Enfumo 18:24 na 27:17, hanyuma mubazeeho ebikaguzo binu:
-
Abanywani bonyini bakonyerangana bata?
-
Oine abanywani abarungi nk’abo? Obworaaba otabaine, n’osobora ota kubatunga?
Musome Abafiripi 2:4, kandi hanyuma mubazeeho ekikaguzo kinu:
-
Kusobora kutunga abanywani abarungi, naiwe osemeriire kuba munywani murungi. Eki n’osobora kukikora ota?
Kusobora kutunga abanywani abarungi naiwe osemeriire kuba oli munywani murungi
ABANTU ABAMU BAGAMBA: “Kutunga omunywani wena owokasangire, nikikira kwikaraho otaine munywani n’omu.”
-
Iwe n’otekereza ki?
OYEGERE KI?
Obutukomamu abanywani abarungi, tusemeza Yahwe kandi tugasirwa.
Kweijukyamu
-
Habwaki Yahwe akwatwaho habw’abanywani tukomamu?
-
Banywani ba mulingo ki abatusemeriire kwetantara?
-
N’osobora ota kutunga abanywani abarungi?
SERULIIRIZA
Manya omulingo abanywani abarungi basobora kukukonyera omu obwire bw’ebizibu.
“Gumya Enkoragana Yaawe n’Abanywani Baawe Empero Etakahikire” (Omunaara gw’Omulinzi, Novemba 2019)
Tekerezaaho eby’osobora kukora kutunga abanywani abarungi.
Kiki eky’osemeriire kumanya h’abanywani ab’otungira ha mikura?
Kozesa Emikura ey’Okubalizaaho omu Mulingo gw’Amagezi (4:12)
Omu kicweka “Nkaba Ningonza Kutunga Ise Nyowe,” manya ekyaletiire omusaija omu kwecwaho abanywani ababi.
“Baibuli Ehindura Obwomeezi” (Watchtower, eya Apuli 1, 2012)
