Bar ɓo joŋ wo fruygi de ɓo de maaga ndo yaŋ nen fruygi no, teŋ wo nen ɓo de maaga gaali caa ndo we no. Amaa Bible ɓo’ sug naa ga jar joŋ diŋ barge maa ti ngeel ɓe ɓuy ga. Day ndo ko tẽ’ ga jobo mo caw joŋ yaŋ mbe diŋ bar ɓo maa ti ngeel ɓe so là? Naa ko maaga Bible ngaɓ ɗeŋ ɓe ne naa ɗa.

1. Wer mayse ga ndo mo ko jobo go de woore taŋgu maaga ndo baa barge de ɓe kway là?

Debaŋ ɓe joŋre naa kol de maŋ jar maaga naa see wer ɓaara mono. Joŋre naa kol go de woore noga de ɓlagge—sen diŋ cwãy, koh naa mo hay ba iggi de kããra go tinoo hã’ tu noga ti interned yaw. Doo maaga Bible wãã ne mono, “Je maga see wer jar ko re wo mono, kol go de ko re lay, ama je maga tay de jar bay ko re wo mono, ɓo’ ge ti go de ɓlagge” (Jag jõõ wo 13:20). Barge maaga da wo Jeofa, ga goŋ wo ne lay mono, kay wo ndo maaga ndo mo hay bar ɓe, lan maaga ndo mo far diŋ ɗiggi maa de woore wo. Amaa bagge barge de jar maaga bay wo da Jeofa wa caa holaŋ naa go de Jeofa. Diŋ wersen so ga Bible jor wer naa ga naa mo bag barge diŋ de jar maaga joŋre ɓaara de woore mono. Bar naa yaŋ wo da Baa no, naa da’ joŋre maa de woore wo see ɓaara, saara da’ joŋre maa de woore wo see naa lay. Naa joŋ de kããge maa “hã […] egre ne kããra, coɓ nen kããra”—1 Tesalonig wo 5:11.

2. Jeofa ko jar maaga wo diŋ bar ɓo na koge là?

Jeofa bay baa barge de wosela ɓuy wa. “Á da ɓen diŋ jar maa de deele wo” (Jag jõõ wo 3:32). Hayga naa yaŋ bag barge diŋ de jar maaga bay wo da Jeofa wa no, se joŋ see ne Jeofa na joŋge là? Á co ge jag ɓe ga hase! (Jaŋ Jag 4:4). Amaa hayga naa ɗee we go see jar maaga joŋre ɓaara bay de woore wa, ga naa ya’ see naa we see Jeofa, lan see jar maaga da wo ne lay no, naa fruy ɓil ɓe yaŋ debaŋ—Siŋ wora 15:1-4.

 FRUGGI NEN HADGE NO

4. Naa mbe de kããge maa baa barge de jar maa ti wer maa hõnla ɓuy

Bible wãã ti Dafid wo de Jonataŋ, jar Israyel po wo ɓoge. Kiŋgi Jonataŋ hay go dedaŋ maa ni Dafidn hãã, lan se hay diŋ mbarga maa waŋ pa; amaa barge maa ti holaŋ ɓaaran hay daŋgo do woore. Jaŋ 1 Samyel 18:1, ni ndal wee ti wiigi jag maa blam la no:

• Wer mayga á bay naŋ ga naa mo baa barge diŋ de jee maaga kiŋgi naa boŋ, noga de jee maaga de horog doo naa no lay, noga bay de horog wa doo naa ne lay wa là?

Jaŋ Rom wo 1:11, 12, ni ndal wee ti wiigi jag maa blam la no:

• Barge maaga da wo Jeofa jor wo glog kããra na jorge là?

Ɓil videyo maa blamn la mono, ko maaga weegeman naa po jõõ da’ barge ti ngeel maaga se ni waare mo ɗa. Ko VIDEYO, ni ndal wee ti wiigi jag maa blam la wo no.

• Ɓil videyon mono, wer mayse ga barge maaga Akil hay baa ra ti lakol hay bay wo de coge jag pããre ɓe wo wa là?

• Taŋgu mono, kããre Akil sen hay wo de cõõre jag ɓe diŋ wer may?

• Á joŋ joŋge maaga se mo ko see ɓe go boŋ wa so là?

 5. Ɗeŋ maa baa barge maa ti ngeel ɓe

 KLUURI HADGE NO

Naa yaŋ bag barge naan wo de ko re no, naa joŋ de cõõre jag Jeofa, lan se kay naa lay.

Ferge ko nen hadge no

• Wer mayse ga Jeofa da ga naa mo baa barge naan wo de ko re là?

• Naa bag barge de jar maa ẽse wo ga là?

• Ndo joŋ joŋge maaga ndo mo baa barge diŋ de jar maaga da wo Jeofa là?